Jeremi 15 - U TIENU MAAMA TILI 2013

¹ O Diedo den yedi nni: «Ba Musa leni Samueli yaa cua n kani, n yama kan guani bi naa niba kani. Deli ba ban foagidi n kani. Deli ba ban yaa caa!

² Lanwani, bi yaa yedi a: ‹Ti baa gedi le?› Ŋan guani ba: o Diedo yedi daa: Mi kuuma n je man baa je yua, Bu toabu n je bun baa je yua, Mi koma n je man baa je yua, Ti yonbidi mo n taa tin baa taa yua!»

³ O Diedo n yedi: «N baa fii ki sedi bi po leni falabuolinaa. Bu toabu baa cua ki kpa ba, i sangbanli n cua ki ŋmani, i yobili leni i tanboe mo n cua ki ŋmani ki go bolini ba.

⁴ N baa teni lan tua jawaanciandi bonla ŋanduna tinbuona kuli po. Laa bonla baa tieni, kelima Juda bado Esekiasi bijua Manase n den tieni yaala Jerusalemi dogu nni kuli po.»

O Diedo pali beni

⁵ O Diedo yedi: «Jerusalemi, oba kuli kan gbadi a ninñima. Oba kuli kan mua a po. Oba kuli kan gbegi ba ki buali yaala n pia ŋa.

⁶ A sundi n po! A buli nni a nunga! Lani n teni ke n tandi n nuu ki baa bolini a. N gbadi Jerusalemi po mi ninñima ki coagi.

⁷ N lendi ba ki yadi ba mi diema nni, N muni ba a bila, Ba leni lani kuli, bi naa lebidi ki ŋaa bi sani yeni.

⁸ N teni ke bi kpepuona yabidi Ki cie mi ñincianma tanbiima. N teni ke mi yebiadima ŋmaa O jakoando naa u yensiicocolu, Ki teni ke ti yanyagidi leni i yanbani Mo cua ki ludi o yenma.

⁹ Yaa pua n mali jabilele coagi, Ki baa kpe o panma nni. I fe cuo o ki gbadi o bonŋanla. Bi siiga yaaba n baa sieni mo, Bi yibalinba baa kpa ba leni ki jugisiega. Mini o Diedo n yedi yeni.»

Jeremi yenbidi

¹⁰ N naa, ŋan mali nni yeni po n teni, Ke mi yebiadima ŋmaa nni. Mini n tie mi diema kuli po, Yua fiini mi niama leni ku fuugu. Mii dini panli, mii teni nitoa mo panli, Ke bi niba kuli nan solini nni.

¹¹ O Diedo poli ki yedi: «N den faabi a a yema ŋamu po yo. N baa teni a yibali n gbaani ki pugi a, Fala leni li paboanli yogunu.

¹² Naani ti kuboandi baa tuo ki kua? Naani nujienu kudi Leni ti kumoandi baa tuo ki kua?

¹³ N baa teni ban fagi a ŋalimano leni a piama kuli, Kelima ŋan tieni yaa tuonbiadi mi diema nni yeni po.

¹⁴ N baa teni yibalinba n gedini yi Yin kaa bani yaa diema nni, Kelima n pafiima mu baa juu yi.»

¹⁵ Fini o Diedo, a bani likuli, Tiadi n po ki todi nni, Tuu n po n panli leni yaaba n wangi nni fala. Da kpa nni, fini yua yaa pali n ki be tontoni. Bandi ke n laa i fe buoli kuli kelima a po.

¹⁶ N yaa li gbadi a maama kuli, N yen li di ma yo, Kelima mi mangidi n pali hali boncianla. A maama yeni mani ki go nuagi n po, Kelima fini Li Miali Diedo U Paaciamu Kuli Daano n die nni. A yeli mo maa n po.

¹⁷ Mii kaa ñuañuada siiga ki baa jeli, Kelima a paalu teni ke n ye nbebe, A den teni ke n pali beni boncianla.

¹⁸ Be n teni ke n fala ki pia gbenma? Be n teni ke n nali mo kan soangi? Be n teni ke n buu li ke li naa soangidi? Naani a li baa yaa baa ki boandi nni, Nani ku boankuongu yene?

¹⁹ Lani n teni ke o Diedo yedi daa: «A yaa guani n kani, N baa guani ki taa ŋa, Ŋan yaa tuuni n po. A yaa gagidi yaala n pia li mayuli leni yaala n ki pia, A baa yaa tie nani n ñoabu yeni. Lani, bani n baa guani a kani, Laa tie fini ka n guani bi kani.

²⁰ N baa teni ŋan tua bi naa niba po kumoanguonli. Bi baa tuogi leni a bu toabu, Ama bi kan paadi a, Kelima n ye leni a, Ki baa faabi a, ki go kubi a. Mini o Diedo n yedi yeni.

²¹ N baa faabi a leni bi nibiadiba, Ki go faabi a leni ku tugumoangu danba.»