I Yani 3 - U TIENU MAAMA TILI 2013

O jafaano yeni dangi ke o gedi ki baa n lingi o togibaa O jafaano

¹ N lingi ku ñiagu n pali n bua yua N duanu nni, N lingi o, ama mii laa o.

² Lanwani, n baa fii Ki tagidi i sani leni mu daamu nni, Ki gaani u dogu nni. N baa lingi n pali n bua yua, N lingi o, ama mii laa o.

³ Yaaba n gaandi ki guu u dogu N den laa nni, N den buali ba: «Yii laa n po n pali n bua yua?»

⁴ Min den li baa ki pendi ba waamu yo, Ke n den laa n pali n bua yua. N den muubi o, ki kan go ŋaa o, Hali min baa kuani o n naa dieli nni, Yua mali nni yaa dieli nni.

⁵ «Yinba Jerusalemi jafanba, I piañoagi leni ku muagu nni piali po, N mia yi, Da yagi mani n buado yama. Ki da fundi o mo, Ke wan bua yaa yogunu daa pundi.»

Li bootaali 3.6—5.1 O jafaano

⁶ Ŋme n ban ña mi fanpienma po ne, Ki tie nani ku muñiigbangbadigu, Nani mili leni a dugibila gbangbadigu, Bi yaa tulale n mani buoli kuli yeni?

⁷ Salomon duanu yo ke bi tugi, Isidayeli jakoanda siiga, Jakoanda piiluoba n lindi ki cebini yuu.

⁸ Bikuli ñaagi mu jugisiemu Ki bogini bu toabu po. Yuakuli ñaagi o jugisiega o ciaga nni, Kelima ku ñiagu ludima po.

⁹ O bado Salomon teni ke bi taa Liban daadi ki tieni o po Ban baa yaa tugi o leni yaa bonkalikaala.

¹⁰ O teni ke bi tieni o po u kalikaanu yeni, Leni ŋanjilifa dosiedi, U denkaanu tie wula, U kalikaanu mo tieni Leni yaa cabimoana yaa dunga n pa. Jerusalemi jafanba den luni tugu nni leni payenli.

¹¹ Siyon jafanba ña mani, Ki ñuadi o bado Salomon, Ki le o naa n puni o yaa badifogiliga, Ke o ciibi ga o puocaali daali, O pamanli daali yeni.