Jeremi 33 - U TIENU MAAMA TILI 2013

Jerusalemi n baa yaa ñoaniancaani

¹ Jeremi n den lo li kpaadidieli luolu nni yaa yogunu, o Diedo den maadi leni o miliema.

² O Diedo yua n tagi ki tinga ki bili ka kaanyendu, wani yua yaa yeli n tie Li Miali Diedo maadi mi naa maama:

³ «Yini nni, n baa tuo, n baa waani a yaa bonla n yabi, yaa bonla n wuo ke ŋaa bani la.

⁴ O Diedo Isidayeli Tienu maadi u naa dogu diedi maama leni Juda badiba diedi maama, ki yedi: Bu toabu teni ke laa diedi tua diegbendi.

⁵ Ki ña ke yi baa koani leni Babilonni yaaba, ki pia yi po todimiba kuli. Bi baa gbieni yi dogu leni bi tinkpiba bebe, min baa pua ki kpa yaaba n pabiencianli nni. Jerusalemi dogu niba biadima po teni ke n buli ba n nunga.

⁶ N baa paagi u dogu yeni cain. N baa paagi u niba mo. N baa pa ba laafia leni mi yanduanma ñuadi.

⁷ N baa teni Juda leni Isidayeli niba yaaba n ye ti yonbidi n guani, min kaani ba nani kpiama yeni.

⁸ N baa ŋuudi ki ŋanbi ba leni ban den tieni yaa tuonbiadi kuli, ki tudi n po. N baa tieni bi po sugili leni ban den tudi n po, ki tieni yaa tuonbiadi leni ban den fii n po leni yaa yiema.

⁹ U naa dogu baa tua n po pamanli leni jigidi bonla, ki tinga nibuoli kuli siiga. Laa nibuoli yaa gbadi min tieni bi po yaa ŋanma, li baa paki ba bi gbani n jeli, kelima mi yemanma leni min baa pa ba yaa baali kuli yaa po.»

¹⁰ O Diedo yedi mi naa maama: «Yinba Juda yaaba, yi kpaagi ki tua ke yi diema pua nufanu, niba ki ye mi niinni ki buali yandi. Moamoane! Dinla po wani, Juda dogi nni leni Jerusalemi sani nni, niba ki ye ki buali yandi. Ama n yedi yi ke mi naa diema nni, yi go baa gbadi:

¹¹ I pamandanyani, li pamankandikaali yani, togibaa leni toginaa yani. Yi go baa gbadi ke bi niba yiini ki tua: ‹Pagi mani Li Miali Diedo U Paaciamu Kuli Daano kelima o ŋani, o ŋanbili mo ye hali yaa yogunu kuli!› Yi go baa gbadi yaaba n cuani i tuondi pada yani o Diedo diegu nni. N baa teni yaaba n den ye ti yonbidi n guani ki kpeni min kaani ba nani kpiama yeni. Mini o Diedo n yedi yeni.»

¹² Li Miali Diedo U Paaciamu Kuli Daano yedi nanda: «Yaa kaanu n tie diegbena kaa pia niba, kaa pia yandi leni li dogi nni kuli, a yanlola baa yaa ye bi yankpaaba po, bi yandi n baa yaa ye naani.

¹³ A juana dogi nni, Sefela dogi nni, nuganu dogi nni, Benjamen dogi nni, yaa dogi n gaani ki lindi Jerusalemi leni Juda dogi nni kuli, ti yanbidi go baa yaa ye yua coadi ba nuu nni. Mini o Diedo n yedi yeni.»

U Tienu kan guani ki gaa wan niani yaala

¹⁴ O Diedo yedi: «A dana kpendi ke n baa tieni Juda leni Isidayeli yaaba po, min den niani ba yaa ñoanianu yeni.

¹⁵ Li yogunu yaa pundi, n baa teni Davidi n maa bimoanga, yua n ŋua yaa bujiali n tiegi, ki tiendi mi teginma mi diema nni.

¹⁶ Lanyogunu Juda baa baa mi faabima, Jerusalemi mo n yaa pia mi yanduanma. Ban baa yaa yi Jerusalemi maama nne: “O Diedo tie ti teginma.”

¹⁷ O Diedo yedi nanda: ‹Davidi kan luo yua n baa kali ti gbandi po, ki gaa o kaanu Isidayeli yaaba diema nni.

¹⁸ Bi kopadicianba Levi buolu kan luo bi puoliŋuani siiga yaaba n baa gaa bi tuonli, ki yaa juugi a padijuukaana leni a dugibila, ki padi a pada daali kuli, ki gaani bu paabu.› »

¹⁹ O Diedo maadi leni Jeremi ki yedi:

²⁰ «Mini o Diedo yedi ke yi yaa baa fidi ki fidi mini leni u yensiinu leni ku ñiagu ŋantaado, ke li yogunu yaa pundi bi kan go yaa tie ñiagu leni yensiinu,

²¹ Lanwani, mini leni n naacemo Davidi moko yaa ŋantaado baa fidi yene. Lani, Davidi kan go baa yaa biga n baa kali ti gbandi po. Li baa yaa tie yenma leni n naacenba bi kopadicianba Levi buolu, yaaba n tuuni n po.

²² Nani ban kan fidi ki coadi tanpoli ŋmabila maama kelima a yabinu po yeni, bi ki biigi mi ñincianma tanbiima maama yeni, n baa teni n naacemo Davidi puoliŋuani leni bani Levi buolu, yaaba n tuuni n po n pili yene.»

²³ O Diedo go den maadi leni Jeremi, ki yedi:

²⁴ «Naani ŋaa gba bi niba ne n maadi yaa maama? Bi tua: ‹O Diedo n den gandi yaa dieliediti, o ŋaa ti.› Yeni, bi fali n niba, bi yaa po wani, baa go tie nibuolu moko.

²⁵ To, mini o Diedo yedi nanda: ‹Mini yua n kuani o ŋantaado leni u yensiinu leni ku ñiagu, ki bili ki tinga leni tanpoli n baa yaa cuoni maama,

²⁶ naani n baa fidi ki ŋaa Jakob leni n naacemo Davidi puoliŋuani, ki da go gandi bi puoliŋuani siiga yaaba n baa gobidi Abalahama, Isaaka leni Jakob puoliŋuani? N baa teni bi niba yaaba n gedi ti yonbidi n kpeni. N baa gbadi bi po mi ninñima.› »