Jeremi 26 - U TIENU MAAMA TILI 2013

Bi jagi ki baa kpa Jeremi

¹ Joakimi, Josiasi bijua Juda bado n dini li bali yaa yogunu, o Diedo den maadi leni Jeremi yaa maama n tie ne, ki yedi:

² «Mini o Diedo maadi yaa maama n tie ne: Sedi o Diedo diegu luolu po, ki maadi leni yaaba n ña Juda dogi kuli, ki baa gbaani ki pugi o Diedo diegu nni. Ŋan waani ba min puogi a ŋan yedi yaa maama kuli, ki da foadi ba mayenma.

³ Daalinba bi baa cengi, yuakuli n ŋaa o sanjagimu. Yeni, n baa lebidi min jagi ke n baa tieni ba yaa bonbiadila, kelima bi tuongunda po.

⁴ Ŋan yedi ba ke o Diedo maadi yaa maama n tie ne: ‹Yi yàá cengi n maama, ki baa tieni min bili yaa bali maama yi nintuali,

⁵ yi yàá diadi yi tuba ki baa cengi n naacenba bi saawalipuaba maama, min soani yi po yaaba, kelima n tuuni ba yi kani yogunu kuli ki naa cedi, ama yi naa cengi ba.

⁶ Lanwani, n baa soani ku naa diegu nani min soani Silo yaa tuonli yeni. N baa teni ku naa diegu n tua ti solindi bonla ki tinga nibuoli kuli po.› »

⁷ Bi kopadicianba, bi saawalipuaba leni bi niba kuli den gbadi Jeremi n maadi yaa maama o Diedo diegu nni.

⁸ Jeremi n den maadi ki gbeni o Diedo n den soani o wan yedi yaala li nitaanli yaa yogunu, bi kopadicianba, bi saawalipuaba leni li nitaanli kuli den cuo o, ki yedi o: «A maadi a miali gbenma maama n yeni!

⁹ Be yaa po yo ke a pua saawali o Diedo yeli nni, ki tua: ‹ku naa diegu baa tua nani Silo yeni, fala baa baa u naa dogu ke u kan go yaa pia niba?› » Bi niba kuli den gaani ki lindi Jeremi o Diedo diegu nni.

¹⁰ Juda diema koanbala n den gaa laabaali, bi den ñani badidiegu ki cua o Diedo diegu nni, ki kali o Diedo diegu buliñoapanbu kani.

¹¹ Lanwani, bi kopadicianba leni bi saawalipuaba den maadi a koanbala leni bi niba kuli yaa maama n tie ne: «Se o joa ne n kpe, kelima o pua saawalibiado u naa dogu po, nani yi tuba n gbadi maama.»

¹² Ama Jeremi den maadi a koanbala leni bi niba kuli, ki yedi: «O Diedo soani nni min cua ki maadi yaa maama n pa ku naa diegu leni u naa dogu po, nani yin gbadi yaa maama kuli yeni.

¹³ Moala, lebidi mani yi tagu leni yi tuongunda. Cengi mani o Diedo yi Tienu nialu, yeni o baa cedi wan bi jagi ke o baa tieni yi yaa bonbiadila yeni.

¹⁴ Mini yaa po wani, mini nne, tieni mani nni yin sua ke yaala n dagidi yi po kuli.

¹⁵ Ama yin bandi ke yi yaa kpa nni, yi baa tugi yaa soama n ki pia tagili yi yula po, yinba, u naa dogu leni u niba kuli, kelima moamoani o Diedo n soani min waani yi laa maama, yin gbadi yaama ne.»

¹⁶ O bado koanbala leni bi niba kuli den yedi bi kopadicianba leni bi saawalipuaba: «O naa joa kan kpe, kelima o maadi ti o Diedo ti Tienu yeli nni yo.»

¹⁷ U dogu nikpela siiga bi tianba den fii, ki maadi leni li nitaanli ki yedi:

¹⁸ «Mise Moleseti yua n den pua saawali Esekiasi Juda bado yogunu, ki tua Juda yaaba kuli: ‹Li Miali Diedo U Paaciamu Kuli Daano yedi ke Siyon dogu baa tua kuanu. Jerusalemi baa kpandi kulinjagbeligu, Li jaandieli juali mo baa tua yaa juali n baa kpandi fuali.›

¹⁹ Naani Juda bado Esekiasi leni Juda yaaba kuli den cuo o ki kpa o yo? Naani baa den doagidi ke bi pia li fangili o Diedo po, ki moandi ki baa jiini o pali ka? Lanwani, o Diedo den cedi wan den jagi ke o baa tieni ba yaala ke li bia yeni. Tinba wani baa tuo ki tuni ti yuli laa janda?»

Joakimi teni ke bi kpa o saawalipualo Uliya

²⁰ Lanyogunu, nitoa moko den pua saawali o Diedo yeli nni. Lani n tie Semaya bijua Uriya. O den tie Kiriyati-Yearim yua. Omoko den pua u dogu leni mi diema po yaa saawalo n bia nani Jeremi n den maadi maama yene.

²¹ O bado, o jakoanda leni o koanbala kuli den gbadi o maama. O bado den moandi ki bua ki kpa o. Uliya n den bandi laa bonla, ti jawaandi den cuo o, ke o sani ki gedi Ejipiti diema nni.

²² O bado Joakimi den soani Akibori bijua Elinatani leni nitoaba, ke bi den yegi ki gedi Ejipiti diema nni.

²³ Bi den ñani Uliya Ejipiti nni ki cuani o o bado Joakimi kani, ki kpa o leni ki jugisiega ki luni o mi diema niba takuli nni.

²⁴ Ama Ahikami bijua Safani den gaa Jeremi, ki naa tuo ke bi luni o yaaba n bua ki kpa o nuu nni.