Jeremi 12 - U TIENU MAAMA TILI 2013

¹ Fini o Diedo, a tiegi ki kandi hali yaala Ke n kan fidi ki bu leni a. Ama leni lani kuli, N bua ki maadi a a buudi maama. Be n teni ke bi nibiadiba bonla kuli cuoni bi po? Be n teni ke i janbi danba yama dua bi yema nni?

² Fini n ŋuu ba. Bi faadi ki pia i jiini, Hali ki ban bundi bonŋanla ki luoni li bonluonkaala. A yeli li ye bi ñoabu nni yogunu kuli, Ama bi pala wani foagi leni a.

³ Fini o Diedo, a bani nni, A nua nni, a bani yaala n ye n pali nni. Nani ban ñani yaa pe ki baa n kodi yeni, Piadi ki sieni ba mi kodima daali po.

⁴ Hali u laa yogunu yo, Ke mi diema baa yaa baa ki ye, Mi kuuma paboanli nni? Hali u laa yogunu yo, Ke i kuani mo yaa muadi baa kuodi? Mi diema niba biadima po, Ti yandi leni i nuani kuli bodi. Bi yedi: «O kan fidi ki bandi yaala n faadi ki ye ti po.»

⁵ A yaa tiini leni a taana danba Ke bi coagini a, A baa tieni lede ki niagi leni i taami? A yama yaa dua kelima a ye yaa dogu N pia mi yanduanma nni, A baa tieni lede Jurden boanjaana Yaa duodi yaa yogunu?

⁶ Ba a kpiiba bani bi ba moko leni a baadiegu nni yaaba se a po leni i janbi. Bani bi ba ŋua a puoli po ki kuudi. Ba ban maadi a po yaa mamanma kuli, ŋan da daani ba.

U Tienu luni o diegu leni o niba

⁷ N ŋaa n diegu, Ki luni n faali, Min den bua yaala leni n pali kuli yeni, N ŋaa likuli bi yibalinba nuu nni.

⁸ N faali tua n po nani o yangbanlo li fuali nni yeni. O yie n po, ki duni hali boncianla. Lani n teni ke mii go bua li.

⁹ N faali tie n po nani o kaabo, Ke o lieba kuli taani ki bua ki je o yeni. Gedi mani ki ban taani ku muagu nni yandi kuli, Ki cuani ti mi jaanjiema po.

¹⁰ Bi yankpaaba boncianla jugi n duventiidi kuanu, Bi ŋmaa ŋmaa n kuanu, Bi teni ke n koaŋamu kpandi ki tua fanpienma, Nilo n ki ye naani.

¹¹ Bi teni ke u kuanu yeni kpandi diegbendi. U ye leni mi kuuma paboanli, U kuanu yeni naa go pia mayuli ba waamu. Mi diema kuli ye leni li paboanli. Oba mo ki yagini o yama li po.

¹² Mi fanpienma sani nni kuli, Yaaba n bua ki bolini kpendi na. O Diedo jugisiega bolindi mi diema, Ki cili kaliyendu, ki ban puodi u kaliyuu. Yanduanma ki ye oba kuli po.

¹³ Bi buli ŋalikama Ki baa yendi i konkoni. Bi den coagini bi yula fanma bebe, laa baa yuli. I fe n cuo yi ti naa kpaandi po, Kelima o Diedo pabiencianli po yo, Ke o tieni yi laa bonla.

O Diedo leni Isidayeli yieninlieba

¹⁴ O Diedo yedi mi naa maama Isidayeli yieninlieba yaaba n ki ŋani yeni po, bani yaaba n fie min puni n niba Isidayeli yaaba yaa tinga. Diidi, n baa ñani ba bi tinga nni. N baa ŋabi ki ñani Juda buolu bi siiga.

¹⁵ Ama n yaa ŋabi ba yaa yogunu, se mi ninñima n guani ki cuo nni bikuli yendo yendo po, min goa ki guani ba yuakuli o tinga nni, yuakuli o diema nni.

¹⁶ Bi yaa bangi n niba sani, bi yaa poli n yeli nni ki yedi: «Li Miali Diedo fo!» Nani ban bangi n niba ke bi polini o bulo Baali yeli nni maama yeni, lanwani, bi baa guani ki kali n niba siiga.

¹⁷ Ama bi yàá cengi puu kuli, n baa dadi ki ŋabi laa nibuolu. N baa ŋabi li nibuolu ki teni wun kpe. Mini o Diedo n yedi yeni.