Jaki 2 - U TIENU MAAMA TILI 2013

Yin da tiendi mi gagidima bi niba siiga

¹ N kpiiba, yinba yaaba n daani ti Diedo Jesu Kilisiti yua n pia ti kpiagidi yeni, laa ŋani yin yaa tiendi mi gagidima bi niba siiga.

² Min bagi yaala tie line: O nilo yaa kua yi taanli nni ki pili wula ñoagibili, ki go yie yaa tiadi n pia ti kpiagidi, ke o luodo mo kua ki yie a kpacala,

³ yi yaa jigini yua n yie yaa tiadi n kpiagi yeni ki yedi o: «Kali ne ti jigidi kaanu.» Yi yaa yedi o luodo mo: «Yaa se ne,» bi yaa ka: «Kali tiipo n taana kani.»

⁴ Naani yii tieni mi gagidima yi yama nni, ki go biigidi leni li yantiabiadili ka?

⁵ N kpibuadiba, cengi mani! Naani U Tienu ki gandi yaaba n tie luoda ŋanduna nuni po, ke ban tua a piada li dandanli nni, ki go baa wan niani ke o baa pa yaaba n bua o kuli yaa diema ka?

⁶ Ama yinba, yi fali o luodo. Naani a piada ka mabindi yi, ki caani yi li bujiali kani?

⁷ Bani ka sugidi yaa yeŋanli n ye yi niinni?

⁸ Yi yaa kubi U Tienu diema bali maama, nani lan diani maama li ŋani. Mi yedi: «Ŋan bua a lielo nani ŋan bua a yuli maama.»

⁹ Ama yi yaa tiendi mi gagidima bi niba siiga, yi tiendi ti tuonbiadi, li bali maama mo buni ki cuo yi kelima yi miidi ma.

¹⁰ Yua n kubi li bali maama ki nan miidi ba mayenma bebe, pia i tagili mikuli po.

¹¹ Yua n yedi: «Ŋan da conbi,» wani n go yedi: «Ŋan da kpa nilo» moko. Lanwani, a yàá conbi ki nan kpa nilo, a tua li bali maama miidika.

¹² Yin yaa mani ki go tiendi, ki bani ke U Tienu baa jia yi buudi, ki ŋoadi yaa bali maama n puuni mi faabima.

¹³ U Tienu yaa jia ti buudi yaa yogunu, o kan gbadi mi ninñima yua n kaa den gbadi o lieba po mi ninñima. Mi ninñingbadima paani ti buudi.

Li dandanli tuona 2.14—5.20 Li dandanli leni a tuona

¹⁴ N kpiiba, o nilo yaa yedi ke o pia li dandanli ki naa pia li tuona, li pia be yaa fuome? Naani o dandanli yeni baa fidi ki faabi o?

¹⁵ Yi kpiiba, joa bi pua yaa luo ti tiayiekaadi ki go luo daali kuli bonjekaala,

¹⁶ ke yi siiga yendo yedi o: «Yaa kuni leni mi yanduanma, ki ban yeli u mu ki go je ki guo,» ama ki naa puni o yaala n tie o yema po tiladi, li pia be yaa fuome?

¹⁷ Li tie yeni leni li dandanli: li yàá pia a tuona, li kpe.

¹⁸ Ama niloba yaa yedi: «Fini a pia li dandanli, nmo pia a tuona.» N baa yedi o: «Waani nni a dandanli yaali n ki pia tuona, nmo n baa waani a n dandanli kelima n tuona po.»

¹⁹ A daani ke U Tienu ye ki tie yendo bebe, a tieni ke li ŋani. Ama mu cicibiadimu moko daani yeni, ki jie ki digibi.

²⁰ Fini o yanluodaano na, naani a bua ki bandi ke yaa dandanli n ki pia a tuona tie fanma?

²¹ Naani ti yaaja Abalahama tuonŋama po ka teni ke bi yini o niteginka? Naani wan den padi o bijua Isaaka li padibinbinli po yeni ka teni ke o tiegi?

²² A laa ke o dandanli den taani ki yegi leni o tuona, ke o tuona yeni mo den teni ke o dandanli ŋani ki dagidi cain.

²³ Yeni i Diani n yedi yaala tieni: «Abalahama den daani U Tienu, ke U Tienu coadi o po la ke li tie teginma.» Bi den yi o U Tienu danli.

²⁴ Yi laa, o nilo tiegi kelima o tuona po, laa tie kelima o dandanli bebe po ka.

²⁵ Li go tie yeni Rahabi li puoconconli po. O tuona po o tie niteginka, kelima o den gaa bi tondiba cangu, ki teni ke bi tagi santo ki kuni.

²⁶ Lanwani, nani yaa gbanandi n ki pia naano n kpe maama, yaa dandanli n ki pia tuona moko kpe yene.