Jaki 4 - U TIENU MAAMA TILI 2013

Ŋanduna ŋantaado

¹ Yin pia yaa koana leni yaa janjanma kuli yi siiga yeni, likuli ŋua be? Laa ŋua yi gbanandi bonbuakaala, yaala n tiendi bu toabu yi gbanandi nni ka yo?

² Yi pia yin bua yaala boncianla, ama yi naa fidi ki baa la. Lani yaa po yo ke yi tie nikpaba leni nunponli danba, kelima yi naa fidi ki baa yin bua yaala. Lani n teni ke yi pia a koana leni mi janjanma yi siiga. Yii baadi yin bua yaala, kelima yii miadi U Tienu.

³ Yi miadi o mo ki naa baadi, kelima yi mia ki tudi, ki bua ki yaa biandi la yi gbanandi bonbuakaala po.

⁴ Yinba mi conconma danba yeni, yii bani ke ŋanduna buama tie yibalindi U Tienu po ka? Lanwani, yua n danli leni ŋanduna kuli, tua U Tienu yibali.

⁵ Naani yi tama ke i Diani maadi fanma fanma yo? I yedi ke U Tienu bua wan kuani yaa Fuoma ti niinni, hali ki pia li nunponli mi po.

⁶ U Tienu n tieni ti po yaa ŋanbili yabi ki cie, kelima i Diani yedi: «U Tienu yie bi japaadanba, Ama o puuni bi yumiindanba o ŋanbili.»

⁷ Lanwani, yin yaa miindi yi yula U Tienu kani. Yin yaa yiedi ku tuotabigu yudaano po, lani o baa sani ki foagidi yi kani.

⁸ Yin nagini U Tienu kani, omo baa nagini yi kani. Yinba ti tuonbiadi danba, nidi mani yi nii. Ŋanbi mani yi pala, yinba yamilie danba.

⁹ Yin bandi yi yebiadima, ki yaa ye leni li paboanli, ki yaa mua. Yin teni yi laadi n lebidi ki tua bubula, ki go teni yi pamanli n lebidi ki tua pabiidili.

¹⁰ Yin miini yi yula o Diedo kani, lani, o baa yaa jigini yi.

Oba n da jaligi o kpiilo

¹¹ N kpiiba, yin da maadi yiyaba po yaala n bia. Yua n maadi yaala n bia o kpiilo po, bi ki jia o buudi, o maadi yaala n bia li bali maama po, ki go ja mi buudi. Ama a yaa jia li bali maama buudi, ŋaa go tie li bali maama kubido ka, ama mi bujialo.

¹² Yendo bebe n ye ki tie li bali maama makadikaama daano leni li bujialo, wani yua n baa fidi ki faabi ki go bolini. Amo tie ŋme, fini yua n jia a lielo buudi?

Yin da pia japaadi

¹³ Moala, cengi mani n maama, yinba yaaba n tua: «Dinla, yaa ka saala, ti baa fii ki gedi u naa dogu, yaa ka une, ki ban bindi lipo, ki yaa tiendi u kpendu ki baadi ti ñuadi.»

¹⁴ Yinba, yii bani ba yi miana yema n baa tua maama saala. Yi tie nani ku gbangbadigu yeni, yaagu n ye u yogunu waamu po, ama ki baa yuandi ki bodi.

¹⁵ Yi bi baa yaa tua: «O Diedo yaa bua, ti baa yaa ye ki fo, ki tiendi line bi line.»

¹⁶ Ama moala yi maadi mi japaamaama, ki kpiagidi yi yula. Yi yaa kpiagidi yi yula yeni, li tie yaa bonla n bia.

¹⁷ Lanwani, yua n bani ki tieni yaala n ŋani, ki naa tieni la, li tie o po tuonbiadi.