I Yani 1 - U TIENU MAAMA TILI 2013

O jawaalo leni o jafaano bookpiali 1.1—2.7

¹ Salomon yanbu yaabu n mani ki cie i yani kuli.

Yaaba n bua biyaba booli O jafaano

² Ŋan muadi nni leni a ñoabu nni muadi! Kelima a buama mani n po ki cie duven.

³ A tulale nuulu mani hali boncianla. A yeli ñani nani tulale nuulu n yadi maama yeni. Li tie lani yaa po yo, ke bi jafanba bua ŋa.

⁴ Dadi nni min yaa ŋua ŋa tin sani. O bado kuani nni o dieli nni: Tin mangi ti pala, Ki yaa ye leni li pamankandikaali. Tin pagi a buama ki cie mi daama. Yaaba n bua ŋa pia moamoani.

⁵ Yinba Jerusalemi jafanba, N boani nani Kedari gbandiena caba yeni, Ki nan ŋani mo nani Salomon dieli cabijoankaana yeni.

⁶ Yin da diidi nni kelima n boanu po, Li tie u yienu n boandi nni. N naataanje pala den fii n po, Ke bi den teni ke n guu duven tiidi kuani. Ama mini n ba yaa duven tikuanu, Mii den guudi u.

⁷ Fini n pali n bua yua, waani nni Ŋan yen kpaa a yangoli naankani Leni ŋan yen teni ban duani U yensiinu ki fuodi naani, Kelima be yaa po ke n baa goadi Ki liani a lieba yangola kani?

Bi yankpaaba

⁸ Fini yua n ŋani ki cie bi puoba kuli yeni, A yàá bani, wan kpaa o yangoli naankani, Ŋan ña ki ŋoadi ti yanbidi fuuli, Ki kpaa o ŋuabila, Bi yankpaaba gbandiena n ye naankani.

O jawaalo

⁹ N buado a sedima ŋani n po, Nani yaa tansalo n dia Faraon toateligu yeni.

¹⁰ Ŋan joani yaa tubilenlena pugini a kpiani ŋamu, Ŋan laa yaa laani mo teni ke a tulu ŋani.

¹¹ Ti baa duadi a po wula laani, Ke i ŋmadi leni ŋanjilifa ki tuu tuu.

O jafaano

¹² O bado n den di o jaanjiema yaa yogunu, N tulale nuulu den yadi.

¹³ N buado tie n po mili tiidi sinma, Ki dua ki maa n biina po.

¹⁴ N buado tie n po nani yaa ŋaliñini, N ye Eni-Gedi duven tikuani nni yeni.

O jawaalo

¹⁵ N buado, a li ŋane, A ŋani hali bonŋanla. A nuni ŋani nani ki kpaajiega yeni.

O jafaano

¹⁶ N buado, a li ŋane, A ŋani hali boncianla ki pia mi buama. Ti duanu n tie li muabunli.

¹⁷ Ti dieli dasaana tie sediri tiidi yaa beni. Ti dieŋama mo tie sipre tiidi yaa daade.