Jeremi 18 - U TIENU MAAMA TILI 2013

Jeremi gedi o maado kani

¹ O Diedo den maadi leni Jeremi ki yedi:

² «Jeremi, fii ki gedi o maado deni, n baa maadi leni a.»

³ Lani n den gedi o maado deni ki sua ke o kaa ki tuuni o tuonli.

⁴ Wan maa yaa tiagu yàá tuo, o yen guani ki maa tiatoagu nani wan bua maama.

⁵ Lanwani, o Diedo den maadi leni nni ki yedi:

⁶ «Yinba Isidayeli yaaba, naani n kan fidi ki tieni yi nani o naa maado n tieni maama yeni. Mini o Diedo yedi: ‹Nani ku yoagu n tie maama o maado nuu nni, yimoko tie yene n nuu nni.

⁷ Yogunuba n yen baa ŋabi, ki pua, ki go bolini nibuoluba bi diemiba.

⁸ Ama laa niba yaa cedi bi biadima, n yen lebidi n yama leni min bi jagi ke n baa waani ba yaa fala.

⁹ Yogunuba mo, n yen yedi ke n baa maa ki ŋuu nibuoluba, bi diemiba.

¹⁰ Ama laa nibuolu yaa tieni yaala n gundi n po, ki naa cengi n nialu, n yen lebidi n yama leni min bi jagi ke n baa tieni bi po yaa ŋanma.›

¹¹ Maadi moala leni Juda yaaba leni Jerusalemi yaaba, ki yedi ba: o Diedo yedi: ‹Diidi n bogidi yi po mi yebiadima. N pia min jagi yi po yaala. Guani ki lebidi mani yi sanyuogidi. Lebidi mani yi tagi.›

¹² Ama bi yedi: ‹Ti baga ki ye, ti li baa yaa ŋua ti yantiabiada yo.› »

Isidayeli sundi o Diedo po

¹³ Lani n teni ke o Diedo yedi nanda: Buali mani i nibuoli siiga, Ŋme n kpa gbadi laa bonla buolu? Isidayeli soani yaa tuona n gundi boncianla.

¹⁴ Naani Liban juana ya n kpedi boncianla po, Baa luo ñinguankaama? Naani yaa ñima n puubi ki kuugi, Ki ña a juana po, baa ñuudi faala po? Kalam!

¹⁵ Ama n yaa niba wani nan sundi n po, Bi juugi i buli po a dugibila. Bi cuoni ki tuudi ban yen maani Ki tagi yaa sankpeli yeni nni. Bi guani ki ŋoadi ban ki koadi yaa sani.

¹⁶ Bi teni ke bi dogu kpandi ki tua Ti jawaandi bonla Leni li ñuali bonla. Yaaba n tagi likani kuli, Ti jawaandi leni i yanbani cuo ba Ke bi fegini bi yula.

¹⁷ N baa yadi ba nani puoli faalu yeni, Yibalinba nintuali. N baa buli ba n nunga, Fala n baa ŋmaa ba yaa daali.

Bi juogi ki bua ki kpa Jeremi

¹⁸ Jeremi yibalinba tianba den yedi: «Cua mani tin juogi ki baa tin baa kuani Jeremi naani, kelima li bali maama kan kpe ke bi kopadicianba ye. Tundi kan gbeni ke bi yanfuodanba ye. Saawali mo kan gbeni ke bi saawalipuaba ye. Cua mani tin kpa o leni ti maama, ki da cengi o mayedikaama.»

¹⁹ O Diedo, faami n po bonŋanla, Ki gbadi n yibalinba n tua yaala!

²⁰ Naani mi biadima n baa pa Mi ŋanma panpaani? Ama bani wani gbini ku buogu Ki baa ñani n miali. Tiadi ke n cua ki sedi a nintuali Ki baa maadi ki ŋanbi bi po, Ki teni a pabiencianli n kagidi bi po.

²¹ Lani yaa po, ŋan teni mi koma N nandi bi bijaba. Ŋan kodi ba leni ki jugisiega. Ŋan teni bi puoba n luo a bila. Ŋan teni ban tua kpepuona. Ŋan teni mi kuuma n nandi bi ciaba, Ki go teni bi jawaaba mo n kpe bu toabu nni.

²² Ŋan teni mu bubuumu n fii ki loli bi diedi nni, Ŋan baa soani bi nibiadiba yaa yogunu, Ban gedi leni bi jatiadi ki baa ba, Kelima bi gbini n po ku buogu. Bi dia nni i taali ki bua ki cuo nni.

²³ Fini o Diedo bani ban lu yaa janbi kuli Ki bua ki kpa nni. Ŋan da tieni sugili bi biadima po. Ŋan da duuni ki ñani bi tuonbiadi a nintuali. Teni ban yaa jegibi a nintuali, A pabienli daali mo, ŋan fii ki sedi bi po!