Jeremi 25 - U TIENU MAAMA TILI 2013

Piilie n binataa ke Jeremi pua saawali

¹ Juda bado Joakimi, Josiasi bijua bali binnaali binli, Jeremi n den gaa yaa maama U Tienu kani Juda buolu kuli po nne. Li den tie Babilonni bado Nebukanesa bali binkpiali yo.

² Jeremi den maadi leni Juda yaaba, Jerusalemi yaaba kuli nintuali, ki yedi:

³ «Hali Josiasi Anmoni bijua, Juda bado, piiga n bintaali, ki ban tuu dinla, piilie n binataa ke o Diedo maadi leni nni. N guani ki tiadi yi laa maama ki naa cedi, ama yi naa cengi nni.

⁴ O Diedo soani yi kani o naacenba bi saawalipuaba ki naa cedi, ama yi naa cengi. Yii diadi yi tuba ki cengi mo.

⁵ Bi tua: ‹Yuakuli n ŋaa o sangolimu, ki cedi yi bontienkaala yaala n bia yeni. Lani n tie yin yaa kaa yaa yogu n tuu yaa yogu o Diedo n puni yinba leni yi yaajanba yaa diema nni.

⁶ Yin da ŋoadi i buli, ki yedi ke yi baa yaa kpiagidi yi, ki gbaani ki pugi yi. Yin da tagi i buli ki bieni n pali, min da ti tieni yi yaala n bia.›

⁷ Ama yi naa cengi nni. Yi bieni pali ki tagi yi buli ki lingi yi yula po u nufanu. O Diedo n yedi yeni.»

⁸ Lani n teni ke Li Miali Diedo U Paaciamu Kuli Daano maadi nanda: «Nani yin naa cengi n nialu yeni,

⁹ n baa soani ban yini nujienu po yaa niba kuli leni Nebukanesa Babilonni bado n naacemo. N baa teni ban cua ki fii ki sedi mi naa diema leni mi niba po leni yaa nibuoli n gaani ki lindi ba kuli po. N baa kpa bikuli cain, lan tua gbanankpiendi leni ñuali bonla. Likani mo baa tua diegbengu yaa yogunu kuli po.

¹⁰ N baa teni bi siiga li pamancianli leni i laayieni, togibaa leni toginaa yani, li naali leni ki fidisanga yenma n gbeni.

¹¹ U naa dogu kuli baa tua diegbena, nilo n ki ye naani. Babilonni bado baa diedi mi naa diema kuli hali bina piilele.

¹² Ama a binpiileleeda yaa pundi, n baa fii kelima bi tagili po. N baa fii ki sedi Kalide yaaba diema po moko ki teni man tua diegbena yaa yogu n tuu yaa yogu. Mini o Diedo n yedi yeni.

¹³ N baa teni min den tuodi ki pua saawali ki yedi ke yaala n baa baa mi naa diema kuli n tieni. Yaala n diani li naa tili nni leni Jeremi n den kpa pua yaa saawalibiado i nibuoli kuli po mo baa kua.

¹⁴ Yaa nibuoli n pia u paalu leni bi badicianba baa cuo ba ti yonbidi. N baa pa bani moko bi panpaani, ki ŋoadi bi tuona n tie maama.»

Jeremi saawalikpialo i nilanbuoli po 25.15—29.32 Ti buudi tadiñokaaga

¹⁵ O Diedo Isidayeli Tienu maadi nanda: «Tandi ki gaa n nuu nni ki naa tadiñokaaga yaaga n gbie leni li pabiencianli daama, ki teni min soani a yaa nibuoli kani kuli n ño ma.

¹⁶ Bi yaa laa min baa soani yaa jugisiega bi siiga, bi baa ño ma bi yula n lebidi, ban yaa jadibi ki tulibi.»

¹⁷ N den gaa ki tadiñokaaga o Diedo nuu nni, ki ñuni o Diedo n den soani nni yaa nibuoli kani yeni kuli.

¹⁸ Jerusalemi leni Juda dogi, li badiba leni li koanbala kuli baa tua diegbendi, lidiga, ñuali leni ti solindi bonla, nani dinla lan tie maama yeni.

¹⁹ Ejipiti bado Faraon, o naacenba, o koanbala leni o niba kuli,

²⁰ nintuali po kuli, Utisi badiba kuli, Filisiti diema badiba kuli, Asikalon, Gasa, Ekron leni yaaba n sieni Asidodi,

²¹ Edomi yaaba, Moabi yaaba, Anmoni yaaba,

²² Tiiri badiba kuli, Sidon badiba kuli leni mi ñincianma duoli kpendega yaaba,

²³ Dedani yaaba, Tema yaaba, Busi yaaba leni yaaba n yen kugini ki koagidi bi langbiadi,

²⁴ Arabi badiba kuli, nintuali po badiba kuli, yaaba n ye mi fanpienma kuli nni baa ño.

²⁵ Bi yaa ñuni ki gbeni, Simiri badiba kuli, Elami badiba kuli, Medi badiba kuli,

²⁶ yaa badiba n ñani nujienu po kuli yaaba n kuu leni yaaba n foagi leni biyaba kuli leni ki tinga nni nibuoli yaaba n ye u tingbanu kuli nni leni Sesaki bado moko baa yuandi ki ño.

²⁷ Ŋan yedi ba: «Li Miali Diedo U Paaciamu Kuli Daano Isidayeli Tienu yedi mine: ‹Ño mani ki gaadi, ki go sii. Baa mani ki da go fii ki sedi yin baa le ke n cuani ki jugisiega yi siiga yaa yogunu!›

²⁸ Bi yaa yie ke bi kan gaa a nuu nni ki tadiñokaaga ki ño, ŋan yedi ba ke Li Miali Diedo U Paaciamu Kuli Daano yedi daa: ‹Ño mani, ño mani!›

²⁹ Diidi mani ban taagi n yeli yaa dogu yaa niinni yene, ke n baa cedi fala n cili ki baa ba. Naani yinba wani baa cia? Yimoko kan cia, kelima n yini ki jugisiega ki tinga niba kuli po. Mini Li Miali Diedo U Paaciamu Kuli Daano n yedi yeni.»

³⁰ Fini, ŋan pua bi po yaa saawalo n ye kuli, Ki yedi ba: «O Diedo fu hali tanpoli po. Hali o kaangagidiŋamu nni o maadi. O fu leni wan die yaa diema, O tangi yaaba n ŋmaadi u datuodikaanu po. O fu leni yaaba n ye ki tinga nni kuli.

³¹ O fuugu baa pundi hali u tinbianu. O Diedo baa bu i nibuoli kuli buudi. O baa bu nisaalimiali kuli buudi. O baa teni ki jugisiega n nandi i tagili danba. O Diedo n yedi yeni.»

³² Diidi Li Miali Diedo U Paaciamu Kuli Daano n yedi yaala: «Fala baa ña diema ki tuadi diema, Hali maama ke ku tafaaciangu baa fii u tinbianu po.

³³ Landaali, o Diedo n baa kpa yaaba yeni, baa yaa bili bili i kaani kuli. Ki cili u naa tinbianu ki ban tuu u naa tinbianu. Bi kan doagini ba ki bagi ban ŋanbi bi kuuma. Bi kan baa piinma. Ama bi baa tua bugidi u tingbanu po.

³⁴ Bi yankpaaba, mua mani ki yaa kuudi! Yinba a yangola yankpaaba, Baa mani tiipo ki bilini ki lebidi lebidi, Kelima ban baa kodi yi, Ki go yadi yadi yi yaa daali yeni cua. Yi baa baa ki mudi nani a boba yeni.

³⁵ Wuonkaanu kan go yaa ye bi yankpaaba po! Yaaba n kpaa ti yandi kan go yaa pia denkaanu.

³⁶ Gbadi mani bi yankpaaba n mua maama, Yaaba n gobidi ti yandi n kuudi maama, Kelima o Diedo pua ki biidi bi yankpaakaanu.

³⁷ Yaa yanlola n den pia ti yandi kuli bili suo, Kelima o Diedo pabiencianli po.

³⁸ O ŋaa o diegu nani li yangbanbili n fii Ki ŋaa o buoli maama yeni. Bi diema kpandi fanpienma, Kelima yua n bolindi Yaa pabiencianli leni o pali yaali n beni, Ki co nani u mu yeni po.»