Jeremi 28 - U TIENU MAAMA TILI 2013

Jeremi leni o saawalipualo Anania

¹ Laa binli, Juda bado Sedesiasi bali binnaali cimuulo nni, Asuri bijua Anania Gabaon saawalipualo, den sedi o Diedo diegu nni bi kopadicianba leni li nitaanli nintuali, ki yedi nni:

² «Li Miali Diedo U Paaciamu Kuli Daano, Isidayeli Tienu yedi nanda: ‹N mudi Babilonni bado paalu!

³ Ne leni binalie, n baa teni ban guani o Diedo diegu tiadi nekanba, Babilonni bado Nebukanesa n den ñani yaadi, ki gedini Babilonni diema nni yeni kuli.

⁴ O Diedo n yedi ke o go baa guani nekanba Joakimi bijua Yekonia Juda bado leni ban gedini yaaba Babilonni, kelima n baa mudi Babilonni bado paalu.› »

⁵ O saawalipualo Jeremi den guani o saawalipualo Anania, bi kopadicianba leni li nitaanli kuli nintuali, bani yaaba n den ye o Diedo diegu nni,

⁶ ki yedi o: «Amina, o Diedo n tieni yeni! U Tienu n gaa a ñoabu nni, ki teni o Diedo diegu nni tiadi n guani, ki go teni yaaba n ye Babilonni ti yonbidi n guani ki kpeni.

⁷ Ama min mia ŋa yaala bebe n tie ŋan cengi min maadi a po leni bi niba kuli po yaa maama.

⁸ Li baa yaa saawalipuaba n liidi mini leni fini hali yaa yogu, ki den pua saawali ke bu toabu, mi yebiadima leni u yianbiadipuodiko baa baa diema boncianla.

⁹ Ama o saawalipualo yaa pua saawali, ki yedi ke mi yanduanma baa yaa ye, wan yedi yaala yaa tiene ke bi baa bandi ke o Diedo n soani o i moamoani.»

¹⁰ Lanwani, o saawalipualo Anania den landi o saawalipualo Jeremi tulu nni, wan den la yaa landili, ki mabi ki mudi,

¹¹ ki yedi bi niba kuli nintuali: «O Diedo yedi nanda: ‹Diidi min baa mudi Babilonni bado Nebukanesa paalu maama n yeni, i nibuoli kuli po, ne leni binalie siiga.› » Li yaa puoli, o saawalipualo Jeremi mo den taa o sanu ki ban caa.

¹² O saawalipualo Anania n den landi o saawalipualo Jeremi n la yaala, ki mabi ki mudi yaa yogunu, o Diedo den maadi leni Jeremi, ki yedi:

¹³ «Gedi ki ban yedi Anania: o Diedo yedi ke a baa fidi ki mudi yaa landili n tie daadi. Fini Jeremi, lingi ti kudi landili ki tieni ti daadi kaanu.

¹⁴ Li Miali Diedo, U Paaciamu Kuli Daano, Isidayeli Tienu yedi nanda: ‹N baa lani i nibuoli kuli yaa landili n tie kudi, ki teni ban soani Nebukanesa Babilonni bado po. Bi baa soani o po mo. N go puni wane ba ku muagu nni yandi moko.› »

¹⁵ O saawalipualo Jeremi den yedi o saawalipualo Anania: «Cengi Anania! O Diedo naa soani a, ke a nan pia bi naa niba ki boandi ki puuni ba li papaali.

¹⁶ Lani n teni ke o Diedo yedi mi naa maama: ‹N baa deli ki ñani a mi diema nni. Dunla a baa kpe, kelima a maama tie yiema o Diedo po.› »

¹⁷ Laa binli cileleelo nni, o saawalipualo Anania den kpe.