Jeremi 35 - U TIENU MAAMA TILI 2013

Jeremi leni Rekabi puoliŋuani

¹ Juda bado Josiasi bijua Joakimi n kaa ti gbandi po yaa yogunu, o Diedo den maadi Jeremi yaa maama n tie ne:

² «Gedi Rekabi puoliŋuani kani ki boe leni ba. A yaa baa boe leni ba, ŋan gedini ba o Diedo diegu diena siiga dieyenli nni, ki pa ba mi daama ban ño.»

³ N den taa Yaasania, Jeremi bijua, Abatisinia yaabili, o kpiiba, o bijaba leni Rekabi diegu yaaba kuli.

⁴ N den gedini ba o Diedo diegu nni, Gedalia bijua Hanani U Tienu nilo dieli nni. Laa dieli den kuu leni a koanbala dieli, ki ye Salumi bijua Maaseya yua n guu li cuuli dieli yuli po.

⁵ N den sieni Rekabi diegu yaaba nintuali yaa boba n gbie leni mi daama leni mu tadiñokaamu ki yedi ba: «Ño mani mi daama!»

⁶ Ama bi den guani ki yedi: «Ti kan ño daama, kelima ti yaaja Rekabi bijua Yonadabi den teni li naa ñoamabonli: ‹Yinba leni yi puoliŋuani kuli kan ño daama.

⁷ Yin da maa diena, ki da buli liba kuli, ki da ŋuu duven tiidi mo. Yin da baa piama. Yi miali yema nni kuli, yin yaa ye a gbandiena nni. Lani n tie yin waagi ki ye o Diedo n puni yi, yin kali naankani.›

⁸ Ti ŋua ti yaaja Rekabi bijua Yonadabi n puogi ti yaala kuli, tinba, ti puoba, ti bijaba leni ti bisiaba, tii ñu daama ti miali yema nni kuli.

⁹ Tii maa diedi ki baa yaa ye lienni. Tii pia duven tiidi kuanu, tii pia kuani. Tii pia tinmu tin baa coagi naani.

¹⁰ Ti ye a gbandiena nni, ki ŋua ki tiendi Yonadabi, ti yaaja n puogi ti yaala kuli.

¹¹ Nebukanesa Babilonni bado, n den cua ki baa mi diema yaa yogunu yo ke ti den yedi: ‹Fii mani tin gedi Jerusalemi, ki sani Babilonni yaaba toatieba leni Siiri yaaba toagoli. Li gaa yene, ke ti cua ki kali Jerusalemi dogu nni.› »

¹² Lani, o Diedo den yedi Jeremi:

¹³ «Li Miali Diedo Isidayeli Tienu, U Paaciamu Kuli Daano maadi yaa maama n tie ne: ‹Gedi ki ban yedi Juda niba leni yaa niba n kaa Jerusalemi, naani yi kan cengi n tundi, ki fangi yi yula? O Diedo n yedi yeni.› »

¹⁴ Rekabi yaaba kubi bi yaaja Yonadabi tundi, wani yua n den yedi o bijaba n da ño daama, baa ko ñuni mo hali dinla. Bi tuo bi baa tundi. Nmo te? N maadi, ki lindi ki maadi leni yi, ama yi naa gaa n tundi.

¹⁵ N den soani yi kani n naacenba bi saawalipuaba, ki lindi ki tuuni ba u yogunu kuli, ke ban yedi yi: «Yuakuli n pegidi ki ŋaa o sanbiadu, lebidi mani yi bontienkaala, da pia mani ŋantaadi leni tientoe, ki kpiagidi yi. Yaa ye mani, min puni yinba leni yi baanba yaa diema nni.» Ama yi naa cengi. Yi naa diadi yi tuba ki gaa n tundi.

¹⁶ Rekabi bijua Yonadabi bijaba, tuo ki kubi bi baa n bili bi po yaa ñoamabonbilikaana. Ama bi naa niba wani naa tuo n tundi!

¹⁷ Mini Li Miali Diedo U Paaciamu Kuli Daano, Isidayeli Tienu yedi: «N den maadi leni ba, ama baa cengi. N den yini ba, ama baa tuo. Lani yaa po, n baa teni min den waani ke yaa fala n baa baa Jerusalemi leni Juda yaaba yeni, n nandi ba.»

¹⁸ Jeremi den yedi Rekabi puoliŋuani: «Li Miali Diedo U Paaciamu Kuli Daano, Isidayeli Tienu yedi nanda: ‹Nani yin tuo ki kubi yi yaaja Yonadabi tundi, ki tieni wan yedi yi yaala kuli yeni,

¹⁹ lani yaa po, Li Miali Diedo U Paaciamu Kuli Daano, Isidayeli Tienu yedi ke Rekabi bijua Yonadabi, kan luo yaa puoliŋuani n baa yaa ye ne, n nintuali daali kuli.› Lani n tie o Diedo Isidayeli Tienu n yedi yaala.»