Jeremi 10 - U TIENU MAAMA TILI 2013

U Tienu yua n fo leni i buli

¹ Cengi mani o Diedo n pia yaa maama, Ki baa maadi leni Isidayeli yaaba!

² O Diedo yedi nanda: «Da togidi mani i nibuoli bontienkaala, Da teni mani yaa sinankeeninba N tiendi tanpoli n jieni yi, Kelima yaa nibuoli n sieni n baa yaa jie laa bonla.

³ Laa nibuoli bogida ki pia fuomiba kuli. Bi yen pedi bu tibu li fuali nni, O tuonsoanbando n taa ki kpiediyaliga, Ki kpie bu bonŋanla.

⁴ Bi yen bobini bu tibu daagu yeni bonŋanla Leni ŋanjilifa leni wula. Bi yen taa ki tuatuaga, Ki kpaa ku leni a kpakpaana, Ke kun da begibi.

⁵ Laa buli tie nani a bunbungbenga yene. Baa maadi. Se bi tugi ba, Lani yaa ka bi kan fidi ki yaagi taali. Da jie ba mani, Kelima bi kan fidi ki tieni bonbiadiliba kuli, Nani ban kan fidi ki ŋanbi liba mo maama yeni.»

⁶ Oba kuli ki naani leni a, o Diedo A yabi, a yeli moko yabi ki go pia u paalu.

⁷ Fini i nibuoli kuli bado, ŋme n kan jie ŋa? Fini n tie lan pundi ban fangi yua, Kelima i nibuoli yanfuodanba kuli siiga, Mi diema buoli kuli siiga, Oba kuli kan niagi leni a.

⁸ Laa niba kuli tie yanpiidanba, Kelima bi buli yeni n bangi ba, Ki nan sua bi buli yeni mo tie daade.

⁹ Hali Tarsisi po yo ke bi ñandi ŋanjilifa, Ufasa po yo ke bi ñandi wula. O maano soani leni laa bonla bonŋanla. Bi yen yuandi ki lani i buli yeni Leni yaa tiadi n moani colicoli, Ki ŋmadi leni yaa tiadi n moani ki suudi. Lani kuli tie o tuonsoanbando yaa tuonle.

¹⁰ Ama Li Miali Diedo tie U Tienu i moamoani, Wani yaa Tienu n fo tie yaa bado n ki pia juodima. O pabienli nni ki tinga digibi, I nibuoli kan fidi ki sedi o pabiencianli nintuali.

¹¹ Yin maadi leni ba nanda: «Yaa tieni n ki tagi tanpoli leni ki tinga baa bodi. I baa bodi mi tinfanma nni cain.»

¹² O tagi ki tinga leni o paalu, Ki tagi ŋanduna leni o yanfuoma. O tandi ti tawadi leni o yanfuoma.

¹³ O yaa li yedi mayenma, Mi ñima yen sani ki taani tanpoli. O yen teni ti tawadi n fii U tinbianu po, ki do tanpoli. O yen teni i tañigi n tieni ki taaga po. O den ñani u faalu wun wuo naani.

¹⁴ Joa kuli banma yen ti teni wan tua yanpiidaano. I fe n cuo yaaba n tuuni leni wula, Ban tagi yaa buli po, Kelima bi buli yeni tie fanma bebe, Baa pia fuoma bi niinni.

¹⁵ Baa pia mayuli Bi cila mo pia ti laadi, Bi fala yaa cua yaa daali, Bi baa bodi.

¹⁶ Ama Isidayeli Tienu, Yua n tagi tanpoli leni ki tinga Naa tie nani i buli yeni ka, Wani n die Isidayeli yaaba. O yeli n tie Li Miali Diedo U Paaciamu Kuli Daano.

Mi yebiadima ki pia kaa cua

¹⁷ Wodi a tiadi fini Jerusalemi, Ban cebi ki lindi fini yua yeni!

¹⁸ O Diedo yedi mi naa maama: «N baa lugidi mi diema yaaba Nani ku tanbuncaangu yeni. N baa mabini ba bonŋanla, Hali yaala ke oba kan cia.»

¹⁹ Jerusalemi yedi: «Mi naa yebiadima te? N bia n yeni! N poagilima ki pia ñoagu. Nmo den tua: Laa bia, N baa naabi!

²⁰ N gbandieli biidi! Li baabi kuli cie. N bijaba sani ki ŋaa nni, Baa go ye. Mii go pia yua n baa tii n po n gbandieli, Yua n baa pini n po n diena.»

²¹ Bi gobidikaaba tua yanpiidanba, Baa lingi o Diedo. Lani n teni ke baa bani bonla gagidima. Ban gobidi yaaba mo kuli yadi yadi.

²² Ti gba ke bu lanbu kpendi. Laa lancianbu ñani nujienu diema po yo, Ki baa teni Juda dogi n tua diegbendi Leni tanboe yekaanu.

Jeremi jaandi o buolu po

²³ O Diedo, n bani ke o nisaalo ki die o sanu, O kan fidi ki ŋoadi o yuceli po sanu.

²⁴ Tundi nni o Diedo Leni mi teginma, Lan da tua leni pabienli ka, Ŋan da ti teni min juodi fanma.

²⁵ Teni a pabiencianli n jiidi i nilanbuoli po, Bani yaaba n ki bani a Leni yaa nibuoli n ki jaandi ki miadi a todima yeni po, Kelima bi di Jakob buolu. Bi dini o hali ki bolini o, Ki teni ke o tinga tua paboanli kaanu.