Jeremi 11 - U TIENU MAAMA TILI 2013

Yaa niba n fidi o ŋantaado

¹ O Diedo n den maadi Jeremi yaa maama:

² Cengi mani ti ŋantaado maama, ki waani Juda leni Jerusalemi niba.

³ Ŋan yedi ba ke o Diedo Isidayeli Tienu maadi nanda: «Ti solindi n yaa ŋua, yua n ki cengi o naa ŋantaado maama,

⁴ min den kuani yua leni yi baanba, min den ñani ba Ejipiti diema nni yaa daali, ban den ye yaa buaga nni. N den yedi ban cengi n nialu, ki tieni min yedi yaala kuli. Yeni yi baa tua n niba, nmo baa tua yi Tienu.

⁵ Lanwani, n baa kubi n ñoanianu min den niani yi baanba yuu yeni, ke n baa pa ba mi naaŋanma leni ti siadi n dua yaa diema nni, nani yin ji nua maama dinla.» N den guani ki yedi: «Lan tua yeni o Diedo!»

⁶ O Diedo den yedi ke min kpaani laa maama kuli, Juda dogi nni leni Jerusalemi sani nni, ki yedi: «Cengi mani o ŋantaado ne maama, ki tieni wan yedi yaala!

⁷ Hali min ñani yi baanba Ejipiti diema nni yaa daali, ki ban taa ki pundi dinla, yaa yogunu kuli n li baa ki maadi leni ba ki tua: ‹Cengi mani n nialu.›

⁸ Ama baa cengi, baa diadi bi tuba ki cengi. Yuakuli ŋoadi o pajuagijagindi. Lani n teni ke nmo fii ki tieni bi po Laa ŋantaado n den pia yaa buudi, min den yedi ban kubi ki go tieni yaala, ke bi yie kaa tieni yeni.»

⁹ O Diedo den yedi nni: «Jerusalemi leni Juda diema yaaba siiga pia ban juogi ki baa tieni yaa janbi.

¹⁰ Bi lebidi ki guani bi yaajanba tuonbiadi nni, bani yaaba n den yie ke bi kan cengi n maama, ki ban ŋoadi bi nilanba tieni, ki baa yaa kpiagidi yini. Isidayeli leni Juda diema yaaba fidi, min den kuani yaa ŋantaado leni bi baanba.»

¹¹ Lani n teni ke o Diedo yedi mi naa maama: «N teni ke fala nandi ba. Bi kan fidi ki cia, bi baa yaa mua ki yi nni, nmo nan kan cengi ba.

¹² Juda dogi leni Jerusalemi yaaba gedi ki ban mia ban padi yaa buli a dugibila, ama bi nan kan fidi ki gaa ba bi fala daali.

¹³ Fini Juda, a buli yabi ki pundi a dogi. Fini Jerusalemi, a padibinbina, ŋan juugi a dugibila o bulo Baali po naankani, yabi ki pundi a sani.»

¹⁴ Fini, da jaandi laa niba po, da kpaani ki mia bi po, da jaandi bi po, kelima bi yaa mia n todima bi yebiadima po, mii yen cengi ba.

Isidayeli n tie o Diedo olivietibu

¹⁵ O Diedo yedi: «Min bua yaa niba naa pia yantugupiengu. Bi cua ki baa tieni be n diegu nni? Naani bi tama ban niani yaa ñoaniani, Bi ban padi n po yaa pada yeni, N baa teni ke mi yebiadima kan nandi ba? Bi tama ke lani n baa teni ban cia?

¹⁶ Mini o Diedo n den puni n niba Yaa yeli n tie ne: ‹Olivietibu yaabu yaa fabunli Leni bu bonluonkaala kuli ŋani.› Ama i tatantani siiga, N baa juu bu faadi u mu, Ki kua bu beni mo.

¹⁷ Li Miali Diedo U Paaciamu Kuli Daano n den kaani o niba likani. Wani n den teni ke mi yebiadima ŋmaa ba, kelima Isidayeli leni Juda yaaba n den tieni yaa biadima po. Bi den bieni o pali, ki juu o bulo Baali po a dugibila.»

Jeremi diegu nni yaaba n fii ki sedi o po

¹⁸ N bandi la kelima o Diedo n waani nni, Lani n teni ke n bandi bi tuada.

¹⁹ N den tie nani yaa pebiga yaa yama n dingi, ke bi caani ga u kodikaanu po yeni. Mii den bani ban den pia n po yaa yanjagibiada. Bi den tua: «Tin bolini bu tibu bun soangi yaa yogunu. Tin ñani o bi nisaaliba siiga, ban da go taa o yeli moko!»

²⁰ Ama Li Miali Diedo tie yaa bujialo n tiegi, Yua n bani bi niba yantiana bonŋanla. N baa le ŋan baa tuu ba i panpaani maama, Kelima n cua ki buni fine n maama.

²¹ Lani n teni ke o Diedo maadi nanda, ki yie Anatoti yaaba po. Bani yaaba n bua a kuuma, ki tua: «Da pua saawali o Diedo yeli nni. Lani yaa ka tinba n baa kpa ŋa.»

²² Lani yaa po yo, ke Li Miali Diedo U Paaciamu Kuli Daano maadi mi naa maama: «Diidi mani, n baa yie bi po. Ki jugisiega baa je bi jawaaba, mi koma mo n baa je bi bisiaba leni bi bijaba kuli.

²³ Bi siiga nni oba kan sieni, kelima n baa teni mi yebiadima n ŋmaa Anatoti yaaba, min baa fii ki sedi bi po yaa binli.»