Hebilunba 7 - U TIENU MAAMA TILI 2013

Melikisedeki o kopadiciamo

¹ Melikisedeki yeni den tie Salem dogu bado, ki go tie tanpolijoma Tienu yaa kopadiciamo. Abalahama n den paadi bi badiba ki lebidi ki kuni yaa yogunu, Melikisedeki den ñani ki tuogi o ki gaali o.

² Abalahama n den baa yaa fagidi kuli, o den ñani li diim, ki puni Melikisedeki. A yaa soagini o yeli, Melikisedeki yeni tie mi “teginma bado,” ki go tie Salem bado, lani n bundi “mi yanduanma bado.”

³ Waa pia baa, waa pia naa, waa pia o yaajanba togida, waa pia o miali cilima leni o miali juodima. O tie nani U Tienu Bijua, ki baa yaa tie kopadiciamo yaa yogunu kuli.

⁴ Yin kpaagi mani wani Melikisedeki n kpiagi maama. Ba ti yaaja Abalahama den puni o o fagidi kuli yaa diim.

⁵ U Tienu bali maama bili ke Levi buolu siiga yaaba n tuuni li kopadiciantuonli, n yaa gaani diim Isidayeli yaaba kuli kani, bani bi kpiiba yeni, ba ke bikuli tie Abalahama puoliŋuani.

⁶ Wani Melikisedeki yeli ki diani Levi buolu yaajanba yela nni. Ama o den gaa diim Abalahama kani, ki gaali o, wani, yua n den baa U Tienu ñoaniani.

⁷ Laa pia tama ke yua n gaali nitoa pia ti kpiagidi ki cie wan gaali yua.

⁸ Levi buolu kopadicianba maama, yaaba n gaani diim yeni tie nisaaliba, ki baa kpe. Ama Melikisedeki yaa po, li kadi ki yedi ke o ye ki fo.

⁹ Lanwani, Levi, yua n den gaani diim yeni, o moko den ñani diim kelima Abalahama den ñani.

¹⁰ Levi da den ye o yaaja Abalahama tugu nni, Melikisedeki n den ñani ki tuogi o yaa yogunu.

¹¹ Levi buolu kopadicianba tuonli den tie U Tienu n den teni Isidayeli buolu yaa bali maama tanpuuli. Lanwani, li yaa tie ke Levi buolu kopadiciantuonli yeni den ŋani ki dagidi cain, be yaa po ke li tie tiladi ke kopadiciantoa n cua nani Melikisedeki yeni, kaa tie Alono buolu?

¹² Yaaba n tuuni bi kopadicianba tuonli buolu n lebidi yeni, li tie tiladi ke li bali maama mo n lebidi.

¹³ Moamoani, mi maama na n maadi yua yaa po tie buolito yua, yaa buolu siiga ke ba niyendo ki den tuuni li padibinbinli tuonli.

¹⁴ Nilo kuli bani cain ke ti Diedo tie Juda buolu yua, ama Musa n den maadi Juda buolu po, waa den maadi bi kopadicianba maama.

Kopadiciantoa nani Melikisedeki yeni

¹⁵ Kopadiciantoa n den cua ki tie nani Melikisedeki yeni, doagidi tin maadi yaa maama na ki cie.

¹⁶ Waa den tua kopadiciamo kelima wan mali ki tie yaa nibuolu yua po ka. Ama o den tua yeni, kelima o pia yaa miali n kan gbeni yaa paalu.

¹⁷ Li tieni o po yaa siedi n tie ne: «A tie kopadiciamo hali yaa yogunu kuli, Nani Melikisedeki yeni.»

¹⁸ Lani yaa po, mi mabilikakpiama den bodi, kelima mi tadigi kaa pia todima.

¹⁹ Li bali maama yeni ki den fidi ki ŋanbi liba kuli ke li dagidi cain. Ama U Tienu den yuandi ki cuani ti po yaa suginma n ŋani ki cie, tin baa yaa nagidi U Tienu, kelima yaama yaa po.

²⁰ Laa bonla den tieni leni li poli. Yaaba n den tua bi kopadicianba naa tua leni poli.

²¹ Ama Jesu n den tua o kopadiciamo, U Tienu den poli ki yedi o: «O Diedo n poli, Ki kan lebidi o yanjagili, ki yedi: ‹A baa yaa tie kopadiciamo Hali yaa yogunu kuli.› »

²² Lani yaa po, Jesu tie siedi yaa ŋantaado n ŋani ki cie yaa po.

²³ Bontoala go ye, bi kopadicianba den yabi, kelima mi kuuma den teni ke baa fidi ki ye yaa yogunu kuli.

²⁴ Ama Jesu n ye ki fo hali yaa yogunu kuli yeni, teni ke o tuuni yaa kopadiciantuonli n ye yaa yogunu kuli po.

²⁵ Li tie lani yaa po, ke o baa fidi ki faabi yaaba n nagidi U Tienu, kelima o yaa todima po yaa yogunu kuli. O ye ki fo yogunu kuli, ki miadi U Tienu bi po.

²⁶ Wani n tie yaa kopadicianba bado buolu n dagidi ti po. O gagidi ki ŋani cain, waa pia tagiliba kuli, tuonbiadiba kuli mo ki ye o niinni. O paadi leni ti tuonbiadi danba, U Tienu den duoni o ke o pendi tanpoli kuli.

²⁷ Waa taa leni yaa kopadicianba yudanba n sieni, kelima li den tie bi po tiladi daali kuli, ban yen kpa padi a pada bani bi ba yaa tuonbiaceli po, ki nan yuandi ki padi bi niba kuli yaa tuonbiadi po. O den puni o yuli, ki tieni lani yenma, ke li dagidi i yogini kuli po.

²⁸ Li bali maama den dini bi nisaaliba yaaba n tadi ke bi tua bi kopadicianba. Ama li poli yaa maama yaama n den yuandi ki cua li bali maama puoli po yeni, teni ke Bijua, wani yua n dagidi ki ŋani cain hali yaa yogunu kuli, n yaa tie bi kopadicianba bado.