I Yani 2 - U TIENU MAAMA TILI 2013

¹ N tie Saron tialu nni yaa puume Yaama n pudi ti joaloandi nni.

O jawaalo

² Nani mi puuma n baa pudi Ti konkondi siiga maama yeni, N buado tie yene bi jafanba siiga.

O jafaano

³ Nani pomie tibu n tie maama Li fuali tiidi siiga yeni, N buado mo tie yene bi jawaaba siiga. N bua ki yaa kaa o soangu nni, O bonluonkaala mo mani n ñoabu nni.

⁴ O kuani nni ku dadiegu nni, Ki doagidi n po o buama lienni.

⁵ Cuani mani tonma yaa lalaadi N tieni leni duventiidi bonluonkaala Ki paagi n gbanu. Cuani mani yaa bonluonkaala n mani Ki kuugi n nialu, Kelima n yia mi buama yianu yo.

⁶ O nuganu n tebini n bunkpanli, O nujienu mo n yaa waliti nni.

O jawaalo

⁷ Yinba Jerusalemi jafanba, n mia yi I piañoagi leni ku muagu nni piali po, Yin da fundi mani n buado, Yin da fundi o mani, Ke wan bua yaa yogunu daa pundi.

Li boolieli 2.8—3.5 Wani n kpendi yeni O jafaano

⁸ Li tie n buado yaa nialu yo, Wani nne, o kpendi ne, Ki do a joaciama, ki yugi ki kandi a joabila.

⁹ N buado naani leni o piañoago, Bi nani ki piabiga yene. Wani nne, wani n se ki dobidi Ti bilinu puoli po, Ki bii ki nua li diebonli kani, Ki diegi ki diidi.

¹⁰ N buado yiini ki tua nni: «N buado, n ŋamo fii ki cua ne!

¹¹ Diidi ki le, Ku fawaagu pendi, Ku siagu mo pendi.

¹² Mi puuma cili ki pudi mi diema nni, I yani yogunu mo pundi. Bi gba ki kpaajiefanga moe ti diema nni.

¹³ Bu kankanbu cili ki luoni bu kankankaana, Duven tiidi puuma yigidi Ke mi nuulu mo yadi. N buado, n ŋamo, fii ki cua ne.

¹⁴ Fini n kpaajebuadiga, A wuo ti tanlondi nni, Ki go wuo mi joajiidima yaa mabinma nni. Cedi min le a nunga, Ki gbadi a nialu, Kelima a nialu mani, A nunga mo ŋani!»

Binaa

¹⁵ Cuo mani ti po i coli, A colibila yeni, Yaaba n biidi duventiidi, Kelima ti duventiidi kuli tie puume.

O jafaano

¹⁶ Mini n die n buado, n buado mo n die nni. O kpaa o yangoli mi puuma siiga.

¹⁷ Hali ke ku yenjuagu fawaakuugima daa baa, Ke i soangi mo daa sani, N buado, ŋan tua nani o piañoago, Nani ki piabiga yeni, Ki lebidi ki guani yaa juana n paadi kani.