Hebilunba 3 - U TIENU MAAMA TILI 2013

Jesu cie Musa

¹ Lani yaa po, n kpiiba, bi nigagidiŋanba, yinba U Tienu n yini yaaba yin kpaagi mani Jesu po, wani yua n tie o Tondo leni tin tiendi siedi yaa dandanli po, yaa kopadicianba bado.

² O tie nidugika yua n den puogi o laa tuonli po, nani Musa n den tie maama U Tienu diegu kuli nni po.

³ Nani yua n maa li dieli n pia ti kpiagidi ki cie wan maa yaa dieli maama, yeni bi sua ke li pundi Jesu n yaa pia ti kpiagidi ki cie Musa.

⁴ Dieli kuli pia li maado, ama yua n maa li bonla kuli tie U Tienu.

⁵ Musa den tie nidugika U Tienu diegu kuli nni, ki tiendi siedi U Tienu n den baa yuandi ki yedi yaala yaa po.

⁶ Ama Kilisiti, wani n tie nidugika kelima o tie Bijua ki die U Tienu diegu. Tinba n tie o diegu li yaa tie ke ti kubi leni li papaali hali mi juodima tin kpiagidi ti yula yaa suginma yaa po.

U Tienu n bili yaa fuodima o niba po

⁷ Lanwani, nani U Tienu Fuoma Yua n yedi maama: «Dinla, yi yaa gbadi o nialu,

⁸ Yin da juagi yi pala, Nani yin den fiini mi yiema, Ki biigi o mi fanpienma nni yaa yogunu.»

⁹ U Tienu yedi: «Yi yaajanba den biigi nni lankani, Ki bua ki le nni, Ba ke bi den laa N tuona hali bina piinaa.

¹⁰ Lani yaa po, n pali den beni Leni laa nifiima, ke n yedi: ‹Yogunu kuli bi yama bodi, Baa bani n sani.›

¹¹ Li tie lani yaa po ke n den poli N pabienli nni, ki yedi: ‹Bi kan kua n fuodima nni.› »

¹² N kpiiba, fangi mani yi yula ke yi siiga niloba, n da pia yaa pali n bia, ki luo li dandanli, hali yaala ke o baa lebidi ki ŋaa U Tienu yua n fo.

¹³ Ama hali tin da ye i Diani n yini yaa yogunu: «Dinla» yeni, tin yaa paagidi tiyaba pala, ki da tuo ti tuonbiadi boandi n juagi ti pala.

¹⁴ Kelima ti taa leni Kilisiti, ki tie yenma leni o li yaa tie ke ti kubi tin den kpa pia yaa dugidi hali mi juodima.

¹⁵ Nani lan yedi moala ne maama: «Dinla, yi yaa gbadi o nialu, Yin da juagi yi pala, Nani yi yiema yogunu yeni.»

¹⁶ Ŋmenba n den gbadi U Tienu nialu ki fiini mi yiema yeni? Laa tie Musa n den gobidi ki ñani yaaba Ejipiti diema nni kuli ka?

¹⁷ O pali den be leni ŋmenbe hali bina piinaa? Laa tie yaaba n den tiendi ti tuonbiadi, ki kpe ke bi tinkpila baa ki yadi yadi mi fanpienma nni ka?

¹⁸ U Tienu den poli leni ŋmenba mo ki yedi ke bi kan kua o fuodima nni? Laa tie yaaba n den yie kaa ŋua o ka?

¹⁹ Lanwani, ti laa ke baa den fidi ki kua o fuodima nni, kelima bi dandanluoma po.