Jeremi 24 - U TIENU MAAMA TILI 2013

Ti Kankan-baabuoliediti

¹ O Diedo den teni ke n laa kankan-baabuodilie ke ti se o Diedo diegu nintuali. Laa bonla den tieni ki sua ke Babilonni bado Nebukanesa den cuo Yekonia, Joakimi bijua, Juda bado, Juda koanbala, bi kpagikpieba leni a buliñoaŋanbida ki ñani ba Jerusalemi, ki gedini Babilonni.

² Ku baabuoyengu den pia yaa kankana n ŋani nani ya n yen kpa luoni yeni. Ku baabuoliegu mo den pia yaa kankana n biidi hali yaala ke ŋaa pia ŋmanma.

³ O Diedo den yedi nni: «Jeremi, a nua be?» N den guani ki yedi: «N nua A kankana. Ya n ŋani, wani ŋani hali boncianla. Ya n ki ŋani mo biidi hali boncianla, kaa pia ŋmanma kelima a biidima po.»

⁴ Lani, o Diedo den maadi leni nni mi naa maama:

⁵ O Diedo Isidayeli Tienu yedi nanda: «Nani ban nua yaa kankana n ŋani maama, nmoko baa diidi leni ki nunmanga ban ñani yaaba ti yonbidi Juda diema nni, ki gedini ba Kalide yaaba diema nni yene.

⁶ N baa diidi ba leni ki nunmanga, ki go teni ban guani mi naa diema nni. N baa maa ba, n kan mudi ba. N baa ŋuu ba, n kan ŋabi ba abada.

⁷ Bi yaa guani n kani leni bi pala kuli, n baa pa ba mi yanfuoma, ki teni ban bandi ke n tie Li Miali Diedo. Bi baa yaa tie n niba, nmo baa yaa tie bi Tienu.»

⁸ O Diedo yedi nanda: «Nani ban soani yaa kankana n biidi kaa pia ŋmanma maama, n baa soani Juda bado Sedesiasi leni o koanbala yene. N go baa soani yaa niba n sieni ki ye mi naa diema nni, Jerusalemi dogu nni leni Ejipiti diema nni kuli yene.

⁹ N baa teni ban tua ti jawaanciandi leni fala bonla li ŋandunli nibuoli po. Bi baa tua fe, ñuali, laadi leni ti solindi bonla min baa lu ba naani kuli po.

¹⁰ N baa soani ki jugisiega, mi koma leni u yianbiadipuodiko bi siiga, hali ban bodi mi diema nni, min den puni bani leni bi baanba yaama yeni niinni.»