Hebilunba 5 - U TIENU MAAMA TILI 2013

¹ Kopadicianba yudaano kuli tie ban gandi yua bi niba siiga, ki dini o ke o tuuni U Tienu tuonli bi niba po, ki padi U Tienu po yaa pada n tie bu paabu leni ya n tie ti tuonbiadi po.

² O fidi ki juuni leni bi yanboandanba leni bi niyaadikaaba, kelima wani o ba yen pia ku tadingu yogunu kuli.

³ O tadingu yeni yaa po, li tie tiladi wan yaa padi a pada wani o ba tuonbiadi po, nani wan padi bi niba kuli po maama.

⁴ Oba kuli kan gaa o yuli po laa jigidi, kali U Tienu n yini yua nani wan den yini Alono maama.

⁵ Yeni, Kilisiti moko ki den gaa o yuli po kpiagidi leni wan tua bi kopadicianba bado yeni. Ama li tie yua n den yedi o: «A tie n Bijua, Mini n mali a dinla.»

⁶ O go yedi kaanto: «A tie kopadiciamo hali yaa yogunu kuli, Nani Melikisedeki yeni.»

⁷ Wani, wan den tie nisaalo ki ye o gbanandi nni yaa yogunu, o den miadi U Tienu yua n baa fidi ki faabi o leni mi kuuma, i tantani leni ti nunsiidi nni. U Tienu den gbadi o miabu, kelima o den fangi wani U Tienu.

⁸ Ba ke o tie U Tienu Bijua, o den bandi mi tuoma U Tienu po n tie yaala, kelima wan laa yaa fala po.

⁹ Wan den teni ke o ŋani ki dagidi cain yeni, o den tua yua n cuani yaa tindima n ki pia gbenma, yaaba n tuo ki ŋua o kuli po.

¹⁰ U Tienu dini wane ke o tie bi kopadicianba bado, nani Melikisedeki yeni.

Fangi mani yi yula ki da ti ŋaa li dandanli

¹¹ Ti pia mi maama boncianla ki bua ki maadi laa bonla po. Ama li bundima pa, kelima yi tie yaaba n kaa gaani maama tontoni.

¹² Moala li bi pundi ke yinbe n yaa tie bi bangikaaba. Ama yi go baa ki bua ban yaa bangi yi mi bangicilikaama, U Tienu maama bangima siiga. Yi tua nani yaaba n da baa ki ñu mi naaŋanma bebe, ki kan fidi ki gaa yaa jiema n juagi yeni.

¹³ Yua n da ñu mi naaŋanma bebe daa bandi ki gagidi yaala n tiegi leni yaala n ki tiegi, kelima o da tie canpandiga.

¹⁴ Ama yaa jiema n juagi tie yaaba n kpedi ki dagidi yaa po yo. Bani n tie yaaba n pia yaa yantiali n maani ki biigidi, ki gagidi yaala n ŋani leni yaala n bia.