I Yani 8 - U TIENU MAAMA TILI 2013

¹ Diidi a yaa bi tie n naataanjaga yo, Ki mo ŋadi n naa biili, N bi baa tuogi a niinpo yo ki bibi a. Lanwani, bi kan jaligi nni.

² N bi baa gobidi ki kuani a n naa dieli nni. A bi baa bangi nni mi buama, Mini mo bi baa cedi ŋan ño Yaa daama yaa nuulu n mani, Leni grenadi tiidi bonluonkaala yaa ñima.

³ A nuganu n tebini n bunkpanli, A nujienu mo n yaa waliti nni.

⁴ N mia yi, yinba Jerusalemi Jafanba Yin da yagi mani n buado yama Hali ke man bua yaa yogunu daa pundi.

Mi majuodikaama 8.5-14 Bi jafanba

⁵ Yaa pua n guobi o buado Ki ña mi fanpienma po ne, Tie ŋme yo? N den fundi a bu tibu tinga, A naa n den taa a tugu naankani, Yua n mali a n den punbi a naani.

Mi buama fidu O jafaano

⁶ Bua nni leni a pali kuli, Da paadi leni nni abada, Kelima mi buama pia u fidu Nani mi kuuma yeni. Li nunponli mo pa nani bi tinkpiba diema yeni. Li tie nani yaa mu n co, Ki pua nani ki taaga yeni.

⁷ Mi ñincianma kan fidi ki gbindi mi buama, I kpenciami mo yaa ñima kan fidi ki milini ma. Ba o nilo yaa taa o diegu piama kuli Ki bua ki lebidi leni mi buama, Laa pia kuli tama, bi baa fali o.

O naataanjaba

⁸ Ti pia ti naataanpuoga, Yua n daa ñani biina. Ti baa tieni be ti naataanpuoga po, Yaa daali ke bi ji cili ki maadi o maama?

⁹ O yaa tie bilinu, Ti baa kpaa o po ŋanjilifa kpakpaana. O yaa tie buliñoabu mo, Ti baa luoni bu leni sediri dapaku.

O jafaano

¹⁰ N tie bilinu yo, N biina mo tie nani a diefoaga yeni. N den baa ki nunmanga n buado kani.

O jawaalo

¹¹ Salomon den pia duven tiidi Kuanu Baali-Hamoni po, O den teni laa kuanu bi guudikaaba Mi sobidima yogunu, Yuakuli yen tendi o kujapiena tudili.

¹² Mini yaa duven tikuanu wani, N baa kubi u n yuli po yo. Fini Salomon mo, a baa fidi Ki yaa kubi a kujapientudili yeni, Ama ŋan ŋaa kujapiena kobilie yaaba n guu po.

¹³ Fini yua n kaa salidinginba nni yeni, Danlinba cengi a nialu bonŋanla, A kan cedi nmo n gbadi u?

¹⁴ N buado, yuagi a taali ki sani Nani o piañoago bi ki piabiga yeni, Yaa tibidi n pia u nuulumanu juana po.