Hebilunba 9 - U TIENU MAAMA TILI 2013

O ŋantaadipaano candanbaalo

¹ O ŋantaadikpialo moko den pia ku ñoamabona, ya n tuugi leni i jaandi leni u kaangagidiŋamu, yuu n den ye ŋanduna nni.

² Lani, bi den tii li gbandieli. Li kaankpialu, ban yi yuu u kaangagidiŋamu niinni, den pia u fidisantuankaanu, tabili leni dupengagidika.

³ Bu kpalidoaginkaliebu liiga, ban yi yaa kaanu u kaangagidiŋanmoanu den ye.

⁴ Lienni den pia wula padibinbinli, ban den juugi a dugibila naani, ki go pia ku ŋantaadikpaku, ban tabini yaagu wula ku kaani kuli. Ku ŋantaadikpaku niinni wula tiagu yaagu n pia manni den ye leni Alono gbiamu, yuu n den bundi leni o ŋantaado tanpabimu.

⁵ Selubanba nannana, ya n doagidi ke U Tienu ye likani leni o kpiagidi, den se ku ŋantaadikpaku tanpoli, ke bi fiabi tiani ki yiini ku ŋantaadikpaku bonbiili po, ban yi yaali i candanbaani kaanu. Ti kan maadi laa bonla bonbidi bidi maama kuli moala po.

⁶ Ban den ŋanbi laa bonla kuli yeni, bi kopadicianba den maani ki kua li gbandieli kaankpialu niinni, ki tuuni yaa tuona n tuugi leni i jaandi.

⁷ Bi kopadicianba bado bebe n yen kua binli kuli yenma li gbandieli kaanlielu nni. O kan kua lienni, se o kubi mi soama yaama n baa padi wani o ba po leni ku niligu n tieni yaa tagili, kaa bani kuli po.

⁸ U Tienu Fuoma Yua den wangi yeni ke hali li gbandiekpiali n da ye yaa yogunu kuli, u sanu daa ŋanbi yaala n tie u kaangagidiŋanmoanu nni kuama po.

⁹ Laa bonla tie li nannanli u naa yogunu po, ki waani ti ke ban cuani yaa paabu leni yaa pada kuli, kan fidi ki ŋanbi o nilo wan dagidi cain, ki teni o pali siedi n duani.

¹⁰ Laa ñoamabona kuli den tuugi leni mi jiema, li bonñokaala leni mi wali-ŋanbima buoli kuli, yaama n da den baa ki ye hali mi lebidima yogunu n baa cua.

¹¹ Ama Kilisiti den cua ki tie kopadicianba bado yaa bonŋanla n baa cua po. O kua yaa gbandieli n yabi ki go ŋani ki cie niinni, bi nisaaliba n ki den tii yaala, ki naa tie mi naa tagima nni yaala mo.

¹² O den kua u kaangagidiŋanmoanu nni yenma, ke li dagidi i yogini kuli po. Waa den kua leni a naabila leni a ŋuabuana yaa soama ka, ama leni wani o ba yaa soaceli, ki baa ti po yaa daafaabima n baa ye hali yaa yogunu kuli.

¹³ Nani lan den bili maama, bi den taani a naatona leni a ŋuabuana soama leni o naasalo fantanpienma, ki miini yaaba n joagini po, ki ŋanbidi ba ki ñandi bi gbanandi joagindi.

¹⁴ Lanwani li yaa tie yeni, laa pia kuli tama, ke Kilisiti yaa soama n baa ŋanbi ba ki cie. U Tienu Fuoma yaama n ye yaa yogunu kuli paalu po, wani Kilisiti den puni o yuli U Tienu, nani yaa padili n ki pia joagindi yeni. O soama yeni baa ŋuudi ki ŋanbi ti pala siedi leni yaa tuona n baa cuani mi kuuma, ke tin yaa tuuni U Tienu yua n ye ki fo po.

¹⁵ Li tie lani yaa po ke Kilisiti tie o ŋantaadipaano candanbaalo, ke U Tienu n yini yaaba kuli n baa wan den niani ba yaa ŋalimano, yua n baa yaa ye hali yaa yogunu kuli. Lani kuli baa tieni kelima Kilisiti kpe, ke o kuuma faabi ba leni ban den tieni yaa tuonbiadi o ŋantaadikpialo n den die ba yaa yogunu.

¹⁶ O nilo yaa ŋaa ñoabu bonliba po, li tie tiladi ke lan doagidi ke laa nilo kpe.

¹⁷ Laa ñoabu kan yaa pia fuoma, yua n ŋaa bu n da fo yaa yogunu. Ama bu pia mi fuoma, yua n ŋaa bu yaa kpe.

¹⁸ Li tie lani yaa po, ke ba U Tienu ki den kuani o ŋantaadikpialo, ke laa tie ban kodi ti yandi ki wuli bi soama yaa ka.

¹⁹ Musa n den waani Isidayeli yaaba U Tienu bali maama ñoamabona kuli yaa yogunu, o den taa a naabila leni a ŋuabuana soama, ki kali ma leni mi ñima, ki go taa ti pekobimoandi leni isope tiidi benu, ki tuu mi soama yeni, ki mii li tili lini liba po leni bi niba kuli po, ki yedi:

²⁰ «Line n tie o ŋantaado soama, U Tienu n bili yi po yaagu.»

²¹ Musa go den tuu laa soama ki mii li gbandieli leni lin pia yaa tiadi kuli i jaandi po.

²² Li bali maama nni, li bua ki yaa tie ke mi soama n ŋanbidi li bonla kuli. Mi soama yàá wuli, tuonbiadi sugili ki ye.

Kilisiti padili ñani ti tuonbiadi cain

²³ Li den tie tiladi ke tanpoli bonla nannana n ŋanbi kelima laa pada po, ki go tie tiladi ke yaa pada n ŋani ki cie, n ŋanbi tanpoli bonmoanla.

²⁴ Kilisiti ki den kua bi nisaaliba n tii yaa kaangagidiŋamu, yuu n tie u bonmoanu nannanli niinni ka. O den kua hali tanpoli, ki ye U Tienu kani moala, ki miadi o ti po.

²⁵ Waa den kua tanpoli po, ki baa yaa lindi ki padi o yuli, nani bi kopadicianba bado kuli n yen kua u kaangagidiŋanmoanu nni, ki kubi mi soapanma maama.

²⁶ Li yaa den tie yeni, Kilisiti den baa cili ŋanduna tagima yogunu, ki yaa laadi fala. Ama moala ŋanduna juodima yogunu, o cua ki padi o yuli yenma u yogunu kuli po, ki bolini ti tuonbiadi.

²⁷ Nani lan bili ke nisaalo kuli baa kpe yenma maama, li yaa pendi ti buudi n cua,

²⁸ li tie yeni ke Kilisiti den padi o yuli ki kpe yenma, ki tugi bi nisaaliba boncianla tuonbiadi. O go baa cua mi liema ki doagidi o yuli ke li kan go yaa tie ti tuonbiadi ñanma po ka, ama yaaba n den guu o tindima po.