Jaki 3 - U TIENU MAAMA TILI 2013

Bu lanbu

¹ N kpiiba, yi siiga nni niba boncianla n da lingi ki baa tua bangikaaba, kelima yi bani ke U Tienu baa jia tinba bi bangikaaba buudi, lan yaa pa ki cie.

² Tikuli tudi yaa tudima buoli n yabi. O nilo yàá tudi o maama nni ba waamu, o tie yaa nilo n ŋani ki dagidi cain, ki fidi ki paani o gbanandi kuli.

³ Ti yaa kpibini i taami mu biamu, ke ban tuo ki yaa tiendi tin bua yaala, ti fidi ki gobidi bi gbanandi kuli.

⁴ Yin go kpaagi ti ñinbiaciandi kani, ba ke ti yabi boncianla, ke ti tafaaciandi mo tudi ti, o ñinbiagobido gobidi ti leni yaa bonpegidikaala n wa, ki tendi ke ti caa wan bua naankani.

⁵ Bu lanbu mo tie yene, bu wa i gbananbuoli kuli siiga, ama bu baa fidi ki fiini buba, ki maadi mi japaamaama boncianla. Diidi mani, u mu waamu bebe baa fidi ki buoni yaa fuali n yabi.

⁶ Bu lanbu mo tie nani u mu yeni, ki go tie yaa bonbiadila n ye ti gbananbuoli siiga, ki joagindi ti gbanandi kuli. Ku fantanbuogu mu ye bu niinni, ki teni ke bu cuondi u mu o nisaalo miali yema kuli nni.

⁷ O nisaalo baa fidi ki paadi ti fuayandi buoli kuli, ti bonyugiditi buoli kuli, li bonbalinkaala buoli kuli leni yaa bonfuoda buoli n ye mi ñima nni kuli. O paani ba, ki go die ba mo.

⁸ Ama bi nisaaliba siiga, oba kuli kan fidi ki paadi bu lanbu. Bu tie ban kan fidi ki diedi yaa bonbiadila, ke mi kuuma mo gbie bu niinni.

⁹ Ti pagi o Diedo ti Baa leni buni, ki go solini bi nisaaliba, U Tienu n den tagi yaaba o yaa nannanli nni leni buni.

¹⁰ Ti pagidi leni ti solindi kuli ña ñoayenbu nni. N kpiiba, laa ŋani lan yaa tie yeni.

¹¹ Naani yaa ñima n mani leni yaa ñima n to baa fidi ki taani ki yaa ña ñinbunyenli nni?

¹² N kpiiba, naani bu kankanbu baa fidi ki luoni olivie bonluonkaala? Naani duven tibu mo baa fidi ki luoni a kankana? Yaa ñinbunli n tie ñinyaama mo kan fidi ki bundi ñinmanma.

Yaa yanfuoma n ñani tanpoli

¹³ Yi siiga, ŋme n tie o yanfuodaano ki pia mi bancianma ki fani? Wan doagidi o tagiŋamu nni o tuonŋama, ya n yegi leni li yumiinli leni mi yanfuoma.

¹⁴ Ama yi yaa pia li nunponbiadili ki niagi leni yiyaba, yin da kpiagi yi yula, ki da pua faama i moamoani po.

¹⁵ Laa yanfuoma buolu naa tie yaama n ñani tanpoli. Ama mi tie ŋanduna yaama, ki go tie ti gbanandi yaama, ki ñani mu cicibiadimu kani.

¹⁶ Li nunponbiadili leni mi niagima n ye naankani, li bonla kuli baa yaa tie sisindi sindi, li bontienka-biadila buoli kuli mo baa yaa ye likani.

¹⁷ Ama yaa yanfuoma n ñani tanpoli n tie maama nne: Mi kpa ŋani cain, yaala n ŋua mo tie ke mi kpendinni mi yanduanma, ki dingi, ki pia li yumiinli, ki gbie leni mi ninñingbadima. Mi tiendi a tuonŋama, maa tiendi gagidima bi niba siiga, maa pia palalie mo.

¹⁸ Yaaba n lingi mi yanduanma, tuuni yaa tuona n tiegi mi yanduanma nni.