Jaki 5 - U TIENU MAAMA TILI 2013

I tundi a piada po

¹ Moala yinba a piada, cengi mani! Yin yaa buudi a bubupaala, kelima yaa fala n baa baa yi po.

² Yi ŋalimano bedi, ti lulugidi mo kua yi tiayiekaadi.

³ I tantonmoani biidi yi wula leni yi ŋanjilifa. I tantonmoani yeni baa fii ki sedi yi po, ki kuli yi, ki bolini yi gbanandi nani u mu yeni. Yi dogini dogini yi ŋalimano a juodidana nni.

⁴ Diidi, yaa tuonsoanba n den yendi yi kuani ke yi janbi ba yeni, panpaani mua ki kuli yi. Yaaba n den taagi yi kpaandi yaa moe mo doni, ki pundi hali o Diedo U Paaciamu Kuli Daano tuba nni.

⁵ Yi den ye ŋanduna nni leni mi yemanma, ki go kuandi yi yama yi gbanandi bonbuakaala nni. Yi den di ki gbengidi nani a yanwubida, ban wubi yaaba mi kodima daali po yeni.

⁶ Yi cuo o niteginka ki jia o buudi ki kpa o. Waa yie yi po.

Juuni mani ke o Diedo kpendi

⁷ N kpiiba, yin yaa pia li juunli hali o Diedo n baa cua. Diidi mani, o kpakpaalo yen guu ki tinga bonluonkaala, yaala n pia mayuli hali boncianla, ki juuni li po hali wan baa baa ki takpiaga leni ki tajuodikaaga kuli.

⁸ Yimoko n juuni ki paagi yi pala, kelima o Diedo cuama nagini.

⁹ N kpiiba, yin da yenbidi yiyaba po, ke U Tienu n da bu ki cuo yi lipo. Wani o bujialo tuodi ki se bu buliñoabu kani.

¹⁰ N kpiiba, yin teni bi saawalipuaba, bani yaaba n den maadi o Diedo yeli nni, fala leni bi juunli n yaa tie yi po bontogidikaala.

¹¹ Diidi mani, ti tua ke li pamancianli ye leni yaaba n laa fala ki go juuni lienni. Yi gbadi Jobi n den pia yaa juunli leni o Diedo n den yuandi ki puni o yaala o juodima yogunu, kelima o Diedo pia mi ninñingbadima, ki go pia li ŋanbili boncianla.

¹² N kpiiba, yaala n tugi yuli tie line: Yin da poli leni tanpoli, bi leni ki tinga, ba poliba kuli. Ama yi yaa yedi: «Mm,» lan yaa tie, mm. Yi yaa yedi: «Aa-a» mo, lan yaa tie, aa-a, ke U Tienu n da ti jia yi buudi.

¹³ Yi siiga niloba yaa ye leni fala, wan jaandi. Niloba yaa ye leni li pamanli, wan yiini U Tienu yani, ki pagi o.

¹⁴ Yi siiga niloba yaa yia, wan yini Kilisiti Nitaanli nikpela ban jaandi o po, ki sogi o mi kpama o Diedo yeli nni.

¹⁵ Li dandanli yaa jaandi baa paagi yua n yia yeni. O Diedo baa fiini o. Li yaa tie ke o den tieni ti tuonbiadi, o baa baa sugili.

¹⁶ Lanwani, yin tuo yi tuonbiadi yiyaba nintuali, ki go yaa jaandi yiyaba po ke yin paagi. O niteginka jaandi pia u paalu hali boncianla.

¹⁷ Eli den tie nisaalo nani tinba yeni. O den jaandi jaandimoani ke taaga n da mi. Ki taaga naa den baa laa diema nni ba waamu, hali binataa leni boagidima.

¹⁸ Lani n pendi, o go den jaandi ke ki taaga mini, ke ki tinga mo loni ki bonluonkaala.

¹⁹ N kpiiba, yi siiga niyendo yaa yaadi ki ŋaa i moamoani, ke nitoa gobidi ki guani o lienni,

²⁰ yin bandi ke yua n gobidi ki guani ti tuonbiadi daano, wan yaadi ki ŋaa yaa sanu nni, o faabi o wan da kua mi kuuma nni, ki piini yaa tuonbiadi n yabi boncianla.