Jeremi 3 - U TIENU MAAMA TILI 2013

Yaa puoconconli yaa nuni n pa

¹ O Diedo yedi: «O joa yaa ñani o pua, Ke o ñani o kani ki ban kuni jatoa, Naani laa joa go baa guani ki taa o pua yeni? O yaa guani taa o mo, Laa diema kan joagini cain te? Amo conbi leni a jaconcona boncianla, Ki nan go bua ki guani n kani. Mini o Diedo n yedi ke li kan tuo.

² Yaadi ki noanli a juana yula po, Naani a pia ŋan kaa cagini a yuli naani? A den kaa i sani nne ki guu a jaconcona, Nani Arabi nilo yua n ye mi fanpienma nni yeni. A joagini mi diema Leni a yanluoma leni a conconma.

³ Lani n teni ke n yie ke n kaa puuni a taaga. N yie a po ki tajuodikaaga. Ama ba leni lani kuli a baa ki se mi conconma sanu nne. Ŋaa ban jie ba fe.»

⁴ Lanwani, ŋan da go yini nni: «N Baa!» Ki da go yedi mo: «Fini n tie n bonwaama nni nidugika.»

⁵ Naani o pali baa waagi ki be? Naani o cili kan jiidi abada? A yen maadi yene ki tiendi yaala n bia. A den pia li paalu mo.

Isidayeli puagi, Juda mo conbi

⁶ O Diedo den yedi nni o bado Josiasi yogunu: «Naani a laa Isidayeli o yenyiedo n tieni yaala? O fii ki gedi yaa juana n kpedi kuli po leni yaa tiidi n bundi kuli tinga ki cagini o yuli.

⁷ N den yedi n yuli: ‹O yaa ban tieni laa bonla kuli ki gbeni, o baa guani n kani. Ama o naa guani. O naataanpuoga Juda yua n tie i janbi daano yeni laa laa bonla.›

⁸ Ba ke n ñani Isidayeli o yenyiedo kelima o conconma po, ki teni o o puoñatili, n laa ke ba leni lani kuli o naataanpuoga Juda i janbi daano naa baa fangili lipo. Omoko gedi ki ban cagini o yuli.

⁹ O cancagintuada ya n ki wuo joagini mi diema. O cagini o yuli ki pugi ti daadi leni a tana.

¹⁰ Ba leni lani kuli, o naataanpuoga Juda i janbi daano naa guani n kani leni o pali kuli, se faama bebe. O Diedo n yedi yeni.»

¹¹ O Diedo den yedi nni: «Isidayeli o yenyiedo, tiegi ki cie Juda i janbi daano.

¹² Gedi ki ban kpaani nujienu po, ki yedi: Isidayeli o yenyiedo, o Diedo yedi mi naa maama: ‹N kan go yaa pia a po nunbiadiga, Kelima n yama dingi. O Diedo n yedi yeni. N pali mo kan go waagi ki be a po yogunu kuli.

¹³ Ŋan li tuo a tagili bebe, Kelima a yiema kuli Taa ki sedi o Diedo a Tienu po yo. A den ŋoadi bi nilanba buli, Ki ban conbi yaa tibu n bundi kuli yaa tinga, Ki naa den cengi n nialu mo. O Diedo n yedi yeni.›

¹⁴ Guani mani ne, Yinba a biyenyieda yeni, O Diedo n yedi yeni. Mini n tie yi canbaa, N baa gandi niyendo u naa dogu nni, Nibilie mo, u naa buolu nni, Ki guani yi Siyon po.

¹⁵ N baa pa yi min bua yaa yankpaaba, Ban yaa kpaa yi leni mi yanfuoma.

¹⁶ Yi yaa pili ki gbieni mi diema yaa yogunu, Lanyogunu bi kan go yaa maadi O Diedo ŋantaadikpaku maama. Bi kan go tiadi ku po, Oba kuli kan go maadi ba ku maama. Bi kan go faami ku kaayema po, Bi kan go tieni bontoagu mo. O Diedo n yedi yeni.

¹⁷ Lanyogunu bi baa yaa yi Jerusalemi, “O Diedo bali kalikaanu.” I nilanbuoli kuli baa sani Ki cua Jerusalemi dogu yeni niinni, O Diedo yeli nni. Bi kan go baa ki ŋua bi pajuaga sanyuogidi.

¹⁸ Laa dana yaa niinni, Juda leni Isidayeli diema yaaba Baa taani ki yegi ki ña nujienu diema po, Ki kpeni min puni yi baanba Yaa diema, man tua bi faali yeni nii nni.»

Ki biyenyiediga guakpenma

¹⁹ N den yedi n yuli: «N sugini hali bonŋanla fine n tua N bijaba kuli liiga yua. N baa pa ŋa yaa diema n mani hali boncianla, Yaa tinga n ŋani ki cie mu tinmu kuli.» N den tama ke a baa yini nni: «N baa!» Ki kan go buli nni a nunga mo.

²⁰ Yeni de! Nani o pua n yen janbi o calo maama yeni, Yinba Isidayeli buolu moko janbi nni yene. Mini o Diedo n yedi yeni.

²¹ I moe fii ki loli i kaani kuli, Isidayeli yaaba n mua ki miadi, Kelima bi biidi bi sanu, Ki sundi o Diedo bi Tienu po.

²² Guani mani n kani, Yinba a biyenyieda yeni. N baa paagi yi leni yi yenyiema. Lani, yi baa yedi: «Tinba nne! Ti tie a yaabe. Yeni de! Fini n tie Li Miali Diedo ti Tienu.»

²³ Moamoani, yaala n ñani a joabila nni kuli tie faama bebe. Tin gba a joaciama po yaala kuli tie lanbu bebe. Yeni de! O Diedo ti Tienu yaa kane Ke Isidayeli yaaba faabima ye.

²⁴ Hali ti bonwaama nni, O cancaginbulo Baali ŋoadima pia i fe. Li dini ti baanba n den duoli ki baa yaala, Bi yangbenga leni bi yanbidi, Ki taani bijaba leni bi bisiaba kuli.

²⁵ Ti fe n tie ti duankaadi, Ti jigidima mo n tie ti kpalipinkaadi, Kelima tinba leni ti baanba, Ti tieni ti tuonbiadi o Diedo ti Tienu po. Ti panma yogunu ki ban pundi hali dinla, Tii cengi o Diedo ti Tienu yedima.