Jeremi 37 - U TIENU MAAMA TILI 2013

O bado Sedesiasi soani u tondu Jeremi kani

¹ O bado Sedesiasi, Josiasi bijua n den kali ti gbandi po, ki gaa Joakimi bijua Konia kaanu. Babilonni bado Nebukanesa n den dini o Juda diema bali.

² Wani o ba, o naacenba leni mi diema niba kuli, oba ki den cengi o Diedo n den puogi o saawalipualo Jeremi n maadi yaa maama.

³ O bado Sedesiasi den soani Selemia bijua Yehukali leni o kopadiciamo Maaseya bijua Sofoni, o saawalipualo Jeremi kani ke ban yedi o: «Ti mia ŋa, ŋan jaandi ki mia ti po ti Diedo ti Tienu!»

⁴ Lanyogunu sua ke bi daa luoni Jeremi li kpaadidieli nni. O da den goadi wan bua maama Isidayeli yaaba siiga.

⁵ Babilonni yaaba, yaaba n den gaani ki cebini Jerusalemi, n gaa laabaali ke Faraon toagoli ñani Ejipiti diema nni, bi den sani ki foagidi leni Jerusalemi.

⁶ Lani, o Diedo den maadi leni o saawalipualo Jeremi ki yedi:

⁷ O Diedo Isidayeli Tienu yedi nanda: «Yin yedi mani Juda bado yua n soani yi, ke yin cua ki bu nni yeni. ‹Faraon toagoli yaali n den kpendi ki baa todi yi yeni, baa guani li diema nni, Ejipiti nni.› »

⁸ Babilonni yaaba baa guani ki cua ki baa u naa dogu, bi baa paadi u, ki juu u u mu.

⁹ O Diedo yedi nanda: «Yin da boandi mani yi yula, ki yedi: ‹Babilonni yaaba sani ki foagidi!› Bi kan sani ki joandi ba.

¹⁰ Ba yi yaa koani ki paadi Babilonni yaaba, ki bolini ba, li yaa sieni yaaba n poagili, bi baa naabi ki fii bi gbandiena nni, ki juu u naa dogu u mu.»

Bi luoni Jeremi li kpaadidieli nni

¹¹ Nani Faraon toagoli n den teni ke Babilonni yaaba toagoli sani ki foagidi Jerusalemi dogu yeni,

¹² Jeremi den ñani Jerusalemi ki baa gedi Benjamen diema nni, ki taani leni o niba mu tinmu boagidima po.

¹³ Wan den pundi Benjamen buliñoabu kani, o den tuogi leni bi toatieba yudaano Selemia bijua, ban yi yua Yiliya, Anania yaabili. Yiliya den cuo o ki yedi: «Ŋaa caa ki baa n teni a yuli Babilonni yaaba ka te!»

¹⁴ Jeremi den guani ki yedi: «Yeni ka, mii caa ki baa n teni n yuli Babilonni yaaba ka!» Ama Yiliya naa den cengi o maama. O den cuo Jeremi ki gedini o a koanbala kani.

¹⁵ O bado koanbala pala den beni Jeremi po, ke bi pua o, ki luoni o li kpaadidieli nni, o tidianlo Jonatan diegu nni, kelima bi den teni ke ku kpandi kpaadidieli.

¹⁶ Li den gaa yene ke bi kuani Jeremi li kpaadidieli nni, ke o waagi lienni boncianla.

¹⁷ O bado Sedesiasi den soani ke bi yini o, ke o boni leni o ŋasiili nni badidiegu nni, ki buali o: «Naani o Diedo pia n po maamiba?» Jeremi den guani ki yedi: «O pia a po!» O den yedi: «Babilonni bado baa diedi a.»

¹⁸ Jeremi den yedi o bado Sedesiasi: «N bii fini, a naacenba leni bi naa niba be yo ke yi cuo ki luoni nni?

¹⁹ Yi saawalipuaba yaaba n den pua saawali ki tua: ‹Babilonni bado kan cua ki baa yi, o kan cua ki baa mi diema yeni ye le?›

²⁰ Jeremi den yedi: moala fini o bado, cengi n miabu. U Tienu leni a, n daano, da go teni min guani o tidianlo Jonatan diegu nni, lani yaa ka n baa kpe lienni.»

²¹ Lani, o bado Sedesiasi den bili li ñoamabonli, ke ban kubi Jeremi bonŋanla badidiegu kpaadidieli luolu nni. Bi yen kpendinni o po daali kuli dupenyendo, ban den ñandi yua ban yi yaa sanu a dupenpuala sanu po. Bi den tiendi yene hali dupen n ban gbeni u dogu nni. Jeremi n den ye maama n yeni badidiegu kpaadidieli luolu nni.