Jeremi 20 - U TIENU MAAMA TILI 2013

¹ Imeri bijua Pasehuri yua n den tie kopadiciamo ki tugi o Diedo diegu cenli ŋamu maama, den gbadi Jeremi n pua yaa saawalo.

² Lanwani, Pasehuri den pua Jeremi, ki kpaa o ti kpaadi Benjamen buliñoabu kani, o Diedo diegu nni yaabu n yuugi ki cie.

³ Ama lan den fii ki faa, Pasehuri den cua ki ñani Jeremi kpaadi. Jeremi den yedi o: «O Diedo ki puni a Pasehuri yaa yeli ka, ama o yini a “jawaanciandi i kaani kuli.”

⁴ Diidi o Diedo n yedi yaala: ‹N baa ŋaa ŋa leni ti jawaanciandi, fini leni a danlinba kuli. Bi yibalinba jugisiemu baa je ba a nunbu nni. N baa teni Babilonni bado n diedi Juda yaaba kuli, ki taa bi tianba ki gedini Babilonni, ki kpa bi tianba leni ki jugisiega.

⁵ N baa taa u naa dogu niba n pia yaala, ban duoli ki baa yaala, ban pia yaala ke li tie bonmoanla leni Juda badiba ŋalimano kuli, ki teni bi yibalinba. Bi baa fagi, ki wodi likuli ki tugi ki gedini Babilonni.

⁶ Fini Pasehuri mo leni yaaba n ye a diegu nni kuli, yi baa gedi ti yonbidi Babilonni. A baa n kpe lipo ban piini a, fini leni a danlinba, ŋan den pua yaaba yaa po mi saawalifaama.› »

Jeremi yenbidi

⁷ O Diedo a baa nni, Nmo cedi ke a baa nni. A cuo nni ki paadi nni. Yogunu kuli n laadi u yualu, Yuakuli ñuadi nni.

⁸ Min baa maadi yaa yogunu kuli, Se min kuudi. N yen tua: «Tugumoangu leni mabinga bebe n ye.» O Diedo maama po teni ke n tie Fe leni laadi bonla daali kuli.

⁹ N yaa yedi ke n kan go maadi o maama, Ke n kan go maadi o yeli nni, Li yen naaninni u mu N ye n pali nni ki co yeni, Ki didi go ye n kpaba nni ki fuli. N coagini n yuli Ke n baa yaa kubi mi maama yeni, Ama n kan fidi.

¹⁰ N gba ke bi niba boncianla maadi N po ti mayuogidi. Bi tianba tua: «Jawaanciandi i kaani kuli.» Bine mo tua: «Tin daadi ki sieni o mani!» Bi tianba tua: «Yeni de! Tin daadi ki sieni o mani!» Ba n danlibuadiba li lingi n ciinu yo, Ki sugini ki cuo nni n tagili nni. Lanwani, bi soabidi ki tua: «Tin cuo o ki tuu ti panli!»

¹¹ O Diedo tie n po nani o jakoandimoano, Lani n teni ke yaaba n fii n po baa tuudi ki baa. Bi kan paadi. I fe baa cuo ba leni ban gbali maama. Li baa tua yaa fe n baa waagi Ki ye kaa pia sundima.

¹² Fini Li Miali Diedo U Paaciamu Kuli Daano Biigidi o niteginka. A nua yaa jaga leni yaa yantiana n wuo. N baa le ŋan baa tuu ba li panli maama, Kelima n cua ki piani n yuli fini yaa kane.

¹³ Yiini mani o Diedo po, Pagi mani o Diedo, Kelima wani n faabidi taliga miali Yaaba n tiendi mi biadima nuu nni.

¹⁴ Min mali yaa daali n bia fanma! N naa n mali nni yaa daali n tua solindi!

¹⁵ Ti solindi n jiidi yaa joa n cua Ki puni n baa li laabaalo po, Ki waani o ke o baa bonjaga, Ki teni ke o pali mangi.

¹⁶ Landaali n tua nani o Diedo n bolini Yaa dogi kaa gbadi i po ninñima yeni! Li daali yeni n gbadi i moe ku tiŋaagu Leni a bubula u yensiicocolu!

¹⁷ Be n teni ke waa teni ke n kpe n naa tugu nni? Yeni, n naa n den baa tua n kuli, O kan den maa nni.

¹⁸ Be n teni ke n ñani n naa tugu nni, Ki baa le fala leni ku coagingu bebe, Ke n miali dana kuli baa n juodi fe nni?