Jeremi 13 - U TIENU MAAMA TILI 2013

Len gbanñagidigu

¹ O Diedo den maadi leni nni nanda, ki yedi: «Gedi ki ban daa len gaali gbanñagidigu ki taa ku ki ñagini a ciaga nni. Ŋan da pagini ku ñima nni.»

² Nani o Diedo n den yedi nni maama yeni, n den daa ku gbanñagidigu ki ñagini n ciaga.

³ O Diedo go den guani ki maadi leni nni miliema, ki yedi:

⁴ «Taa ŋan daa yaa gbanñagidigu ke ku ñaagi a ciaga nni, ki gedi u kpenciamu Efrati po ki ban wuoni ku li tanli tinga.»

⁵ N den gedi ki ban wuoni ku nani o Diedo n den yedi nni maama.

⁶ Lan den waagi, o Diedo den yedi nni: «Fii ki gedi Efrati, ki ban taa min den teni ke a wuoni yaa gbanñagidigu yeni.»

⁷ N den gedi Efrati po ki ban lingi ki laa, ki taa ku gbanñagidigu min den wuoni ku naankani. Ama ku gbanñagidigu den biidi, ki naa go den pia fuomiba kuli.

⁸ Lani, o Diedo den maadi nni yaa maama n tie ne:

⁹ «O Diedo yedi nanda: ‹Min baa bolini Juda japaadi maama n yeni. N baa tieni Jerusalemi japaaciandi mo yene.

¹⁰ Laa nibiadiba n yie ke bi kan cengi n maama. Bi ŋua bi pajuaga, ki ŋua tientoe, ki gbaandi ki pugi yi. Ban tua nani ku naa gbanñagidigu yaagu n ki go pia fuomiba kuli yeni!›

¹¹ O Diedo yedi: ‹Moamoani, nani ban yen ñagini ku gbanñagidigu ki ciaga nni maama yeni, nmoko den taa Isidayeli leni Juda yaaba kuli, ke ban tua n niba, n yeli, n pagidi leni n jilima. Ama bi naa cengi nni.› »

U Tienu pabienli daama

¹² Ŋan yedi ba yaa maama n tie ne: «O Diedo Isidayeli Tienu yedi ke ti gbandayuadi kuli baa gbie leni mi daama. Bi baa yedi a: ‹Naani fini n da baa waani ti ke ti gbandayuadi kuli baa gbie leni mi daama?›

¹³ Lanwani, ŋan yedi ba: ‹O Diedo maadi yaa maama n tie ne: Diidi, n baa teni mi naa diema niba kuli, bi badiba yaaba n kaa Davidi bali gbandi po, ki tie o puoliŋuani, bi kopadicianba, bi saawalipuaba leni Jerusalemi niba kuli baa ño mi daama hali ki gaadi.›

¹⁴ Mini o Diedo yedi ke n baa taa ba ki pua ba leni biyaba. N baa pua ki mudi bi bidanba leni bi bila kuli yenma, ke oba kuli kan cia. N kan gbadi bi ninñima, liba mo kuli kan teni ke n kan bolini ba.»

Cengi mani ke u yogunu daa pendi

¹⁵ Cengi mani, ki diadi yi tuba, Ki cedi mani ti japaadi! O Diedo n yedi yeni!

¹⁶ Kpiagi mani o Diedo yi Tienu Hali ke o daa teni ke li biigili cua, Ke yi taana mo daa tuudi li biigili juali. Yi bi daani mi yenma, Ama o lebidi ma ke mi tua kuuma biigili. O baa teni man tua tawaligu Yaagu n biigi boncianla.

¹⁷ Yi yàá cengi line, n baa buudi ŋasiili nni, Kelima yi japaadi po. N nuni baa wuli ti nunsiidi, Min mua boncianla, kelima bi baa gedini O Diedo niba ti yonbidi.

U Tienu n pia yaa maama badidiegu po

¹⁸ Yedi o bado leni o badipua: «Kali mani tiipo! Yi badifogiliŋanga cibidi ki baa.

¹⁹ Bi luoni nuganu po dogi. Oba kuli ki ye yua n baa luodi yi. Bi gedini Juda diema yaaba kuli ti yonbidi.»

²⁰ Yaadi mani ki diidi a yibalinba Yaaba n ñani nujienu po ki kpendi. Min bi piani a yaa niba yeni. Ŋan bi jigini a yuli yaaba yaa po yeni ye le?

²¹ Ŋan den tama ke yaaba n tie a danlinba Yaa ti cua ki pua ki paadi a, Ki diedi a yaa daali, A baa yedi be? Li baa yaa koani a Nani u maditugukoanu n yen cuo o pua yeni.

²² A yaa yedi a pali nni: «Be n teni ke line tieni nni?» A tagilibiadi po n teni ke bi kaadi a tiadi ki duoni, Ki tieni a u paalu boncianla.

²³ Naani Etiopi yua baa fidi ki lebidi o boanu? Naani ki gbiiga wani baa fidi Ki lebidi ki gbanu lega? Naani yinba wani n maani ki tieni Yaala n gundi yeni, Yi go baa fidi ki tieni yaala n ŋani?

²⁴ N baa yadi yadi ba Nani mi fanpienma faalu N yen yadi ti muadi maama yene.

²⁵ Yaala n baa tieni a n yeni. Min bili a po yaala n yeni. Mini o Diedo yedi yeni, Kelima a sundi n po, Ki dugi mi faama po yeni.

²⁶ O Diedo go yedi: «Lani n teni ke n baa kaadi a kpalibu Ki ban yilini a nunga, Ki teni ban le a mubima.

²⁷ Jerusalemi n laa a conconma leni a cagindi n ñiidi maama, A juana yula po leni i kuani nni. Lani n teni ke fala jagi a yuli po, Fini yua n ye ti joagindi nni yeni! Beyogunu yo, ke laa tuongunda baa gbeni?»