Jeremi 36 - U TIENU MAAMA TILI 2013

Joakimi juu li tigbabikaali

¹ Juda bado Joakimi, Josiasi bijua bali binnaali nni, o Diedo den maadi leni Jeremi ki yedi:

² «Taa li tigbabikaali ki diani min maadi a yaa maama Isidayeli, Juda leni i nibuoli po, ki cili hali min kpa maadi leni a yaa daali Josiasi yogunu, ki ban pundi hali dinla.

³ Yeni, li fidi ke Juda yaaba n fangi min jagi ki baa tieni ba yaa bonbiadila kuli, ki ŋaa bi tuadibiada. Bi yaa tieni yeni, n baa pa ba sugili bi tagili leni bi tuonbiadi po.»

⁴ Jeremi den yini Neriya bijua Baruki, ki maadi ke o dangi li tigbabikaali nni, o Diedo n den waani wani Jeremi yaa maama kuli.

⁵ Li yaa puoli, Jeremi den mia Baruki ki yedi: «N nuu ki ya, n kan fidi ki gedi o Diedo diegu po.

⁶ Fii ki gedi ki ban cogi min maadi ke a diani yaa tigbabikaali nni, o Diedo maama. Cogi ma bi niba nintuali o Diedo diegu nni, mi ñoalolima daali. Ŋan cogi ma Juda yaaba, yaaba n ñani bi dogi nni ki cua kuli po.

⁷ Daalinba, bi sugilimiabu baa pundi o Diedo nintuali. Bi siiga yuakuli n ŋaa o tuadibiada, kelima o Diedo pabienli n kandi maama po. O pali fii hali boncianla bi naa niba po.»

⁸ Neriya bijua Baruki den tieni o saawalipualo Jeremi n puogi o yaala kuli, ki cogi li tili nni U Tienu maama, o Diedo diegu nni.

⁹ Josiasi bijua Joakimi bali binmuuli, ciyia niinni, bi den kpaani o Diedo nintuali, ki bili li daali mi ñoalolima po, Jerusalemi niba leni yaa niba n ñani Juda dogi, ki cua Jerusalemi kuli po.

¹⁰ Landaali Baruki den cogi li tili, Jeremi maama n den diani yaali yaa niinni, o Diedo diegu tugu nni, bi niba kuli nintuali. O den cogi li, Safani bijua Gemalia o tidianlo dieli nni, tanpoli luolu nni, o Diedo diegu buliñoapanbu buliñoatuogili kani.

¹¹ Gemalia bijua Mise, Safani yaabili den gbadi o Diedo maama, yaama n den ye li tili nni.

¹² O den fii ki gedi badidiegu o tidianlo dieli nni, a koanbala kuli n den ye naani, Elisama o tidianlo, Semaya bijua Delaya, Akibori bijua Elinatani, Safani bijua Gemalia, Hanania bijua Sedesiasi leni yaa koanbala n sieni kuli.

¹³ Mise den togidi ba, wan den gbadi yaa maama kuli, Baruki Neriya bijua n den cogi yaama li tili nni bi niba nintuali.

¹⁴ Lani, a koanbala kuli den taani ki soani Baruki kani, Netania bijua Yehudi, Selemia yaabili, Kusi yaabili ke wan yedi o: «Taa ŋan cogi yaa tigbabikaali bi niba nintuali yeni, ki cua ne.» Neriya bijua Baruki den taa li tigbabikaali ki gedi bi kani.

¹⁵ Bi den yedi o: «Kali nekanba ki cogi ti po.» Baruki den cogi bi po.

¹⁶ Ban den gbadi laa maama, ti jawaandi den cuo bikuli ke bi yedi Baruki: «Ti baa waani o bado mi naa maama kuli.»

¹⁷ Bi den buali Baruki ki yedi: «Waani ti lan tieni maama, ke o maadi ke a diani mi naa maama kuli.»

¹⁸ Baruki den guani ki yedi ba: «O den li kpaane ki maadi yaa maama n tie ne, ke nmo dangi leni u tidianmuanu leni u ñima.»

¹⁹ A koanbala den yedi Baruki: «Fini leni Jeremi n sani ki ban wuoni, niloba kuli n da bandi yin ban wuoni naani.»

²⁰ Li yaa puoli, bi den bili li tili Elisama o tidianlo dieli nni, ki kua o bado kani, o diegu nni, ki togidi o yaala n den tieni kuli.

²¹ O bado den soani Yehudi ke wan ban taa li tigbabikaali yeni. Yehudi den ban taa li Elisama o tidianlo dieli nni, ki cogi li o bado leni o koanbala, yaaba n den se o kani kuli po.

²² O bado den kaa ti wadi yogunu yaa diebili nni, ke u mu co o nintuali. Li den tie ciyia yaa ŋmaalo nne.

²³ Yehudi yaa den cogi kaanitaa bi kaaninaa, o bado yen taa o tidianlo juga, ki jia wan cogi yaala li tili nni yeni, ki lu u mu nni. O den tieni yene hali ki ban juu ki gbeni li tigbabikaali yeni kuli.

²⁴ O bado leni o naacenba yaaba n den gbadi laa maama kuli, jawaandi naa den cuo ba, bi naa den padi bi tiadi.

²⁵ Ama Elinatani, Delaya leni Gamalia den mia o bado ke wan da juu li tigbabikaali, ama o naa den cengi ba.

²⁶ O bado den soani o bijua Yerameeli leni Seraya Asiriyeli bijua leni Selemia Abideeli bijua, ke ban cuo o tidianlo Baruki leni o saawalipualo Jeremi. Ama o Diedo den wuoni ba.

²⁷ O bado n den juu Jeremi n den maadi ke Baruki diani yaa tigbabikaali, ke li pendi, o Diedo den yedi Jeremi:

²⁸ «Guani ki baa tigbabikatoali. Ŋan guani ki diani yaa maama n den ye Juda bado Joakimi n den juu yaa tili yeni niinni kuli.»

²⁹ Ŋan fu leni Juda bado Joakimi ki yedi o: «O Diedo yedi nanda: Fini, a juu laa tigbabikaali ki tua: Li gaa lede ke a diani yaa maama n tie ne? ‹Babilonni bado baa cua ki bolini yaa diema n tie ne, mi niba leni mi yandi kuli. Laa pia kuli tama.›

³⁰ Li tie lani yaa po yo ke o Diedo maadi Juda bado Joakimi po yaa maama n tie ne: ‹O buolu nni, oba kuli kan kali Davidi bali gbandi po. O yaa kpe, bi baa ñani o ki bili niini u yienu n puli o u yensiinu, ti wadi mo n gbadi o ku ñiagu.›

³¹ N baa fii ki sedi fini leni a puoliŋuani leni a naacenba po, kelima bi tagili po. N baa teni min den waani ke yaa fala n baa cua, ke baa cengi yeni, n baa Jerusalemi leni Juda yaaba.»

³² Jeremi den taa tigbabikatoali ki teni Neriya bijua Baruki. O tidianlo Baruki den diani Jeremi n den maadi o yaa maama, ke mi den ye Juda bado Joakimi n den juu yaa tili yeni niinni kuli. Mi maama boncianla yaama n naani leni ma go den pugini.