Jeremi 19 - U TIENU MAAMA TILI 2013

Li ñincuali mudi

¹ O Diedo yedi nanda: «Gedi o maado po ki ban daa li cuali, ki yegi leni li nitaanli nikpela leni bi kopadicianba nikpela.

² Ŋan yuandi ki ña a Tancacala buliñoabu po, yaabu n goa Beni-Hinomi joaloangu po. Lankani a baa waani ba min baa puogi a, ŋan waani ba yaa maama.»

³ A baa yedi ba: «Juda diema badiba leni Jerusalemi yaaba, cengi mani Li Miali Diedo Isidayeli Tienu, U Paaciamu Kuli Daano n yedi yaala: ‹N baa teni mi yebiadima n cua u naa kaanu, hali ke yua n gbadi li laabaalo kuli n womi.›

⁴ Nani ban ŋaa nni ki teni ke u kaanu ne ki go pia bandima, ki juugi likani a dugibila tientoe po, bi baanba leni Juda badiba leni bani bi ba n ki den bani yaa buli. Bi gbieni u naa kaanu leni yaaba n ki pia tagiliba kuli soama.

⁵ Bi maa i buli pada kaani ke yi kpedi, ki taa bi bijaba ki padi a padijuukaana o bulo Baali po. N naa den puni ba laa sanu, mii den maadi ba laa maama, mii den baa li yanjagili mo.

⁶ Li tie lani yaa po, ke o Diedo yedi ke a dana kpendi, ke u naa kaanu kan go ti yaa yi “Tofeti” bi “Beni-Hinomi joaloangu.” Bi baa yaa yi likani “li kukpali joaloangu.”

⁷ Lankane n baa bolini Juda leni Jerusalemi yaaba juogu. N baa teni bi yibalinba yaaba n ki gba ninñima yeni jugisiemu n kpa ba. N baa teni i kaabi leni i tanboe n ŋmani bi tinkpiba.

⁸ N baa teni u naa dogu n tua i jeje leni li ñuali bonla. Yaaba n baa tagi laa dogu kani kuli baa jie, lan paki ba, ban go ñuadi u mo, kelima wun laa yaa fala kuli po.

⁹ Bi yibalinba yaaba n ki gba ninñima leni yaaba n sedi bi miana po n baa paagi bi yama maama po, baa teni ban ŋmani bi bijaba leni bi bisiaba gbanandi. Yuakuli baa ŋmani o yieninlielo gbanandi.»

¹⁰ A baa mudi li cuali yaaba n yegi leni a nintuali, ki yedi ba:

¹¹ «Li Miali Diedo U Paaciamu Kuli Daano yedi daa: N baa mudi bi naa niba leni u naa dogu yeni, nani o maado n mudi li cuali maama ke li naa go pia ŋanbima yeni. Bi baa yaa piindi bi tinkpiba Tofeti, kelima piinkaanu kan go yaa ye poto.

¹² O Diedo yedi ke o baa tieni yene leni u naa dogu leni yaaba n ye u niinni kuli. N baa teni laa dogu n nandi leni Tofeti.

¹³ Jerusalemi diedi leni Juda badiba diedi baa tua yaa kaani n joagini nani Tofeti po yeni. Li baa tua yene laa diedi kuli po, ban den juugi yaadi yaa yula po a dugibila tanpoli ŋmaali po, ki go cabini a ñincaba i nilanbuli po yeni.»

Bi kpaa Jeremi ti kpaadi

¹⁴ Jeremi den ñani Tofeti, ki guani o Diedo n den soani o naani, ke wan ban pua saawali. O den gedi ki ban sedi o Diedo diegu luolu nni, ki yedi yaa niba n den taani likani kuli:

¹⁵ Li Miali Diedo U Paaciamu Kuli Daano, Isidayeli Tienu yedi mine: «N baa teni min den maadi yaa yebiadima maama yeni, n baa u naa dogu leni wun die yaa dogi kuli, kelima bi juagi bi pala kaa bua ki cengi n maama.»