Jeremi 39 - U TIENU MAAMA TILI 2013

Babilonni yaaba koani ki paadi Jerusalemi

¹ Juda bado Sedesiasi bali binyiali, cipiiga nni, Babilonni bado Nebukanesa den cua leni o toagola kuli ki baa Jerusalemi.

² Sedesiasi bali piiga n binyenli, cinaa dayiali, bi den cibi u dogu bilinu li bonli.

³ Lani, Babilonni bado koanbala kuli den kua ki ban kali u dogu siiga nni buliñoabu kani. Bani n tie ne: Nedigali-Saleseli bi toatieba yudaano, Samigali-Nebo, Sali-Sekimi mu moagilimu yudaano leni o koanbala yaaba n sieni.

⁴ Juda bado Sedesiasi leni bi toatieba kuli n den laa ba, bi den sani ki ñani u dogu nni ku ñiagu, ki tagini o bado salidingo sanu, ki baa ña a goanlieda buliñoabu kani, ki tagini Araba sanu.

⁵ Ama Babilonni toatieba den ŋoadi ki deli ba. Bi den nandi Sedesiasi Jeriko tialu nni. Bi den cuo, ki gedini o Babilonni bado Nebukanesa kani, Livila dogu nni, Hamati diema nni. Lankane ke Nebukanesa den jia o buudi.

⁶ Livila dogu nne, ke Babilonni bado den teni ke bi kodi o bado Sedesiasi bijaba leni mi diema bulicinba kuli, o nunbu nni.

⁷ Li yaa puoli, o den teni ke bi fiadi Sedesiasi nuni, ki teni ke bi loli o leni ti kumoandi gaali bonilie, ki dadi ki gedini o Babilonni diema nni.

⁸ Babilonni yaaba den juu o bado diegu leni bi niba diedi. Bi den pua ki mudi Jerusalemi bilini kuli.

⁹ Nebusaradani, badidiegu guudikaaba yudaano, den cuo yaa niba n den sieni u dogu nni, yaaba n den taa bi yula ki puni o leni yaaba n den li sieni kuli, ki gedini ti yonbidi Babilonni.

¹⁰ Ama Nebusaradani badidiegu guudikaaba yudaano, den ŋaa u dogu nni luodipenpiena wani Juda diema nni. O den puni ba duven tiidi leni i kuani.

Jeremi baa mi faabima

¹¹ Babilonni bado Nebukanesa den teni Nebusaradani, badidiegu guudo yaa ñoamabonli n tie ne Jeremi po.

¹² «Gedi ki ban taa o, ki yaa faami o po, da tieni o yaala n bia, ki yaa puuni o wan mia yaala.»

¹³ Bi guudikaaba yudaano Nebusasidani, o bado moagilimu yudaano Nebusasiban, bi yanfuodanba yudaano Nedigali-Saleseli leni Babilonni bado toatieba yudanba kuli,

¹⁴ den soani ke bi ñani Jeremi badidiegu luolu nni, ki teni o Ahikami bijua Gedalia, Safani yaabili, yua n den puni o u sanu ke o kuni. Yene ke Jeremi den ye bi niba siiga.

Ebedi-Meleki faabima

¹⁵ O Diedo den maadi leni Jeremi wan den ye li kpaadidieli nni yaa yogunu, yaa maama n tie ne:

¹⁶ «Gedi ki ban maadi leni Ebedi-Meleki Etiopi diema yua, ki yedi o: Li Miali Diedo U Paaciamu Kuli Daano, Isidayeli Tienu yedi nanda: ‹N baa cuani u naa dogu po, min maadi yaa yebiadima maama yeni, ki tieni u yaala n bia. N kan tieni u yaala ŋani ka! Laa bonla kuli baa tieni a nunbu nni.

¹⁷ Ama landaali n baa faabi a. O Diedo n yedi ke bi kan taa ŋa ki teni a ŋan jie yaaba.

¹⁸ N baa teni ŋan cia, ki jugisiega kan kpa ŋa. A baa gaa a miali kelima a dugi n po.› Mini o Diedo n yedi yeni.»