Jeremi 32 - U TIENU MAAMA TILI 2013

Jeremi daa u kuanu

¹ O Diedo n den maadi Jeremi yaa maama, Juda bado Sedesiasi bali binpiiga binli. Li binli den tie Babilonni bado Nebukanesa mo yaa bali piiga n binniili binle.

² Lanbinle, ke Babilonni bado toagola den gaani ki cebini Jerusalemi. O saawalipualo Jeremi den lo li kpaadidieli luolu yuu n den ye Juda bado diegu nni.

³ Juda bado Sedesiasi den teni ke bi luoni o, ki yedi: «Be yaa po yo ke a pua saawali ki tua: ‹O Diedo yedi: N puni Babilonni bado u naa dogu. O baa diedi u moko.

⁴ Juda bado Sedesiasi kan cia Babilonni yaaba nuu nni. Ama Babilonni bado li baa muubi o bonŋanle. Bi baa kadi leni biyaba nungbaananaa, wan maadi leni o.

⁵ Babilonni bado baa gedini Sedesiasi Babilonni. O baa yaa ye lanpo hali min baa cua ki le o yaa yogunu. O Diedo n maadi leni yi. Yi yaa tieni bu toabu leni Babilonni yaaba, yi kan paadi ba.› »

⁶ Jeremi den yedi ke o Diedo maadi leni o, ki yedi:

⁷ «A yiado Salumi bijua Anameeli baa cua a kani, ki yedi a: ‹Daa n kuanu yuu n ye Anatoti, kelima a pia u sanu ki daa ki diedi u kuanu yeni.› »

⁸ Lanwani, Anameeli n yiado bijua den cua n kani nani o Diedo n den maadi maama yeni li kpaadidieli luolu nni, ki yedi nni: «Daa n kuanu yuu n ye Anatoti Benjamen diema yeni nni, kelima a pia u sanu ki daa u, ki go diedi u moko.» Lanwani, n den bandi ke li tie o Diedo yaa maame.

⁹ N den daa n yiado bijua Anameeli kani yaa kuanu n ye Anatoti, ki biigi u ligi: piiga n kujapienalele.

¹⁰ N den baa li tili ki diani ti ŋantaadi maama, ki baa siedinba ki biigi i ligi yeni kpiagu li bonbiigikaala nni.

¹¹ N go den taa mi kuadima ŋantaaditili yaali n den pia mi maalima bonla, nani lan den bili maama leni yaa tili n den poabidi kuli.

¹² N den taa mi kuadima ŋantaaditili yeni ki teni Neriya bijua Baruki, Maseya bijua, n yiado bijua Anameeli nunbu nni leni siedi yaaba moko n den diani li ŋantaaditili yeni nintuali leni Jufinba yaaba n den ye li kpaadidieli luolu nni kuli nintuali.

¹³ Bikuli nintuali, n den maadi Baruki yaa maama n tie ne:

¹⁴ «Li Miali Diedo U Paaciamu Kuli Daano, Isidayeli Tienu yedi yaa maama n tie ne: ‹Taa mi kuadima ŋantaaditila ne, ya n pia mi maalima leni yaali n poabidi ki kpieni a a tanboba nni, lani n tie ŋan waagi ki ye.› »

¹⁵ Li Miali Diedo U Paaciamu Kuli Daano, Isidayeli Tienu yedi: «Bi go baa yaa daa ti diedi, i kuani leni duven tiidi kuani mi naa diema nni.»

Jeremi jaandi

¹⁶ Min den teni Baruki Neriya bijua mi kuadima ŋantaaditili, n den jaandi ki mia o Diedo, ki yedi:

¹⁷ «Li Miali Diedo U Tienu, fini n tagi tanpoli leni ki tinga, ki doagidi a paalu leni a banma. Liba kuli ki pa a po.

¹⁸ A tiendi mi ŋanma hali nifiima tudili po. Ama bi bidanba tagili panpaani, a teni ke li nandi bi bila yaaba n ŋua bi puoli po. A tie U Tienu yua n yabi, yua yaa yeli n tie Li Miali Diedo U Paaciamu Kuli Daano.

¹⁹ A yanjagili yabi, a bontienkaala mo ki pia lie. A nuni ŋubidi ki nua bi nisaaliba tuada kuli, ki baa pa yuakuli o tuona panpaani.

²⁰ A tieni mi bancianma leni li bonlidinkaala Ejipiti diema nni. Hali dinla, Isidayeli diema nni leni bi niba kani, a yeli ñani dinla nani tin nua maama.

²¹ A tieni yaa bonlidinkaala n pia i jeje, ki doagidi a paalu leni a bancianma, ki ñani a niba Ejipiti diema nni.

²² A puni ba mi naa diema, ŋan den niani ke a baa pa bi baanba yaama, mi naaŋanma leni ti siadi n dua yaa diema nni.

²³ Bi cua ki diedi ma, ama bi naa cengi a maama, baa cuoni nani a bali maama n den bili bi po maama. Baa tieni ŋan den puogi yaala. Lani n teni ke a cuani bi po o naa fala kuli.

²⁴ Yibalinba gaani ki lindi, ki bua ki guli u dogu. Bani Babilonni yaaba, yaaba n fii ki sedi u dogu po yeni, baa diedi u. Bu toabu, mi koma leni u yianbiadipuodiko baa teni ban paadi u dogu yeni. Ŋan den tuodi ki waani yaala tieni, a nua la mo.

²⁵ Ba leni lani kuli, fini o Diedo U Tienu n yedi nni: ‹Baa i ligi ki lingi siedinba, ki daa u kuanu.› Bi luni ki diani u dogu Babilonni yaaba nuu nni.»

O Diedo n guani Jeremi yaala

²⁶ O Diedo den maadi leni Jeremi ki yedi nanda:

²⁷ «N tie Li Miali Diedo, mialifo kuli yaa Tienu. Naani li pia yaala n pa ki pendi n paalu?»

²⁸ Lani n teni ke o Diedo yedi nanda: «N ŋaa u naa dogu Babilonni yaaba leni bi bado Nebukanesa nuu nni. O baa diedi u.

²⁹ Babilonni yaaba, yaaba n baa u dogu ne baa kua u niinni, ki juu u u mu. Bi baa juu ban juugi a dugibila yaa diena po, o bulo Baali po, ki go cabini butoe po, ki biidi n pali.

³⁰ Isidayeli leni Juda yaaba nan li tiendi yaala n ki mani n po hali bi panma nne. Isidayeli yaaba leni bi tuada li biidi n pali bebe. Mini o Diedo n yedi yeni.

³¹ Hali ban maa u naa dogu, u li tie n po pabiidili leni pabienli bonle, hali ki ban tuu dinla. Lani n teni ke n baa paadi leni u.

³² N pali biidi kelima Isidayeli leni Juda yaaba n tieni yaa biadima kuli po. Li biidi n pali, kelima bani, bi badiba, bi koanbala, bi kopadicianba, bi saawalipuaba, Juda yaaba leni Jerusalemi yaaba, n tieni nni yaa biadima po.

³³ Bikuli buli nni ki nunga, ki teni nni bi bunkpana. N bangi ba u yogunu kuli ki naa cedi, ama bi naa gaani bangima.

³⁴ Bi kuani bi cancaginbonla n diegu nni, ban taagi n yeli naani, ki joagini ku.

³⁵ Bi maa i padikaani Baali po Beni-Hinomi joaloangu nni, ki baa yaa padi ki juugi bi bijaba leni bi bisiaba, o bulo Moleki po. Mii den puogi ba ban tieni laa bonla. Mii den baa li yantiali ki baa tieni laa cagindi, ki teni Juda n tieni ti tuonbiadi.»

³⁶ Moala, lani n teni ke o Diedo Isidayeli Tienu maadi nanda u naa dogu, yuu yaa po ke yi tua ke bi ŋaa u Babilonni bado nuu nni, ki teni ke ki jugisiega, mi koma, leni u yianbiadipuodiko n paadi u, ki yedi:

³⁷ «N baa taani ba, min den yadi ba yaa dogi nni kuli, n pabienli, n mutuoli, n pabiidili leni n pali n den boandi bi po yaa yogunu. N baa guani ba nekanba, ki teni ban yaa ye leni mi yanduanma.

³⁸ Bi baa yaa tie n niba, nmo baa yaa tie bi Tienu.

³⁹ N baa pa ba payenli leni yantiayenli, lani n tie ban yaa fangi nni yaa yogunu kuli, bani leni bi puoliŋuani yema manu po.

⁴⁰ N baa kuani leni ba yaa ŋantaado n kan fidi abada. N kan go buli ki ŋaa ba. N baa tieni ba mi ŋanma, n baa kuani n fangili bi pala nni, lani n tie ban da foagidi leni nni.

⁴¹ N pali baa yaa mani bi po, min tieni ba mi ŋanma. N baa kaani ba bonŋanla mi diema nni.»

⁴² O Diedo yedi nanda: «Min tieni maama ki teni ke mi yebiadima ŋmaa bi niba ne yeni, n baa tieni yene ki guani ba min niani ba yaa ŋanma kuli.

⁴³ Bi baa daa i kuani mi naa diema nni, yin tua yaa kaanu n tie: ‹Pabiidili kaanu, niba leni yandi n ki ye naani. Bi ŋaa laa kaanu Babilonni yaaba nuu nne.

⁴⁴ Bi baa daa i kuani yeni leni i ligi, ki diani li tili mi daama yogunu. Bi baa tieni a mi maalima, ki lingi siedinba Benjamen diema nni, Jerusalemi dogu lindima, Juda dogi nni, a juana dogi nni, Sefela dogi nni leni Nuganu dogi nni, kelima n baa teni bi yonbi n kpeni.› Mini o Diedo n yedi yeni.»