Jeremi 34 - U TIENU MAAMA TILI 2013

Bi baa Jerusalemi dogu ki bolini u 34—45 Yaala n baa tieni Sedesiasi

¹ Babilonni bado Nebukanesa, o toagola leni wan paadi yaa diema kuli yaa niba n den tiendi bu toabu leni Jerusalemi dogu leni Juda dogi kuli yaa yogunu, o Diedo den maadi leni Jeremi yaa maama n ye ne.

² O Diedo Isidayeli Tienu yedi: «Gedi ki ban yedi Sedesiasi Juda bado ke o Diedo yedi nanda: ‹N taa u naa dogu ki luni Babilonni bado nuu nni. O baa juu u u mu.

³ Amo kan ŋmadi o nuu nni. Bi baa cuo ŋa leni u paalu, ki teni o. A nuni baa le Babilonni bado nuni. Yi baa kadi nungbaananaa, wan maadi leni a ke soagindo ki ye. A baa gedi Babilonni.›

⁴ Fini Juda bado Sedesiasi, cengi o Diedo maama! O Diedo maadi yaa maama n tie ne a po: ‹Ki jugisiega ka baa kpa ŋa.

⁵ Ama a baa kpe leni mi yanduanma. Nani ban den juu tulale a baanba leni bi badikpeliba po maama, bi baa juu amoko yaa po yene.› Bi baa ŋanbi a kuuma ki mua ki yedi: ‹Ŋain ti canbaa ki go ye!› Mini o Diedo n yedi yeni.»

⁶ O saawalipualo Jeremi den maadi laa maama kuli Juda bado Sedesiasi kani Jerusalemi dogu nni.

⁷ Lanyogunu yo ke Babilonni bado toatieba den tuogi leni Jerusalemi leni Juda dogi yii n sieni. Bi go den tuogi leni Lakisi leni Aseka, kelima Juda dogi yii n den pia u paalu kuli siiga laa doliedi n den sieni.

Yaa yonbi n faabi ke bi canbaanba go cuo ba

⁸ O bado Sedesiasi n den teni ke Jerusalemi niba kuli kpaani ki niani ke bi baa faabi bi yonbi yaa yogunu, o Diedo den maadi leni Jeremi yaa maama n ye ne:

⁹ «Yuakuli n ŋaa o yonbo yua n tie Hebilu buolu, lan tie joa bi pua. Oba kuli mo n da go cuo o kpiilo Juda diema nilo, wan tua o yonbo.»

¹⁰ A koanbala, li nitaanli leni yaaba n den taani ki niani ke bi baa faabi bi yonbi leni bi puotuada, ki kan go yaa kubi ba ti yonbidi nni, den tuo ki faabi ba ki ŋaa ba.

¹¹ Ama bi go den ti yuandi ki lebidi bi pala ki guani ki cuo ban den ŋaa yaa yonbi leni yaa puotuada yeni, ki teni ke bi guani ki tua yonbi leni puotuada tiladi.

¹² Lani, o Diedo den maadi leni Jeremi ki yedi:

¹³ «O Diedo Isidayeli Tienu yedi daa: ‹Min den ñani yi baanba yaa daali Ejipiti diema nni, ban den ye naankani ti yonbidi, n den niani ba, ki yedi:

¹⁴ Ne leni binalele, yi siiga yuakuli baa cabi o kpiilo Hebilu yua, yua n cua ki kuadi o yuli o po. O baa soani o po binaluoba, li yaa puoli a baa cabi o. Ama yi baanba naa den gaa n maama, baa den diadi bi tuba ki cengi n maama.› »

¹⁵ Yinba, yi guani dinla ki tieni yaala n dagidi n nuni po, ki kpaani ki yedi ke yi baa ŋaa yi yonbi yaaba n tie yi kpiiba. Yi niani laa bonla n nintuali, ban taagi n yeli yaa dieli yaa niinni.

¹⁶ Ama yi guani ki lebidi yi yama, ki fali n yeli, yikuli yendo yendo guani ki cuo yi yonbi leni yi puotuada, yin den cabi yaaba. Yi guani ba leni u paalu ki teni ke bi go tua yi yonbi leni yi puotuada.

¹⁷ Lani n teni ke o Diedo yedi nanda: «Nani yin ki den tuo n maama, ki faabi yi kpiiba ti yonbidi nni yeni, mini o Diedo moko baa fii ki sedi yi po. N baa ŋaa yi bu toabu, u yianbiadipuodiko leni mi koma, ki teni ki tinga nibuoli yaaba n baa le yi kuli, ti jawaanciandi n cuo ba. Mini o Diedo n yedi yeni.»

¹⁸ O Diedo go yedi: «N baa bolini yaa niba n ki den kubi bi nianli yeni kuli. Bi den padi ki naabiga, ki jia ka bonjenalie, ki poandi a siiga, ki niani nni ke bi baa faabi bi yonbi.

¹⁹ Juda leni Jerusalemi paatieba, li nikpiaga, li kopadicianba leni mi diema niba kuli den tieni yeni, ama laa niba den miidi laa ñoanianu.

²⁰ Lani n teni ke n baa lu ba bi yibalinba yaaba n bua ki ñani bi miana yeni nuu nni. Bi tinkpiba baa tua jiema tanpoli nuani leni ki tinga yandi po.

²¹ N baa ŋaa Juda bado Sedesiasi leni o koanbala bi yibalinba yaaba n bua ki ñani bi miana nuu nni. N baa lu ba Babilonni bado toagoli nuu nni, ba bi da yaa foagi leni yi moala.

²² N baa teni ba n ñoamabonbilikaana. Mini o Diedo n yedi yeni. N baa teni ban cua ki baa u naa dogu. Bi baa koani leni u, ki paadi u, ki juu u u mu. N baa teni Juda dogi n kpandi diegbendi, niba n ki ye naani.»