Jeremi 17 - U TIENU MAAMA TILI 2013

O Diedo fu leni Juda yaaba bi tagili po

¹ Juda diema yaaba tagili diani leni ki celiga yo, Ki diani bonŋanla leni diama tanli. Li diani yi pala nni Leni yi padibinbinli yina po.

² Yeni, yi bila baa tiadi bi padibinbina po leni bi bulo Akera daadi po, yaadi n kuu leni yaa tiidi n bundi bonŋanla a joabila po.

³ Yinba Juda diema yaaba, n baa teni ban fagi Yi piama leni yi ŋalimano kuli, Kelima yin tieni yaa tuonbiadi Mi diema nni kuli po. Bi baa fie ki taani leni yi juana po padibinbina kuli.

⁴ Yinba yi ba n baa ŋaa Min den puni yi yaa diema. N baa taa yi ki teni yin tua Yi yibalinba yonbi, Yin kaa bani yaa diema nni, Kelima yi teni ke n pabienli tua Nani u mu yeni. U baa yaa co yogunu kuli.

⁵ O Diedo yedi nanda: «U Tienu n naali yua n dugi o lielo po, Ki taa o jigi kuli ki bili o nisaalo kani, Ki foagidi leni o Diedo!

⁶ O tie nani yaa fatuuga n ye u tialu nni. O kan baa yemanmiba kuli. O yekaanu n baa yaa tie Mi fanpienma tana siiga, Yaa tinga n tie lianli nni, Nilo n ki ye naankani.

⁷ Li seli ye leni yua n dugi o Diedo po, Ke o Diedo mo n tie o dugidi!

⁸ O tie nani ban ŋuu yaa tibu u kpenu kani, Ke bu jiini tandi ki ban pundi ku baagu nni. Laa tibu naa bani ke wulugu ye. Bu faadi mo kan mali abada. U tayialu binli, bu yama naa yagini. Bu go baa yaa luoni yogunu kuli mo.

⁹ O nisaalo pali goli ki cie bonla kuli, Li naa pia ñoagu mo. Ŋme n baa fidi ki bandi li ki gbeni?

¹⁰ Mini Li Miali Diedo n biigidi a pala, Ki bandi yaala n ye o nilo yantugu nni, Ki baa guani yuakuli, Nani o sanbila n tie maama, Ki pa yuakuli mo o panpaani, Nani o tuona n tie maama.»

¹¹ Nani yaa ñuñuuga n wugini Wan kaa ŋaa yaa jena, Li tie yene leni yua n baa piama ke laa tiegi. O baa tuadi ki baa o panma siiga. O yema juodima po mo, Wan tua yanluodaano.

O Diedo bebe n tie li miali ñiali

¹² Bi tua: «Ti kaanŋamu tie Nani yaa bali kalikaanu n pia Ti kpiagidi boncianla yeni. Li jagi yaa juali n kpedi po hali mi cilima.

¹³ O Diedo, fini Isidayeli suginma, Yaaba n ŋaa ŋa kuli baa le i fe. Yaaba n foagidi leni a kuli baa kpe, Kelima bi ŋaa o Diedo yua n tie Li miali ñinbunli.»

Jeremi jaandi

¹⁴ Ŋain, o Diedo, paagi nni, lani n tie min paagi. Faabi nni, lani n baa faabi, Kelima fini n tie n pagidi!

¹⁵ Bi tua nni: «O Diedo maama ye le? Man nan cua ne naa!»

¹⁶ O Diedo, a bani ke mini ka den mia ke fala n cua. A bani ke mini ka go den mia ke u nufanu daali n cua. Yaa maama n ñani n ñoabu nni mo kuli, a bani ma.

¹⁷ Ŋan da tua yaala n jiendi nni, Fini yua n tie n wuonkaanu fala daali!

¹⁸ Teni i fe n cuo yaaba n sedi n po. Ama mini wani n da fiagi, Teni ban digibi, Ama mini wani n da digibi. Teni fala daali n cua bi po, Teni fala n yaa lindi ki baali ba.

Fangi mani U Tienu fuodima daali

¹⁹ O Diedo maadi leni nni nanda: «Gedi ki ban sedi bi niba buliñoabu kani, Juda diema badiba n tagi naankani leni Jerusalemi dogu niba n koa yaa buliñoana kani.»

²⁰ Ŋan yedi ba daa: «Cengi mani o Diedo maama, yinba Juda badiba, Juda diema niba, Jerusalemi dogu niba leni yinba yaaba n koa a naa buliñoana kani kuli.»

²¹ O Diedo yedi mi naa maama: «Fangi mani yi yula, ki da tugi tugikpiagili U Tienu fuodima daali, ki baa kuani Jerusalemi buliñoana kani.

²² Yin da ñani tugikpiaga yi diedi nni mi fuodima daali. Yin da soani tuonliba mo. Gagidi ki ŋanbi mani mi fuodima daali nani min puogi yi baanba maama yeni.

²³ Ama yi baanba yeni naa den cengi, baa diadi bi tuba, bi juagi bi pala, kelima baa bua ki gbadi ki go gaa mi bangima.»

²⁴ O Diedo yedi: «Cengi mani bonŋanla! Mi fuodima daali, yin da tugi tugikpiagili ki poandi u dogu nni. Gagidi mani ki ŋanbi landaali n po. Da soani tuonliba kuli landaali.

²⁵ Yaaba n baa tagi u naa dogu buliñoana kani tie bine: Bi badiba yaaba n kaa Davidi bali gbandi po, ki jagi bi taami leni bi teliti, ki taani leni bi koanbala leni Juda niba leni Jerusalemi yaaba. Lanwani, u naa dogu baa yaa pia bi niba yaa yogunu kuli.

²⁶ Bi niba baa ña Juda dogi leni yii n gaani ki lindi Jerusalemi, Benjamen diema dogi, Sefela po, li juali leni nuganu po yaaba. Bi baa cuani a padijuukaana, a pada, bu paabu, a dugibila leni i tuondi pada o Diedo diegu nni.

²⁷ Ama yi yàá cengi nni, ki naa gagidi ki ŋanbi mi fuodima daali, ki tugi a tugikpiaga ki tagini ki kua Jerusalemi buliñoana kani mi fuodima daali, lanwani n baa juu u dogu buliñoana u mu. U baa buoni Jerusalemi badidiedi, ki nan kan gbindi mo.»