Jeremi 29 - U TIENU MAAMA TILI 2013

Jeremi diani li tili yaaba n ye ti yonbidi po

¹ Diidi mani o saawalipualo Jeremi n den ye Jerusalemi, ki diani yaa tili ban den gedini yaa nikpela ti yonbidi, bani bi kopadicianba, bi saawalipuaba leni Nebukanesa n den ñani yaa niba Jerusalemi kuli, ki gedini Babilonni diema nni.

² Li yogunu den sua ke o bado Yekonia, o bado naa, badidiegu tuonsoanba, o bado koanbala Juda leni Jerusalemi yaaba, a tuonsoanbanda leni a buliñoaguuda kuli ñani Jerusalemi.

³ Bi den teni li tili yeni Safani bijua Eleasa leni Gemalia Hilikiya bijua Juda bado Sedesiasi n den soani yaaba Babilonni diema nni, o bado Nebukanesa kani. Li tili yeni den yedi:

⁴ «Li Miali Diedo U Paaciamu Kuli Daano, Isidayeli Tienu yedi daa: ‹Min ñani yinba yaaba Jerusalemi ki gedini ti yonbidi Babilonni,

⁵ maa mani ti diedi ki yaa ye ti niinni. Ŋuu mani ti kpintiidi ki je li bonluonkaala.

⁶ Taa mani bi puoba ki maa a bonjala leni a bonpola. Taa mani bi puoba yi bijaba po, ki pa yi bisiaba bi jaba. Lani n tie ban maa a bonjala leni a bonpola. Yaa maa ki pugidi mani bonŋanla yin ye naankani, da wadi mani.

⁷ Lingi mani yin ye yaa dogu nni ti yonbidi yanduanma. Jaandi mani o Diedo u dogu yeni ŋamu po, kelima u yaa pia mi yanduanma yo, ke yimoko baa yaa ye leni mi yanduanma.› »

⁸ Li Miali Diedo U Paaciamu Kuli Daano, Isidayeli Tienu yedi: «Yin da teni yi saawalipuaba yaaba n kaa yi siiga n boandi yi. Yin da teni yi baayuadiida moko n boandi yi. Yin da tama ke yi dangidi bua ki bundi liba kuli,

⁹ kelima ban pua yaa saawalo n yeli nni yeni tie faame. Mii soani ba. Mini o Diedo n yedi yeni.»

¹⁰ Ama mini o Diedo yedi: «Babilonni diedima yaa tuoni bina piilele, n baa cua ki todi yi, ki kuani yi po min den niani yi yaa ñoanianu. N baa ñani yi Babilonni ki guani yi Jerusalemi.

¹¹ Mini o Diedo yedi: N bani min jagi yi po yaala. N jagi yi po yaala n ŋani. Mii jagi yi po yaala n bia ka, n baa pa yi yin sugini yaala, ke li baa fuoni yi saala po.

¹² Lanwani, yi yaa cua ki yini nni ki mia nni, n baa cengi yi miabu.

¹³ Yi baa lingi nni ki le nni, kelima yi baa lingi nni leni yi pala kuli.

¹⁴ N baa teni yin le nni. Mini o Diedo n yedi yeni. N baa teni yi yonbi n guani ki kpeni. N baa ñani yi min den gedini yi ti yonbidi yaa diema nni leni yin den yadi yadi ki ye yaa nibuolu leni yaa kaani kuli nni. N baa taani yi, ki go kpeninni yi, min den deli ki ñani yi naani.» Mini o Diedo n yedi yeni.

¹⁵ Ama yimo nan kpaagi ki tua ke o Diedo baa tipo bi saawalipuaba Babilonni diema nni.

¹⁶ O Diedo maadi mi naa maama leni yaa bado n kaa Davidi bali gbandi po, bi niba yaaba n kaa u naa dogu nni leni yi kpiiba yaaba n ki gedi ti yonbidi.

¹⁷ Li Miali Diedo U Paaciamu Kuli Daano yedi nanda: «N baa cuani bi siiga bu toabu leni mi koma, ki teni ban yaa naani leni yaa kankanbedima n ki go pia ŋmanma, kelima ŋan bedi maama po.

¹⁸ N baa ŋoadi ki deli ba leni bu toabu, mi koma leni u yianbiadipuodiko. N baa teni ban tua ti jawaanciandi bonla ki tinga diema nibuoli po, ti solindi, ti yanyagidi, ti laadi, li ñuali leni u yualu bonla, min baa yadi yi yaa nibuoli kuli siiga.

¹⁹ O Diedo yedi: baa cengi n maama, ki nan sua ke n lindi ki tuuni n naacenba bi saawalipuaba, ba leni lani kuli baa cengi. O Diedo n yedi yeni.»

²⁰ Ama yinba, min ñani yaa yonbi Jerusalemi ki gedini Babilonni, cengi mani o Diedo maama!

²¹ Li Miali Diedo U Paaciamu Kuli Daano, Isidayeli Tienu maadi Kolaya bijua Akabi leni Maaseya bijua Sedesiasi, yaaba n pua mi saawalifaama n yeli nni: «N baa lu ba Babilonni bado Nebukanesa nuu nni. Bi baa pua ki kpa ba yi nunbu nni.

²² Ban den gedini Juda yaaba, yaaba ti yonbidi Babilonni diema po yeni kuli, baa yaa taagi laa niliediba yaa yela yo, ki solini ki tua: ‹O Diedo n soani a nani Sedesiasi leni Akabi, Babilonni bado n den taa yaaba ki ŋoabini u mu po yeni!›

²³ Bi tieni ti cagindi Isidayeli diema nni, ki ban conbi leni bi lieba puoba, ki pua mi faama n yeli nni, yaa yogunu ke n naa den puogi ba liba. N bani la, mini n go tie li siedo mo. Mini o Diedo n yedi yeni.»

Semaya n diani yaa tili

^24-25 Li Miali Diedo U Paaciamu Kuli Daano, Isidayeli Tienu den puogi o saawalipualo Jeremi, ke wan yedi Semaya Nehelam yua: «A yeli po, a soani Jerusalemi niba kuli po, o kopadiciamo Maaseya Sofoni bijua leni bi kopadicianba kuli po, a tila ya n yedi:

²⁶ ‹O Diedo gandi a, ke ŋan gaa Yeoyada kaanu ki tua kopadiciamo, ki yaa guu o Diedo diegu, ki yaa diidi yua yini o yuli saawalipualo ki wolini, ki cuo ki kpaa o ti kpaadi, ki go lani o li landili.›

²⁷ Moala, li gaa lede ke a cedi Jeremi Anatoti dogu yua, yua yedi ke o tie saawalipualo yi siiga?

²⁸ O soani ke bi yedi ti Babilonni po: ‹Yi baa waagi lipo! Maa mani yi diena ki yaa ye a niinni! Ŋuu mani yi kpintiidi ki ŋmani li bonluonkaala!› »

²⁹ O kopadiciamo Sofoni den cogi li tili o saawalipualo Jeremi kani.

³⁰ O Diedo den maadi leni Jeremi, ki yedi:

³¹ «Soani ban yedi ban gedini yaaba ti yonbidi kuli, ke o Diedo yedi Semaya Nehelam yua po line: ‹Nani wan pua yi po saawali ke n naa soani o yeni, ki teni ke yi dugi yaala n ki pia yi po todima yeni,› »

³² o Diedo n yedi yaama nne: «N baa fii ki sedi Semaya Nehelam yua po leni o puoliŋuani kuli po. Bi siiga oba kuli kan yaa ye bi naa niba nni, oba kuli kan le min baa tieni n niba po yaa ŋanma, kelima o maama tie mi yiema o Diedo po. O Diedo n yedi yeni.»