Jeremi 38 - U TIENU MAAMA TILI 2013

Bi luni Jeremi li caakuonli nni

¹ Matan bijua Sefatia, Pasehuri bijua Gedalia, Selemia bijua Yukali, Malikia bijua Pasehuri, den gbadi Jeremi n den maadi leni bi niba yaa maama ki tua:

² «O Diedo yedi nanda: Yua n baa sieni u naa dogu nni, ki jugisiega, mi koma leni u yianbiadipuodiko n baa je o. Ama yua n ñani ki baa teni o yuli Babilonni yaaba, baa yaa ye leni li miali. O pali baa yaa mani, kelima o pia li miali ki fo.

³ O Diedo yedi nanda: ‹Moamoani n baa taa u naa dogu ki teni Babilonni bado toagoli, lin diedi u.› »

⁴ O bado koanbala den yedi o bado: «Teni ban kpa o naa joa, kelima o teni ke yaa toatieba n sieni u dogu nni leni bi niba kuli gbani baa wudi, kelima o maama po. O joa ne ki lingi bi niba ŋamu ka, o lingi bi yebiadima yo.»

⁵ O bado Sedesiasi den yedi: «Wani nne, o ye yi nuu nni, kelima ba ke n tie bado, n nan kan fidi ki yie yi po liba kuli.»

⁶ Lanwani, bi den taa Jeremi ki luni o o bado bijua Malikiya caakuonli nni, yaali n den ye badidiegu kpaadidielieli luolu nni. Bi den jiini Jeremi leni i baabi li caali yeni niinni. Ñima ki den ye lienni. Ama li ŋoabili bebe n den ye lieni. Jeremi den feli li niinni.

⁷ Ebedi-Meleki, Etiopi diema yua, yua n den tuuni badidiegu den gbadi ke bi luni Jeremi li caakuonli nni. Li daali, li den sua ke o bado kaa Benjamen dogu buliñoabu kani.

⁸ Ebedi-Meleki den ñani badidiegu ki maadi leni o bado ki yedi:

⁹ «O bado, n yonbidaano, bi naa niba ki ŋanbi leni ban tieni o saawalipualo Jeremi yaala, bi luni o li caakuonli nni. Mi koma baa kpa o lienni, kelima u dogu nni kuli dupen naa go ye.»

¹⁰ Lanwani, o bado den yedi Etiopi diema joa, Ebedi-Meleki: «Ban lingi niba piitaa yin gedi ki ban ñani o saawalipualo Jeremi li caakuonli nni, hali ke o daa kpe.»

¹¹ Ebedi-Meleki den taa i nipiitaadi yeni, ki gedi badidiegu ki ban kua yaa dieli n ye o bado ŋalimandieli tiipo. Bi den baa lienni i kpacabaani leni a kpacakpela ki kpieni likuli li caakuonli nni leni i baabi, Jeremi kani.

¹² Ebedi-Meleki Etiopi yua, den yedi Jeremi: «Taa i naa kpacabaani leni a naa kpacakpela ki tieni likuli a bualogi nni, i baabi tiipo.» Jeremi den tieni yeni.

¹³ Bi den dadi ki ñani Jeremi leni i baabi li caakuonli nni. Jeremi den ye badidiegu kpaadilieli luolu nni.

O bado Sedesiasi didi cua ki buni Jeremi

¹⁴ O bado Sedesiasi den soani ke bi yini o saawalipualo Jeremi ki teni ke o cua o kani o Diedo cuubuliñoataabu kani. O bado den yedi Jeremi: «N bua ki buali a bonyenla bebe yo, da wuoni nni liba.»

¹⁵ Jeremi den guani ki yedi Sedesiasi: «N yaa waani a yaala n kpendi, a baa kpa nni. N yaa tundi a mo, a kan gaa.»

¹⁶ O bado Sedesiasi den niani o saawalipualo Jeremi ŋasiili nni u ñoanianu, ki poli ki yedi o: «O Diedo yua n fo ki puni ti li miali yeni po, n kan teni ban kpa ŋa. N kan teni a yaaba n bua ki ñani a miali yeni mo.»

¹⁷ Lani, Jeremi den yedi Sedesiasi: «Li Miali Diedo U Paaciamu Kuli Daano, Isidayeli Tienu yedi mine: ‹A yaa tuo ki ñani ki ban teni a yuli Babilonni bado koanbala, a baa faabi a miali, u mu mo kan juu u naa dogu. Fini leni a diegu nni yaaba kuli baa faabi.

¹⁸ Ama a yàá ñani ki ban teni a yuli Babilonni bado koanbala, n baa teni bani Babilonni yaaba u naa dogu. Bi baa juu u u mu, amoko kan ŋmadi bi nuu nni.› »

¹⁹ O bado Sedesiasi den guani Jeremi: «N pia i yanbani yaa Jufinba n taa bi yula ki teni Babilonni yaaba po. N jie ban da ti ŋaa nni leni ba, ban waani nni fala.»

²⁰ Jeremi den guani ki yedi o: «Bi kan ŋaa ŋa leni ba. A yaa cengi o Diedo n puogi nni min yedi a yaa maama yeni, a baa sua ke li ŋani a po. A baa faabi a miali.

²¹ Ama a yaa yie ke a kan ña ki ban teni a yuli mo, o Diedo n waani nni yaala n ne:

²² ‹Bi baa gedini Juda bado diegu nni puoba, yaaba n sieni kuli Babilonni bado koanbala kani.› Lani, bi puoba yeni baa yedi: ‹A den teni ke yaaba n maadi leni a Mi yanduanma boandi a ki diedi a. A taana feli ti moamoadi nni, Ke bikuli sani ki yadi ki ŋaa ŋa.› »

²³ Bi baa gedini a puoba leni a bijaba kuli, Babilonni yaaba po. Fini a ba moko kan ŋmadi bi nuu nni. Babilonni bado baa cuo ŋa, wani yua n baa juu u dogu u mu yeni.

²⁴ Sedesiasi den yedi Jeremi: «Niloba kuli n da bandi laa maama, lani yaa ka, a baa kpe.

²⁵ A koanbala yaa bandi ke n maadi leni a, ke bi cua ki yedi a: ‹Waani ti ŋan yedi o bado yaala leni o bado mo n yedi a yaala. Da wuoni ti liba kuli, ti kan kpa ŋa.›

²⁶ Ŋan guani ki yedi ba: ‹N cua ki mia o bado ke wan da guani nni Jonatan diegu nni, yeni yaa ka, n baa kpe lipo.› »

²⁷ A koanbala kuli den cua Jeremi kani, ki buali o. O den guani ba, nani o bado n den yedi wan guani ba maama yeni. Bi den tieni dindini ki sani ki lebidi, kelima laabaali naa den yadi.

²⁸ Jeremi den li baa ki ye badidiegu kpaadidieli luolu nni, hali ban ban fie Jerusalemi yaa daali.