Jeremi 21 - U TIENU MAAMA TILI 2013

Ban guani o bado Sedesiasi yaa maama

¹ O Diedo n den teni yaa maama o saawalipualo Jeremi, o bado Sedesiasi po. O bado den soani Malikia bijua Pasehuri leni Maaseya bijua o kopadiciamo Sofoni, Jeremi kani, ki mia o ke wan

² bu bi po o Diedo, kelima Nebukanesa Babilonni bado tiendi bu toabu leni ti. Daalinba o Diedo leni o bancianma baa todi ti, ki teni wan foagidi leni ti.

³ Jeremi den guani ki yedi ba: «Yin guani ki ban yedi Sedesiasi ke

⁴ o Diedo Isidayeli Tienu yedi nanda: ‹N baa pegidi yin kubi yaa jatiadi yi nuu nni, ki koani leni Babilonni bado leni o niba Kalide yaaba, bani yaaba n gaani ki cebini yi diema yeni, ki kuani li jatiadi u dogu tugu nni, ki koani leni yi.

⁵ Mini n ba n baa koani leni yi, ki doagidi n fidu, n paaciamu leni li pabiencianli leni mi jama.

⁶ N baa pua u naa dogu niba leni li yandi kuli. U yianbiadipuodiko n baa je ba.›

⁷ Li yaa puoli, mini o Diedo n yedi: ‹N baa taa Juda bado Sedesiasi, o koanbala leni u naa dogu niba kuli, bu toabu leni mi koma n dini ki ŋaa yaaba, ki ŋaa ba Babilonni bado Nebukanesa leni yibalinba leni yaaba n bua ki ñani bi miana nuu nni. Bi baa bolini ba, Nebukanesa kan gbadi bi ninñima. Niloba kan cia. O kan juogi ba.› »

⁸ O Diedo go teni Jeremi yaa maama n tie ne, Jerusalemi niba po: «Diidi, n bili yi nintuali li miali leni mi kuuma sani.

⁹ Yua n ye u naa dogu nni bu toabu, mi koma bi u yianbiadipuodiko n baa je o. Ama yua n baa ña ki gedi ki ban teni o yuli Kalide yaaba, yaaba n cua ki baa yi yeni, baa yaa ye leni li miali.

¹⁰ Kelima n fii ki sedi u naa dogu po, ki baa tieni u yaala n bia, ki nan kan tieni u yaala n ŋani. Mini o Diedo n yedi yeni. N baa ŋaa u Babilonni bado nuu nni, wan juu u leni u mu.»

Yaa laabaalo n ye badidiegu niba po

¹¹ Yaa maama n tie ne tie Juda bado diegu yaaba yaa po yo: Cengi mani o Diedo maama!

¹² Davidi diegu yaaba, Cengi mani o Diedo maama! O Diedo yedi nanda: «Yaa tiendi mani mi teginma yaa yogunu kuli. Faabi mani ban janbidi yua, Yaa nilo n duoliti o nuu nni. Lani n tie n pali n da ti fii Ki cuo nani u mu yeni, Ki cuo maama ke bi kan fidi ki gbindi u, Kelima yi tuona n bia maama po.»

¹³ O Diedo yedi: «Moala wani, mini leni yinba ti lielie jige, Yinba yaaba n kaa ku tangu po ki tua: ‹Ŋme n baa fidi ki jiidi ki taani ti nekanba? Ŋme n baa fidi ki cua ki baa ti nekanba?›

¹⁴ N baa fii ki yie yi po. Nani yi bontienkaala n tie maama, N baa juu yi sediri tiidi fuali, Yaa fantama n baa juu yaala n gaani Ki lindi li kuli. O Diedo n yedi yeni.»