Jeremi 22 - U TIENU MAAMA TILI 2013

¹ O Diedo yedi nanda: «Kua Juda bado diegu nni, ki maadi likani yaa maama n tie ne:

² Ŋan yedi daa: ‹Cengi mani o Diedo maama, fini Juda bado yua n kaa Davidi bali gbandi po, fini, a koanbala leni a niba yaaba n koa laa buliñoana kani kuli.

³ O Diedo yedi nanda: Yin yaa tiendi mi teginma leni yaa bujiali n tiegi. Faabi mani ban faligidi yaa nilo yua n duoliti o nuu nni. Yin da faligi ki duoli o caano, ki kpienbiga leni li kpepuoli. Yin da wuli yua n ki pia tagili soama nekanba.

⁴ I moamoani, yi yaa tieni mi naa maama n yedi yaala, yaa badiba n kaa Davidi bali gbandi po, baa kua ku naa diegu nni. Bi baa yaa jagi bi teliti leni bi taami, bani, bi koanbala leni bi niba, ki kua a naa buliñoana kani.

⁵ Ama yi yàá cengi mi naa maama, n poli n yaa yeli nni, mini o Diedo n yedi ke ku naa diegu baa tua diegbengu.› »

⁶ O Diedo maadi yaa maama n tie ne, Juda bado diegu po: «A tie n po nani Galaadi yene, Bi nani Liban juana tanpolijoma yeni. Ama ba leni lani kuli, n poli a po Ke n baa teni ŋan tua fanpienma, Yaa dogu n ki pia nilo.

⁷ N baa lingi a po yaa niba n baa bolini a. Yuakuli se leni o jatiadi, Bi baa pedi a sediri tiidi dasaana Ya ŋani hali bonŋanla, Ki juu ŋa u mu nni.

⁸ I nibuoli boncianla baa tagini u naa dogu kani, ki buali biyaba: ‹Be n teni ke o Diedo soani u naa dociamu nanda?›

⁹ Bi baa guani ki yedi biyaba: ‹Li tie ke bi ŋaa Li Miali Diedo bi Tienu n den kuani yaa ŋantaado leni ba, ki gedi ki ban gbaani tientoe kani ki pugi yi.› »

Mua mani o bado Salumi po

¹⁰ Yinba Juda yaaba, Da go mua mani o bado Josiasi yua guani po! Da mua mani o po! Mua mani ban caani o bado Salumi Yua ti yonbidi po, Kelima o kan go guani. O kan go le ban mali o yaa diema nni yeni.

¹¹ Yeni de! O Diedo maadi Josiasi bijua Salumi yua n tie Juda bado po, wani yua n den kaa ti gbandi po, o baa Josiasi kaanu yaa maama n tie ne, ki yedi: «Salumi n ñani nekanba yeni, o kan go guani.

¹² O baa n kpe ban gedini o Ti yonbidi yaa diema nni. O kan go le mi naa diema.»

U Tienu n fu leni o bado Joakimi yaala yaa po

¹³ U Tienu go yedi: «Fala n baa fini o bado Joakimi, Yua n yaagi ki kandi mi teginma Ki maa a diegu, Ki yaagi ki kandi yaa bujiali n tiegi, Ki maa a dietuatuada, Kelima a teni ke a nisaalilieba tuuni Fanma fanma, ki kan pa ba bi panpaani.

¹⁴ Ŋme n tua: ‹N baa maa n yuli po Yaa diegu n yabi hali boncianla Leni yaa dietuatuada n pia mi fanma boncianla?› A teni ke bi cibi a po a diebona, Ki kpaa ki tabini a goana leni sediri daadi. A boali a diegu yeni leni yaa boaligu n moani.

¹⁵ Naani a tama ŋan pia sediri daadi Boncianla yeni, N baa doagidi ke a tie bado? Naani a baa ki den pia li bonjekaala Leni li bonñokaala ke li dagidi? Ama o den kubi yaa bujiali n tiegi leni mi teginma. Lani n teni ke li bonla kuli den cuoni o po bonŋanla.

¹⁶ O den ja o ninñinnilo leni taliga buudi ke li tiegi. Naani lani ka doagidi ke o bani nni? Lani n teni ke li bonla kuli den cuoni o po bonŋanla. O Diedo n yedi yeni.

¹⁷ Ama fini wani, a li lingi a yuceli ŋamu bebe yo. A faadi ki wuli yaaba n ki pia tagili soama. A tugumoangu mo yabi boncianla.

¹⁸ Lani n teni ke o Diedo maadi Yaa maama n tie ne, Juda bado Joakimi, Josiasi bijua po. O kan baa ban ŋanbi o kuuma, ki mua ki yedi: ‹Ŋain n kpiiba, mi naa yema te? Ŋain mi naa yema te?› O kan baa ban ŋanbi o kuuma ki mua ki yedi: ‹Ŋain n daano, mi naa yema te? Ŋain bu toabu daano, mi naa yema mo te?›

¹⁹ Bi baa piini o nani o ŋunbo yeni, Ki fuli ki ñani o Jerusalemi dogu Buliñoana kani ki ban lu.»

Jerusalemi laa i fe leni u yualu

²⁰ Do Liban juana po ki kpaani! Kpaani bonŋanla Basan penpeligu po! Do Abarimi juali po ki kuudi, Kelima a jaconcona kuli mudi yoab.

²¹ Hali a yema n den mani a po yaa Yogunu n den maadi leni a, Ama a den yie ke a kan cengi. A tagu nan li tie yene hali a panma nni, Ŋaa cengi n nialu.

²² U faalu baa tugi a gobidikaaba kuli. A jaconcona baa gedi ti yonbidi. Lanwani, i fe baa cuo ŋa, Ŋan le u yualu kelima a biadima po.

²³ Fini yua n ye Liban po, Ki kaa a badidiegu nni, Ban tii yaagu leni sediri tiidi daadi, Fala yaa nandi a yaa yogunu, A baa duni boncianla, Ki yaa lu ki lebidi nani u maditugukoanu n pia yaa pua yeni!

Yaa maama n ye Joakimi bijua Konia po

²⁴ N poli mini o Diedo yua n fo yeli nni, ki yedi ke ba Joakimi bijua Konia Juda bado yaa tua ñoagima n jienu nni, n baa pidi ma ki lu.

²⁵ N baa lu ŋa yaaba n bua ki ñani a miali nuu nni. Lani n tie Nebukanesa, Babilonni bado leni bani Kalide yaaba yeni, ŋan digibi bani yaaba yaa kani.

²⁶ Fini leni a naa yua mali a, n baa lu yikuli mi dielanma nni, yin ki mali naani. Lankane ke yi baa kpe.

²⁷ Ban kuani bi yama yaa diema yaa niinni, ki bua ki guani mi niinni yeni, bi kan go guani mi niinni.

²⁸ Bi den buali: «Naani Konia tie tiamudingu, Yaagu n ki go pia fuome? Naani o tie oba n ki go bua yaa tiagu yo? Be yaa po yo ke bi luni wani leni o puoliŋuani, Ban kaa bani yaa diema nni?»

²⁹ Ŋain, n diema, n diema, Cengi o Diedo maama!

³⁰ O Diedo yedi nanda: «Baani mani o joa ne Nani yua n ki pia bila yeni, Nani yaa joa n kan fidi ki midi yanbu O yema nni yeni, Kelima o puoliŋuani siiga, Oba kan fidi ki kali Davidi bali gbandi po, Ki diedi Juda diema.»