Jeremi 27 - U TIENU MAAMA TILI 2013

Jeremi bugi li tugili o boacaba po

¹ Josiasi bijua Sedesiasi, Juda bado n den dini li bali yaa yogunu, o Diedo den maadi leni Jeremi mi naa maama:

² «O Diedo maadi leni nni mine: Ŋan figi i baabi, ki lingi a landa ki la a tulu nni.

³ Taa laa bonla ki soani Edomi, Moabi leni Anmoni buoli yaaba, Tiiri leni Sidon badiba po. Ŋan teni u tondu n gedi leni yaaba n cua Jerusalemi Juda bado Sedesiasi kani.

⁴ Ŋan go soani n ñoamabonbilikaana bi canbaanba po, ki yedi: Li Miali Diedo U Paaciamu Kuli Daano, Isidayeli Tienu yedi: Ban yedi mani yi canbaanba,

⁵ ke mini n tagi ki tinga, bi niba leni ti yandi yaadi n ye ki tinga nni leni n paalu leni n banma. N baa pa ki tinga min bua yua.

⁶ Moala, mini n puni laa diema buoli kuli n naacemo Babilonni bado Nebukanesa, ki go puni o ku muagu nni yandi tin yaa tuuni o po.

⁷ I nibuoli kuli baa soani o po, o bijua po, o yaabili po, hali yaa yogunu ke yaa nibuoli n pa leni yaa badiba n pa ki cie o mo baa cua ki diedi o diema.

⁸ Yaa nibuolu bi yaa diema n yie ki kan soani Babilonni bado Nebukanesa po, ki yie ki kan teni o tulu Babilonni bado n lani o li landili, n baa fii ki sedi laa diema po leni ki jugisiega, mi koma leni u yianbiadipuodiko, hali ki ban bolini mi diema yeni leni o nuu. Mini o Diedo n yedi yeni.

⁹ Yinba, da cengi mani yi saawalipuaba, yi lingida, yi dangidi, yi baayuadiida, yi ñoagidanba, bani yaaba kuli n tua yi: ‹Yin da soani Babilonni bado po!

¹⁰ Bi pua yi saawalifaama, ki bua yin foagidi leni mi diema, ke min ña yi maama nni, yin bodi.›

¹¹ O Diedo yedi ke yaa nibuolu n baa teni u tulu Babilonni bado ti yonbidi po, ki baa soani o po, n baa pa u mi fuodima o diema nni. Lani n tie li diema niba n ko bu kpaabu, ki go kali mi diema nni. O Diedo n yedi yeni.

¹² N maadi leni Juda bado Sedesiasi moko laa maame, ki yedi: ‹Tandi mani yi tuli Babilonni bado n lani yi li yonbilandili. Soani mani wani leni o niba po, lani n tie yin yaa ye.

¹³ Be yaa po yo ke yi baa teni bu toabu, mi koma leni u yianbiadipuodiko n kpa yi nani o Diedo n bili maama yaa nibuolu n yie ke u kan soani Babilonni bado po?›

¹⁴ Yin da cengi yaa saawalipuaba n tua yi: ‹Yin da soani Babilonni bado po!› Ban pua yi yaa saawalo yeni tie faame.

¹⁵ Mini o Diedo ki soani ba, ke bi nan pua saawalifaama n yeli nni, ki bua min ña yi maama nni, ki bolini yi, yinba leni yaa saawalipuaba n pua yi po laa saawalibuoli kuli.»

¹⁶ N maadi leni bi kopadicianba leni li nitaanli kuli, ki waani ke o Diedo yedi: «Yin da cengi mani yi saawalipuaba yaaba n tua yi: ‹Moala ke bi guani ban den taa yaa tiadi o Diedo diegu nni, ki gedini Babilonni,› kelima ban pua yi yaa saawalo kuli tie faame.

¹⁷ Da cengi ba mani! Soani mani Babilonni bado po. Lani n tie yin yaa ye. Yi baa gaa lede ki teni u dogu ne n kpandi ki tua diegbena?»

¹⁸ Jeremi go den pugini ki yedi: «Bi yaa tie saawalipuaba moamoani, ke o Diedo n maadi leni ba, ban jaandi o Diedo U Paaciamu Kuli Daano ki mia o, wan teni yaa tiadi n sieni o Diedo diegu nni, Juda bado diegu nni leni Jerusalemi nni, n da gedi Babilonni!

¹⁹ Diidi mani o Diedo n go yedi yaala, yaala n tie a bunbuna, ti kumoandi tadiciangu, ti ñingaandi leni yaa tiadi n sieni u naa dogu nni,

²⁰ Babilonni bado Nebukanesa n ki den taa yaala, wan den gedini Joakimi bijua Juda bado Yekonia, o cancantieba leni Jerusalemi yaaba kuli ti yonbidi yaa yogunu Babilonni po.

²¹ Li Miali Diedo U Paaciamu Kuli Daano, Isidayeli Tienu n yedi yaa maama nne, yaala n tie yaa tiadi n sieni o Diedo diegu nni, Juda bado diegu nni leni Jerusalemi nni po:

²² ‹Bi baa gedini tikuli Babilonni, tin ban yaa ye lipo, hali yaa yogunu ke n baa mua ti po mi jama. O Diedo n yedi yeni. N baa gobidi ki guani ki kpeninni ti nekanba, yaa kaanu n tie ne.› » Lani n tie o Diedo n yedi yaala.