Jeremi 31 - U TIENU MAAMA TILI 2013

Isidayeli yaaba, yaaba n ciadi guani ki kpeni

¹ O Diedo yedi: «Li daali kpendi ke n baa yaa tie Isidayeli yaaba kuli Tienu, bimo n yaa tie n niba.»

² O Diedo yedi nanda: «N doagidi n ŋanbili mi fanpienma nni, Yaa niba n sani ki cia ki jugisiega po. Lani yaa po, Isidayeli baa yaa ye Leni mi yanduanma.

³ O Diedo den doagidi nni hali yogu ki yedi: ‹N bua yi yaa buama n ki pia gbenma. Lani n teni ke n baa kubi n ŋanma yi po.

⁴ Yinba n niba Isidayeli yaaba, N baa guani ki mangi yi yema! Yi baa ña leni mu lonmu, Ki taani leni yaaba n jeli ki mangidi bi pala.

⁵ Yi go baa ŋuu i duventiidi Samari juana po. Yaaba n ŋuu i tiidi yeni, N go baa sobidi yi bonluonkaala.› »

⁶ Li daali didi go kpendi, Ke yaaba n guu u dogu baa yedi: «Fii mani tin gedi Siyon o Diedo ti Tienu po.»

⁷ O Diedo yedi nanda: «Yiini mani Jakob po leni li pamanli. Mangi mani yi pala Jakob yua n tugi i nibuoli kuli yuli po. Teni ban gbadi yi niali, yin pagi o ki yedi: ‹O Diedo, faabi a niba Isidayeli yaaba, yaaba n sieni!›

⁸ N baa teni ban ña nujienu diema po. N baa taani ba hali u tinbianu, Bi siiga pia a juama leni a diama, Yaa puoba n punbi leni U maditugukoanu danba kuli. Li tie nitaancianli n lebidi ki guani nekanba.

⁹ Bi kpendi ki mua yo. N cangi ba leni i baagi Ki gobidi ba yaa ñima n puubi po. Bi ŋua sanyendu, Ban kan tuudi naankani. N tie Isidayeli yaaba po nani bibaa yeni. N bijakpelo mo n tie Efrayimi.»

¹⁰ I nibuoli, cengi mani o Diedo maama, Ki yadi laa maama hali a kpendega Ya ye foagima po: «Yedi mani ke yua n den yadi Isidayeli yaaba, Baa guani ki taani ba ki kubi ba, Nani o yankpaalo n kubi o yankulu maama yeni.

¹¹ O Diedo baa faabi Isidayeli yaaba, O baa daa ki faabi ba, Yua n pa ki cie ba nuu nni.

¹² Bi baa cua Siyon juali kani, Ki yiini leni li pamanli, Kelima o Diedo n baa pa yaa piama po. Mani n tie: ŋalikama, Mi dapanma, mi kpama, Ti yanbidi leni a yangbenga. Bi baa yaa tie nani ban kpidi yaa salidingo yeni. Jawaandi kan go cuo ba.

¹³ Lanwani, bi jafanba baa jeli ki mangi bi pala, Bani leni bi jawaaba leni a jakpela kuli. N baa teni bi paboanli n tua pamanli. N baa baagi ba. Bi falabiado yeni puoli po, N baa teni bi pala n mangi.

¹⁴ N baa guoni bi kopadicianba leni mi yankpama. N niba baa baa n piama lan dagidi ba. Mini o Diedo n yedi yeni.»

¹⁵ O Diedo maadi mi naa maama: «A bubula leni i moeciami fii ki loli Rama dogu nni. Raseli n mua o bijaba po, Ki yie ke o kan gaa baagi, Kelima o bijaba ki go ye.

¹⁶ O Diedo yedi nanda: ‹Da mua, duuni ki ñani a nunsiidi Kelima a tuona baa baa i panpaani. Mini o Diedo n yedi yeni. A bila baa ña bi yibalinba denpo ki kpeni.

¹⁷ Mi suginma ye a po saala po, Kelima a bijaba baa ti faa ki guani bi diema nni.› Mini o Diedo n yedi yeni.

¹⁸ N gba ke Efrayimi yaaba kaliti ki tua: ‹A faligi ti, ti laa fala Nani yaa naabiga n ki pia maanli yeni. Teni tin guani, ti baa guani Kelima Li Miali Diedo, fini n tie ti Tienu.

¹⁹ Ti den yaadi, ama ti biidi ti pala ki mia sugili. A teni ke ti bandi ti tagili ki pua ti bena, I fe pia ti kelima tin den tieni yaala ti panma nni po.›

²⁰ Efrayimi tie n bibuadiga, Wani n tie n bigbabili. N kan fidi ki kan tiadi o po, Kelima n bua o. Mi ninñima pia nni o po. N li bua o moamoane. Mini o Diedo n yedi yeni.

²¹ Sieni, sieni mi maalima a sanu nni, Ki faami ŋan cuoni yaa sanu nni bonŋanla. Guani mani ne yinba Isidayeli yaaba. Guani mani yin die yaa dogi yeni nni.

²² Hali u laa yogu yo ke yi baa waagi, Ki puagi yinba a biyenyieda? O Diedo cuani li boncanla ki tinga nni: Lani n tie ke o pua baa jiadi o joa.»

Mi guaniŋanbima leni o ŋantaadipaano

²³ Li Miali Diedo U Paaciamu Kuli Daano, Isidayeli Tienu maadi yaa maama n tie ne: «Diidi mani ban go baa yedi yaala Juda diema leni mi dogi, min baa teni bi yonbi n guani ki kpeni yaa yogunu: ‹Fini mi teginma diegu, mi gagidiŋanma juali, o Diedo n seligi a!›

²⁴ Lankane ke Juda leni o dogi yaaba kuli baa taani ki cua ki kali, bi kpakpaaba, bi yankpaaba leni bi yangola kuli.

²⁵ N baa paagi yaaba n coagi pala, ki pugini yaaba n tadigi mo u fidu.

²⁶ Min den fundi yaa yogunu, n den sua ke n guama mangi n po.»

²⁷ O Diedo yedi: «A dana kpendi, ke n baa teni Isidayeli leni Juda diema nni, bi niba leni ti yandi n tua nani li bonbulikaala yeni.

²⁸ Nani min den ŋabi ba, ki pua ki luni ba, ki bolini ba, ki kpa ba, ki go tieni ba yaala n bia maama yeni, n go baa fiini ba ki ŋanbi bi yema yene. Mini o Diedo n yedi yeni.

²⁹ Laa dana nni, bi kan go yedi: ‹Bibaanba ŋmani a cabikaana Ke a bila ñina gaabi.›

³⁰ Ama yuakuli baa kpe o tuonbiadi nne. Yaa nilo n ŋmani a cabikaana yeni, o yaa ñina n baa gaabi.»

³¹ O Diedo yedi: «U yogunu kpendi, ke n baa kuani yaa ŋantaado n paani, Isidayeli leni Juda buolu.

³² Li kan yaa tie nani min den kuani yaa ŋantaado leni bi yaajanba, min den mubini bi nii, ki dadi ki ñani ba Ejipiti diema nni yaa daali ka. Ba ke n tie bi canbaa, bi den fidi laa ŋantaado. Mini o Diedo n yedi yeni.»

³³ Mini o Diedo yedi: «Diidi min baa kuani yaa ŋantaado leni Isidayeli diema yaaba. Laa dana yaa pendi, n baa kuani n bali maama bi yantiana nni, ki diani ma bi pala nni. N baa yaa tie bi Tienu, bani mo baa yaa tie n niba.

³⁴ Oba kan go bangi oyua. Oba kan go yedi o kpiilo: ‹Bandi mani o Diedo!› Bikuli baa yaa bani nni, ki cili yua n wa bi siiga, ki ban taani o nikpelo. Mini o Diedo n yedi yeni. N baa tieni sugili bi tagili po. N kan go tiadi bi tuonbiadi po.»

³⁵ O Diedo yedi nanda: «Ŋme n teni ke u yienu ye, Ki yendi u yensiinu, Ki teni ke o ŋmaalo leni a ŋmabila Mo yendi ku ñiagu? Ŋme n yen fiini mi ñincianma ñingola ŋan yaa mua mi jama? O yeli yi Li Miali Diedo U Paaciamu Kuli Daano.

³⁶ Yaa daali laa bonla lebidi, Landaale ke Isidayeli puoliŋuanu moko Kan go yaa tie n buolu. Mini o Diedo n yedi yeni.

³⁷ O Diedo maadi yaa maama n tie ne: Li yaa tie ke tanpoli tawadi pia mi biigima, Li yaa tie ke ki tinga tanpuuli pia mi bandi-gbenma, Lanwani, n baa ña Isidayeli puoliŋuanu maama nni cain, Kelima ban tieni yaala yaa po. Mini o Diedo n yedi yeni.»

³⁸ O Diedo yedi: «A dana kpendi ke bi baa guani ki maa Jerusalemi dogu mini o Diedo po, ki cili Ananeeli diefoagili kani, ki yaa caa hali mi logidima buliñoabu.

³⁹ Bi baa guani ki biigi u dogu banlu nintuali po yo ki yaa goa Galebi juaga po, ki yuandi ki pegidi ki noanli Goati po.

⁴⁰ Bi baa biigi bi tinkpiba leni mi fantanpienma joaloangu, ki taani leni yaa fanma n bili ki ban pundi hali Sediron joaloangu, ki ban tuu i taami buliñoabu nujienu po. Bi baa taa likuli ki gagidi ki ŋanbi o Diedo po. Bi kan go tudi ki lu la, ki buali ban bolini la.»