Jeremi 23 - U TIENU MAAMA TILI 2013

Yaa gobidikaaba n ki tiegi leni mi faabima bado

¹ O Diedo yedi: «Fala n baa yaa gobidikaaba n yadi ki go biandi n niba!»

² Lani n teni ke o Diedo Isidayeli Tienu maadi leni yaa gobidikaaba n gobidi o niba, ki yedi: «Yi pua ki yadi n niba, ki deli ba. Yii kubi ba bonŋanla. N baa fii ki sedi yi po kelima yi tuona n bia maama po. O Diedo n yedi yeni.

³ N baa taani n niba yaaba n sieni, min yadi ba yaa diema nni kuli, ki guani ba bi yanloli nni. Bi baa maa ki go pugini hali boncianla.

⁴ N baa lingi bi po yaa yankpaaba n baa taa ba ki ban yaa kpaa. Bi kan go yaa jie, bi kan go yaa digibi, ba yendo kan poadi bi siiga mo.» O Diedo n yedi yeni.

⁵ O Diedo yedi: «Diidi a dana kpendi, N baa teni Davidi buolu nni Ki bimoanga n maa. O baa yaa tie yaa bado n tuuni Bonŋanla leni mi yanfuoma, Kelima o baa yaa ŋua yaa bujiali n tiegi Ki go tiegi mi diema nni.

⁶ O jama nni, Juda diema baa baa mi faabima, Isidayeli diema mo n yaa ye leni mi yanduanma. Diidi ban baa yini o maama: ‹O Diedo n tie ti teginma.›

⁷ O Diedo yedi: Lani n teni ke a dana kpendi ke bi kan go poli ki yedi: ‹Hali o Diedo yua n fo po, wani yua n teni ke Isidayeli yaaba ñani Ejipiti diema nni!›

⁸ Ama bi baa poli ki yedi: ‹Hali o Diedo yua n fo po, wani yua ñani ki go guani Isidayeli buolu, ban den ye nujienu diema po leni min den yadi ba yaa diema nni kuli.› Bi baa yaa kaa bi tinga nni.»

U Tienu fu leni bi saawalipua-faadanba

⁹ Jeremi den maadi leni bi saawalipua-faadanba Ki yedi: «Yinba bi saawalipuaba, N pali biidi cain, N gbanu kuli yoaligi, N tie nani o dañogaado, Nani mi daama n coagi yua yeni, Kelima o Diedo leni o maama yaama N gagidi ki ŋani po. O yedi nni:

¹⁰ ‹Mi diema kuli gbie leni yaa niba N tiendi mi conconma. Bi tiini ki caa mi biadima po yo, Bi gbani saagi yaala n ki ŋani tienma po. Lani yaa po n teni ke mi diema kuli Ye leni li paboanli, Ke bi yankpaakaani kuli mo kuodi.

¹¹ Ba bi saawalipuaba leni Bi kopadicianba kuli tua jifela. Ba hali n diegu nni, n laa bi biadima. O Diedo n yedi yeni.

¹² Lani n teni ke bi sanu baa yaa ŋaligi ki go biigi. Bi baa ŋmadi ki baa. N yaa fii ki sedi bi po yaa binli, N baa teni mi yebiadima n ŋmaa ba. Mini o Diedo n yedi yeni.›

Yaa saawalipuaba n bia ki cie Samari yaaba

¹³ Samari saawalipuaba kane ke n laa ti cagindi. Bi pua saawali o bulo Baali yeli nni, Ki yaani n niba Isidayeli yaaba.

¹⁴ Ama Jerusalemi saawalipuaba kani, N laa yaa bonla n gundi hali boncianla. Bi pia mi conconma, Ki cuoni i boandi nni. Bi paagidi yaaba n tiendi mi biadima pala, Hali yaala ke oba kan ŋaa o biadima. N nuni po, bikuli tie nani Sodomi yeni, Ke Jerusalemi niba mo nani Gomori yeni.»

¹⁵ Lani n teni ke Li Miali Diedo maadi Bi saawalipuaba po ki yedi: «N baa ñuni ba li mutuoli, Ki teni ban ño yaa ñima n pia ti loabidi, Kelima Jerusalemi yaa saawalipuaba N teni ke mi diema niba kuli biidi.»

Da cengi mani bi saawalipua-faadanba

¹⁶ Li Miali Diedo U Paaciamu Kuli Daano Maadi yaa maama n tie ne: «Da cengi mani yaa saawalipuaba N pua yi po saawali yeni maama! Bi boandi yi yo. Bi togidi yi ban bungi yaala bi pala nne. Laa tie yaala n ñani mini O Diedo ñoabu nni ka.

¹⁷ Bi ñigini ki yedi yaaba n fali nni: ‹Yi baa baa mi yanduanma!› Bi go yedi yaaba n ŋua bi pajuaga mo: ‹Yebiadima kan nandi yi!›

¹⁸ Ŋme n den ye o Diedo n kali u juogu po yaa yogunu, ki baa gbadi o maama? Ŋme n faami o maama po? Ŋme n gbadi ma?

¹⁹ Diidi o Diedo faagu fii nani ku tafaabiadigu yeni. O pabiencianli fii ki jiidi bi nibiadiba po.

²⁰ O Diedo pabienli kan pegidi ki teli poto kuli, Se li cua ki tieni wan jagi maama o pali nni. Li daali kpendi ke yi baa bandi lan bua ki yedi yaala.

²¹ Mii soani laa saawalipuaba, Ke bi nan sani ki gedi. Mii maadi leni ba, Ke bi nan pua saawali.

²² N juogu daali bi yaa den ye lienni, Bi den baa fidi ki teni n niba n gbadi n maama, Ki teni ban ŋaa bi tagibiadu leni bi tuongunda.»

O Diedo ye i kaani kuli

²³ O Diedo buali: «Naani n tie yaa Tienu n nua koankoanma nni bebe yo? Yeni ka, n tie yaa Tienu n nua foagima moko.

²⁴ Naani o nilo pia wan baa wuoni naani ke n kan le o? O Diedo n yedi yeni. Naani mii gbieni ki tinga leni tanpoli kuli?» O Diedo n yedi yeni.

Da nandi ti kankagidi leni mi bima

²⁵ N gbadi yaa saawalipuaba n pua mi faama n yeli nni ki tua: «N dangi! N dangi!»

²⁶ Hali u laa yogunu yo ke laa saawalipuaba baa yaa baa ki mangidi bi pala mi faama saawalipuama nni? Hali u laa yogunu yo ke bi go baa yaa pua mi faama ki tulindi n niba?

²⁷ Bi moa n niba n sundi n yeli leni ban togidi biyaba yaa dangidi, nani bi baanba n sundi n yeli kelima o bulo Baali po maama yeni.

²⁸ Yaa saawalipualo n dangi ti dangidi, wan togidi o dangidi. Yaa saawalipualo n gbadi n maama mo, n caa ma bonŋanla. O Diedo yedi: «Naani ti kankagidi leni mi bima tie yenme?» O Diedo n yedi yeni.

²⁹ O Diedo go yedi: «N maama tie nani u mu yeni. Mi go tie nani yaa toatoali n pua Ki mudi ku tangu yeni.»

³⁰ O Diedo yedi: «Lani n teni ke n nani yaa saawalipuaba n su n maama bi ŋmiali nni!

³¹ N nani yaa saawalipuaba n yaadi bi ñoana ki pua mi faama n yeli nni.

³² N nani yaa saawalipuaba n pua saawali leni yaa dangidi n tie faama. O Diedo n yedi yeni. Yaaba n togidi bi dangidi, ki tulindi n niba leni bi boandi leni bi yuboanli. Mii soani ba, mii puogi ba liba. Baa pia fuomiba kuli bi naa niba po. Mini o Diedo n yedi yeni.»

Naani o Diedo maama tie tugile?

³³ O Diedo den yedi Jeremi: «Li yaa tie ke saawalipualoba bi kopadiciamo buali a: ‹O Diedo yedi ke o baa waani be yaa fala yo?› Ŋan guani ki yedi ba: ‹O Diedo n yedi ke o baa waani yi yaa fala tie ke o baa lu ki diani yi.

³⁴ Li yaa tie ke saawalipualo bi kopadicianba, bi niloba yaa yedi ke o Diedo tuni o tugili, mini n ba n baa fii ki sedi landaano leni o diegu kuli po.›

³⁵ Lan bi pundi yuakuli n buali o lielo maama nne: ‹O Diedo guani be? O Diedo yedi be?›

³⁶ Ama yii go ñiini o Diedo n bi jagi yaala yeni, kelima yaa jagili n ye leni fala baa ŋoadi yuakuli leni o ñoamabonli. Yi golindi U Tienu yua n fo maama. Wani yua n tie Li Miali Diedo U Paaciamu Kuli Daano ti Tienu n yedi yeni.

³⁷ Ŋan yedi o saawalipualo: ‹O Diedo guani a lede? O Diedo yedi be?›

³⁸ Yi yaa go yedi: ‹O Diedo jagi yaala n bia!› O Diedo yedi mine. Nani yin maadi ki tua ke o Diedo jagi yaala n bia yeni, ke nan soani ban yedi yi ke yin da go tua, o Diedo jagi yaala n bia,

³⁹ Lani yaa po, o baa ña yi maama nni cain. O baa lu yinba leni yi dogu kuli foagima, wan den puni yinba leni yi baanba yaa dogu yeni.

⁴⁰ O baa jiini yi yula po yaa jigidima n ki pia gbenma, yaa fe n baa waagi ki ye, kaa pia yi po sundima.»