Jeremi 30 - U TIENU MAAMA TILI 2013

I ñoaniani leni mi guaniŋanbima 30—33 U Tienu ñoaniani Isidayeli diema po

¹ O Diedo den maadi leni Jeremi yaa maama n tie ne:

² «Mini o Diedo Isidayeli Tienu n puogi a ŋan diani li tili nni, min yedi a yaa maama kuli.

³ A dana kpendi, mini o Diedo n yedi ke n baa teni n niba Isidayeli leni Juda yaaba, yaaba n den ye ti yonbidi yeni n guani min den puni bi baanba yaa diema nni. N baa teni ban guani ki diedi ma.» Mini o Diedo n yedi yeni.

⁴ Diidi mani o Diedo n maadi yaa maama Isidayeli leni Juda po.

⁵ Wani o Diedo yedi nanda: «Min gba yaa fuugu yeni naa tie yanduanma fuugu ka. Li tie jawaanciandi yaa fuugu yo.

⁶ Buali mani yiyaba bonŋanla, Ŋme n kpa laa o joa n gbaani ki mali naani? Be yaa po yo, ke n nan nua ke bi jaba kuli Ñii bi ciamu nani yaa pua n baa maa yeni? Be yaa po yo, ke mu nunmu kuli gbidi?

⁷ O naa fala mo te! Li naa daali tie dacianle. Daaliba kuli ki naani leni li. Li tie Jakob puoliŋuani po paboanli daale. Ama bi baa baa gaapo.»

⁸ Li Miali Diedo U Paaciamu Kuli Daano yedi: «Landaali, n baa mudi Nebukanesa n lani bi tuli nni yaa landili yeni. N baa dadi ki ŋabi ban loli ba leni yaala. Canba kan go diedi ba.

⁹ Bi baa yaa tuuni o Diedo bi Tienu leni bi bado Davidi, min kaani yua ti gbandi po.

¹⁰ Fini n naacemo Jakob, Da jie liba, o Diedo n yedi yeni. Isidayeli, da digibi ba! Diidi n baa faabi a ki tinga nni Leni a puoliŋuani n ye ti yonbidi yaa diema nni. Jakob baa guani ki mangi o pali Mi fuodima po leni mi yanduanma po. Oba kuli kan go cua ki lengi o yama.

¹¹ N ye leni a ki baa faabi a. N baa bolini i nibuoli kuli, Min yadi yadi a naani kuli. Ama n kan bolini fini wani. N baa faligi a nani lan pundi maama, N kan bi fidi ki ŋaa ŋa, Nani yua n ki pia tagiliba yeni.»

¹² O Diedo maadi mine: «A yebiadima ki pia lebidima, A nali mo ki pia ñoagu.

¹³ Oba kuli ki mua a po, Ki baa fini a po a nali. Yaa ñoagu n baa todi a mo ki ye.

¹⁴ A jaconcona kuli sundi a po, Baa go lingi a. N faligi a nani n yibali yeni. N waani a o falaciamo, Kelima a tagili yabinu po Leni a tuonbiadi biadima po.

¹⁵ Be yaa po yo ke a kaliti Yaa bonla n biidi kuli po Leni a tonu yuu n ki pia ñoagu po? Li tie ke a tagili n kandi po yo, A tuonbiadi biadima po yo, Ke n tieni a laa bonla.

¹⁶ Lani n teni ke yaaba n dini a, Bi baa je ba. A yibalinba kuli baa gedi ti yonbidi. Yaaba n den su ŋa, bi baa su ba. Yaaba n kpendi ki fagi a. Bi baa fagi bimoko.

¹⁷ Nani ban tua ke ŋaa pia fuomiba kuli, Ke oba kuli mo ki yagini o yama a po yeni, Lani yaa po, nmo baa paagi a leni a poagilima, Ki teni a nala n gbeni. Mini o Diedo n yedi yeni.»

¹⁸ O Diedo maadi mine: «N guani ki kpeninni Jakob puoliŋuani Yaaba n den ye ti yonbidi, Ki juogi a diedi yaaba. Bi baa guani ki maa u dogu, A diegbenbuokpela nni. Ki maa badidiegu ku kaankpelu nni.

¹⁹ Bi siiga nni i pamandanyani Leni i yigimi baa fii ki loli. N baa teni ban pugini boncianla, Bi kan go wadi. N baa kpiagi ba, bi kan go le yualu.

²⁰ O bijaba baa guani ki tua Nani kpiama yeni. O niba kuli baa yaa se n nintuali ke li pa. N baa fii ki sedi yaaba n wangi a fala kuli po.

²¹ Bi bado baa ña bi yaa siige, Bi gobidika moko baa ti ña lani nne. N baa teni wan cua n kani. Ŋme n baa ñigini ki cua n kani? Mini o Diedo n yedi yeni.

²² Yi baa tua n niba, nmo n tua yi Tienu.

²³ Ku tafaaciangu fii, Yaagu n tie o Diedo pabiencianli, Yaali n baandi nani ki tacianga, Ki baa pua bi nibiadiba.

²⁴ O Diedo pabiencianli kan pegidi ki teli poto, Hali wan baa tieni o pali nni wan jagi yaala. Li daali kpendi ke yi baa bandi Lan bua ki yedi yaala.»