Hebilunba 4 - U TIENU MAAMA TILI 2013

¹ Lanwani, hali ke U Tienu n den niani yaa ñoanianu o fuodima nni kuama po da baa ki ye, tin fangi mani ti yula, ke yi siiga ba niyendo n da ti sua ke li pendi.

² Bi den waani ti U Tienu maama nani bani yeni. Ama ban den gbadi yaa maama yeni naa den todi ba liba, kelima baa den gaa ma leni dandanli.

³ Tinba yaaba n daani yaa po, ti kua laa fuodima nni, wan yedi yaama yaa po: «N poli n pabienli nni ki yedi: ‹Bi kan kua n fuodima nni abada.› » O den yedi yeni ba ke o tuona kuli den soani ki gbeni, hali ŋanduna tagima yogunu.

⁴ Kaanuba o maadi li daleleeli maama ki yedi: «U Tienu den fuodi leni o tuona kuli li daleleeli.»

⁵ Lani, li go yedi: «Bi kan kua n fuodima nni abada.»

⁶ Yaaba n den kpa gbadi U Tienu maama yeni ki den kua mi niinni, kelima bi dandanluoma po. Ama u sanu da ye nitianba po, ban kua laa fuodima nni.

⁷ Lani yaa po, U Tienu go bili datoali, ki yi li: «Dinla.» Li waagi ke o den ti maadi li maama Davidi ñoabu nni, nani lan kpa yedi maama: «Dinla, yi yaa gbadi o nialu, Yin da juagi yi pala.»

⁸ Li yaa tie ke Josue den puni ba mi fuodima, U Tienu kan go den yuandi ki maadi datoali maama.

⁹ Lanwani, U Tienu fuodima daali yaa fuodima baa ki bili U Tienu niba po.

¹⁰ Yua n kua U Tienu yaa fuodima nni, fuodi leni o tuona nani U Tienu n den fuodi leni o ya maama.

¹¹ Lanwani, tin moandi mani hali bonŋanla ki kua laa fuodima nni, ke ti siiga niloba kuli n da ti yaa pia mi yiema, ki gbali mi kuama nani bani yeni.

¹² U Tienu maama fo ki tuuni leni u paalu. Mi mani ki cie jugisieñoaliedi, ki muu, ki paadi o naano leni li yantiali, ki go paadi a tuga leni o lonlogo. Mi biigidi o nilo yanmaalima leni o jaga.

¹³ Tagimiba kuli ki wuo U Tienu nuni po, likuli ye mubima ki doagidi cain o nuni po, tin baa togidi wani yua ti tuona kuli.

Jesu Kilisiti n tie bi kopadicianba bado 4.14—10.39 Jesu cie bi kopadicianba yudanba

¹⁴ Lani yaa po, ti pia bi kopadicianba bado, yua n den kua tanpoli po, lani n tie Jesu U Tienu Bijua. Lani yaa po, tin yaa se bonŋanla tin tiendi siedi yaa dandanli po nni.

¹⁵ Tii pia yaa kopadicianba bado n kan fidi ki gbadi ti ninñima ti tadingu nni ka. Bi den tulini o li bonla kuli nni nani tinba, ama waa den tieni tuonbiadi.

¹⁶ Lanwani, tin yaa nagidi leni li papaali U Tienu bali kalikaanu, li ŋanbili n ye naankani. Lankani ti baa baa mi ninñingbadima, li ŋanbili leni mi todima, lan bua yaa yogunu.