Hebilunba 6 - U TIENU MAAMA TILI 2013

¹ Lanwani, tin cedi Kilisiti maama bangicilikaama, ki suagi ki pundi yaa bangima n tie yaaba n kpedi ki dagidi yaa po. Tin da go puu yaa tanpuupanli n tie: Ki lebidi ki ŋaa yaa tuona n baa cuani mi kuuma leni li dandanli U Tienu po,

² mi batisima bangima, i nii maanma, bi tinkpiba fiima leni yaa buudi n baa yuandi ki cua.

³ Lani n tie tin baa suagi ki tieni yaala, U Tienu yaa tuo.

⁴ Yaaba n den baa ke U Tienu yendi ba yenma, ke bi leni yaa paabu n ñani tanpoli po, ki taani leni yaaba n baa U Tienu Fuoma Yua,

⁵ ki leni ki bandi U Tienu maama n mani maama, ki go bandi yaa yogunu n kpendi yaa paalu,

⁶ bani yaa yaadi, li kan tuo yanlebidima n yaa go ye bi po. Bani bi ba go joani U Tienu Bijua li dapoanpoanli po, ki go fiagi o asala nni.

⁷ Yaa tinga n baadi ki taaga boncianla, yaa pudi yaala n pia mi fuoma yaaba n ko ga po, laa tinga baadi U Tienu seli.

⁸ Ama ki yaa pudi i konkoni leni muadimalikoni, kaa pia fuoma. Bi kan waaginni ke bi soli ga, ki go juodi ke bi juu ga.

⁹ Ama n buakaaba, ba ke ti maadi yeni, ti bani cain ke yi se u sanŋamu nni yaala n tie mi tindima po.

¹⁰ U Tienu tiegi. O kan sundi yin den tieni yaala ki doagidi yi buama o po leni yin den todi bi nigagidiŋanba ki go baa ki todi ba maama.

¹¹ Ti bua hali bonŋanla ke yi siiga yuakuli n go yaa pia li yankuali yeni hali mi juodima yogunu, ke yin baa yin sugini yaala kuli cain.

¹² Tii bua yin yaa tie kpadijedanba, ama yin yaa togidi yaaba n baadi U Tienu n niani yaala, kelima li dandanli leni li juunli po.

U Tienu ñoanianu tie ñoaniandugiko

¹³ U Tienu n den niani Abalahama u ñoanianu yaa yogunu, o den poli ke o baa kuani u. Oba n ki ye ki cie o yeni, o den taa wani o ba yaa yeli, ki poli

¹⁴ ki yedi: «Moamoani, n baa seligi a, ki yaa pugidi a puoliŋuani.»

¹⁵ Abalahama n den juuni ki guu, o den baa U Tienu n niani o yaala.

¹⁶ Bi nisaaliba yaa poli li poli, bi yen taa yua n cie ba yaa yeli, ki poli. Li poli mo tie nani i kpaaligi yeni ki baa teni mi niama kuli n gbeni.

¹⁷ U Tienu moko n den bua lan doagidi cain, yaaba n baa baa wan niani ba yaa ñoanianu yaa po ke o yanjagili kan lebidi, o den niani u ñoanianu, ki pugini li poli.

¹⁸ U Tienu den bili laa bonliedila, yaala n kan lebidi, wan kan pua faama yaala yaa po, ki bua ki yaa paagidi ti pala boncianla, tinba yaaba n sani ki baa o po, ki cuo wan bili ti po yaa dugidi ki muubi.

¹⁹ Laa dugidi tie ti po nani ku ñinbiagu kubikpiagili yaali n siendi ku bonŋanla yeni. Mi se ki go pa bonŋanla ki piani bu kpalidoaginkaabu ki pendi ki kua liiga po, u kaangagidiŋanmoanu nni,

²⁰ Jesu n den gaa ti liiga ki kua naankani ti po. O tua yaa kopadicianba bado n tie nani Melikisedeki yeni, ki baa yaa ye hali yaa yogunu kuli.