Jeremi 2 - U TIENU MAAMA TILI 2013

Isidayeli yaaba tudima

¹ O Diedo teni nni yaa ñoamabonli n tie ne:

² «Gedi ki ban kpaani Jerusalemi yaaba tuba nni: O Diedo yedi nanda: ‹Fini Jerusalemi, n baa ki tiadi ŋan den tie jafaano, Ki pia n po yaa buama, Ŋan den ŋua nni mi fanpienma nni, Leni yaa tinga yaa niinni N ki pia bonpudikaaliba yaa yogunu.

³ Isidayeli, a den li ye mini o Diedo bebe yaa po yo. A den tie n bonbaakaala kuli yaa bonkpiala. Yaaba n den ŋmani la kuli den kua i tagili nni, Mi yebiadima mo yen ŋmaa ba. O Diedo n yedi yeni.

⁴ Yinba Jakob puoliŋuani, Isidayeli nibuoli kuli, Cengi mani o Diedo maama.

⁵ O Diedo go yedi: Yi yaajanba laa n kani i laa tagile, Ki sani ki foagidi leni nni? Bi sani ki ŋoadi mi faama, Ki tua biba fanma?›

⁶ Baa buali bi yula: ‹O Diedo yua n teni ke ti ñani Ejipiti diema yeni ye le yo? Wani yua n gobidi Ki gedini ti mi fanpienma nni, I tiali leni ti buodi diema nni, U yialu leni li biigili tinga nni, Yaa tinga ke nisaalimialiba ki poandi ki niinni yeni ye le yo?›

⁷ N cuani yi i tiidi n dua yaa diema nni, Ke yin baa ki ŋmani yaa bonluonkaala n mani, Ama yi cua ki teni ke n diema joagini, Yi teni ke n faali diema Kpandi ki tua cagindi bonla.

⁸ Bi kopadicianba naa buali: ‹O Diedo ye le?› Yaaba n kubi li bali maama ki bani nni, Bi gobidikaaba ki tegini n po, Bi saawalipuaba pua saawali O bulo Baali yaa yeli nni. Bikuli sani ki pugi i buli Yii n kan midi yanbu, Kaa pia fuomiba mo.

⁹ Lani n teni ke n baa bu leni yi. N baa bu leni yi bijaba yaa bijaba. O Diedo n yedi yeni.

¹⁰ Gedi mani Kitim boanjaali po ki diidi. Soani mani a tonda Kedari po, Ki ban noanli bonŋanla, Ki ban diidi lilie yaa ye.

¹¹ Naani li pia yaa nibuolu n ŋaa u buli, Ba ke yii tie Tienu? Ama yinba wani ŋaa mini U Tienu Yua n tie yi kpiagidi, ki ŋua i buli.

¹² Tanpoli pali n biidi kelima lani yaa po. Digibi mani ki kuodi. O Diedo n yedi yeni.

¹³ N niba tudi taalimilie, Bi ŋaa mini yua n tie Li Miali ñinbunli yeni, Ki gbini bi yula po, Yaa ñinbuodi n lugidi lugidi, Ki kan fidi ki kubi ñima.

Li bia yua n ŋaa o Diedo po

¹⁴ Naani Isidayeli niba tie yonbi yo? Naani n mali ba ti yonbidi nne? Li nan gaa lede ke bi fagi ba?

¹⁵ Ti yangbanbidi fii ki sedi bi po, Ki duni ki mua mi jama, Ki cuani mi diema po li paboanli. Niba ki go ye ban juu bi dogi yii yeni niinni.

¹⁶ Ba Memifisi leni Dafine niba cua Ki kuo bi yula li paboanli po.

¹⁷ Isidayeli, be n cuani a po la? Laa tie ke a ŋaa o Diedo a Tienu, Yua n den gobidi a o sanŋamu nni yeni ka?

¹⁸ Moala a go caa Ejipiti ki ban taa be? A baa n ño u kpenciamu Nili ñima bi? A go tuuni be Asiiri sanu nni? Naani a baa n ño u kpenciamu Efrati ñime?

¹⁹ A biadima n nandi a, A janbi mo n ñiadi a. Diidi ki le, ki ŋaa mini o Diedo a Tienu, Ki da go pia n po fangiliba, N bia ki go gundi maama. Li Miali Diedo U Tienu U Paaciamu Kuli Daano n yedi yeni.»

Isidayeli puagi ki go conbi

²⁰ Hali yogu, n den cie a landili, Ki cie a baabi yii n luo ŋa. Ama a yedi: «N bua ki diedi n yuli.» Die yaa juaga n kpedi kuli po Leni yaa tibu n bundi mo kuli tinga, A kpaagi ki duandi nani li puoconconli yeni.

²¹ N den ŋuu ŋa nani duven tiŋandi yeni, Kelima n den bani ke a tie duven bonbuoŋanmoanu. Li nan gaa lede ke a biidi cain ki tua tilanbu? Li gaa lede ke a bonluonkaala mo bedi?

²² Ba a yaa bi wuu leni mi jiama, Ki duundi leni bu ciebu boncianla, A tagili baa yaa baa ki ye n nintuali. Li Miali Diedo U Tienu n yedi yeni.

²³ A baa gaa lede ki yedi: «Mii joagini, Mii pia ŋantaadi leni o bulo Baali.» Diidi a taabuona ku joaloangu nni. Tuo ŋan tieni yaala, Fini ki yuoyuoñuaga yaaga n puagi ki lindi yeni!

²⁴ Fini li fuali nni ŋunñuaga Yaaga n maani mi fanpienma, Yaaga n pudi ki gaani u faalu. Ŋme n baa fidi ki sieni ki bobidu? Yaaba n lingi ka kuli, Kan lingi ka ki coagi. Ki yaa pudi yaa yogunu, bi baa le ka.

²⁵ Ŋan moandi ki da gedi taapiena, Ki da tuo ñuñuunu mo n kuoni a nialu. Ama a yedi: «Lebidima kan go tieni, Kelima n bua bi canba yeginu!»

²⁶ Nani ban yen pigini o suudo I fe n cuo o maama yeni, I fe baa cuo yene Isidayeli yaaba, bi badiba, Bi koanbala, bi kopadicianba Leni bi saawalipuaba.

²⁷ Bani yaaba n tua ku daagu: «A tie n baa!» Ki tua li tanli mo: «Fini n mali nni!» Yeni de! Bi buli nni ki nunga. Bi yaa ye mi yebiadima nni, bi baa yedi: «Fii ki faabi ti.»

²⁸ Ŋan tagi a yuli po yaa buli yeni kuli ye le? Ban fii, bi yaa baa fidi ki faabi a a fala daali. Juda, a buli yabi ki pundi a dogi.

²⁹ Be yaa po yo ke yi bu leni nni, Ki fiini n po mi yiema? Mini o Diedo n yedi yeni.

³⁰ N pua yi bijaba fanma fanma bebe, Ba leni lani kuli bi naa gaani tundi. Yi piemi kpaani yi saawalipuaba, Nani yaa yangbanli n bolindi yeni.

³¹ Yinba mi naa nifiima, Kpaagi mani o Diedo maama po. Naani n tua Isidayeli po fanpienma, Bi li biigili diema yo? Be yaa po yo ke n niba tua: «Ti diedi ti yula, ti kan go guani a kani?»

³² Naani o jafaano baa sundi o tiayiekaadi po? Naani puocaano baa sundi o liadicianli po? N niba wani nan sundi n po, Hali ke li waagi.

³³ A bani ŋan baa tagini yaa sanu Ki lingi a jaconcona. Lani n teni ke a maani mi nikpama sanu,

³⁴ Hali ke a luoda leni yaaba n ki pia tagili kuli Soama ye a tiadi po, Ke a naa ludi ba ke bi pua Ki luodi a dieli buliñoabu ka.

³⁵ Ba leni lani kuli, A guani ki yedi ke ŋaa pia tagiliba kuli, Ke o pabienli n pegidi ki teli poto ki cedi a. N baa bu leni a kelima a yedi: «Mii pia tagiliba.»

³⁶ Be yaa po yo ke a baa tieni li naa bonla kuli, Ki lebidi a sanu? Ejipiti diema baa janbi a, Nani Asiiri diema n janbi a maama yeni.

³⁷ Lankani moko a baa ña ki tugi a nii a yuli po, Kelima o Diedo ñani a ŋan dugi yaaba yaa po kani. A kan ŋmani bi kani liba kuli mo.