Jeremi 14 - U TIENU MAAMA TILI 2013

U tayialu yogunu

¹ O Diedo den maadi leni Jeremi, U tayialu yogunu yaa maama n tie ne:

² «Juda diema ye leni li paboanli, Mi diema dogi coagi, Ki ye leni li paboanli ki kaa tiipo. A bubula fii ki loli Jerusalemi nni.

³ Bi paatieba tuuni taliginba u kpenu po, Ke ban ban luuni mi ñima. Bi fii ki gedi a caana po, baa ban baa ñima. Bi guani denpo leni bi cuakuoma, I fe leni i tagili cuo ba ke bi libini bi yula.

⁴ Ki tinga pudi ki yagidi, Kelima taaga ki go ye mi diema nni. Bi kpakpaaba jigi cie, Baa bani ban kuandi bi yula naani.

⁵ Ba ku muagu nni ki boaliga Yen maa o biga ki ŋaa ka, Kelima moasoangidi ki go ye.

⁶ I fuaŋunbi jagi a juana po Ki gaani u faalu, nani i tanboe yeni. Bi nuni tabi kelima muadi ki ye.»

⁷ Bi yedi: «Ti tagili yabi ki pendi. Li tie moamoane. Ama fini o Diedo, le ŋan baa tieni yaala, A yeli kpiagidi po. Ti tudi a po hali boncianla. Ti tieni a po ti tuonbiadi.

⁸ Fini yua n tie Isidayeli dugidi, A tie gaapo li paboanli daali. Li gaa lede ke a tie nani O canpendika yeni, mi diema nni? Li gaa lede ke a tie nani Yaa sancenlo n jadi ki duani, Ñiayengu bebe yeni?

⁹ Be n teni ke a tie nani yaa joa yaa pali n biidi yeni, Nani yaa jakoando n kan fidi ki faabi oba kuli yeni? Ba leni lani kuli, o Diedo, a ye ti siiga, Ti taagi a yeli. Ŋan da lu ki diani ti.»

¹⁰ O Diedo yedi bi naa niba, yaa maama n tie ne: «Bi faadi ti puagidi, bi kan fidi ki kali kaanyendu.» O Diedo ki ye leni ba. Moala o tiadi bi tagili po, ki waani ba fala bi tuonbiadi po.

¹¹ O Diedo yedi nni: «Da jaandi bi naa niba po, ki da lingi bi ŋamu mo.

¹² Ba bi yaa loli bu ñoabu, n kan cengi bi paboandanmoe. Ba bi yaa cuani a padijuukaana leni bu paabu pada, n kan gaa bi po, kelima n baa teni bu toabu, mi koma leni u yianbiadipuodiko n dudi ba.»

¹³ N den guani ki yedi: «Ŋain o Diedo, diidi, bi saawalipuaba tua ba ke bi kan le toabu, koma mo kan cuo ba. Ama nekanba yo, ke a baa pa ba mi yanduanmoanma.»

¹⁴ O Diedo den yedi nni: «Bi saawalipuaba pua faame n yeli nni. Mii soani ba, mii puogi ban yedi liba. Mii maadi leni ba mo. Bi pua faame ke bi laadi li bonla, bi tuonli li tie baayuadiidu leni buli ŋoadima. Bi taani bi pala nni boandi yo, ki pua yi po saawali.»

¹⁵ Lani n teni ke o Diedo yedi nanda: «Yaa saawalipuaba n pua saawali n yeli nni ki tua ke toabu kan cua mi naa diema nni, ke koma mo kan tieni, mii soani ba. Bu toabu leni mi koma n baa bolini ba.

¹⁶ Ban pua yaaba yaa po saawali, mi koma leni bu toabu baa bolini ba Jerusalemi sani nni, bi kan baa yua n baa doagini ba mo, bani, bi puoba, bi bijaba leni bi bisiaba. N baa teni bi biadima n jiidi bi yula po.»

¹⁷ Yedi ba yaa maama n tie ne: «N mua ku ñiagu leni u yensiinu ki naa cedi, Kelima u nufanu pua n niba. Laa yebiadima pa hali boncianla.

¹⁸ N yaa gedi ku muagu po, Diidi bu toabu n dini yaaba nne. Min didi kua u dogu nni mo, Mi koma n teni ke yaaba n yiagi nne. Ba o saawalipualo leni o kopadiciamo goadi mi diema nni, Ke li paki ba.»

¹⁹ Naani a luni ki diani Juda cain yo? Naani a pali kuli fa Siyon po yo? Be yaa po yo ke a pua ti, Ke gaapo naa ye ti po? Ti bi daani mi yanduanma, Ama bonŋanliba kuli ki ye. Ti den daani laafia, Ama ti jawaandi bebe n cua ki taani ti!

²⁰ O Diedo, ti tuo tinba leni ti baanba tagili, Kelima ti tieni ti tuonbiadi.

²¹ A yeli po, ŋan da waani ti fala. Da fali a bali kalikaanu kpiagidi, Tiadi ŋan den kuani yaa ŋantaado leni ti, Ki yaa kubi ku bonŋanla.

²² Naani i nibuoli buyuogidi siiga, Pia yaa bulo n baa fidi ki teni ki taaga n mi? Naani ti tawadi n kpendinni ki taaga? Laa tie fini o Diedo ti Tienu ka? Ti dugi a po, kelima fini n tiendi laa bonla kuli.