Hebilunba 2 - U TIENU MAAMA TILI 2013

U Tienu n puni yaa faabicianma

¹ Lani yaa po, li pundi tin fangi ti yula ki cie mi kpiama, ki kubi tin den gbadi yaa maama bonŋanla, ki da ti yaadi ki ŋaa ma.

² Ti bani ke malekinba n den wangi yaa maama, den sedi bonŋanla, ki go tiendi mo. Yua n den miidi kaa tuo ki ŋua man bili yaala kuli, den baadi yaa panpaani n dagidi.

³ Lanwani, ti yàá fangi laa faabicianma, o Diedo wani o ba n den kpa waani ti yaama, ti baa tieni lede ki sani ki cia o cuonu? Yaaba n den gbadi laa maama o Diedo ñoabu nni, mo den tieni ti po siedi ke mi tie moamoani.

⁴ U Tienu moko den ñii bi siedi leni sinankeeninba, li bonlidinkaala, yaa bancianma buoli n yabi leni U Tienu Fuoma Yua paabu, nani wan bua maama.

Jesu n gobidi bi niba mi tindima po

⁵ U Tienu ki puni malekinba yaa ŋanduna n kpendi nne, tin maadi yua yaa maama.

⁶ I Diani nni, li yedi: «U Tienu, o nisaalo tie be ke a tiani o po? O nisaalo n mali yua, Tie be ke a kubi o bonŋanla, Ki lani o ti kpiagidi leni ti jigidi?

⁷ A den jiini o u yogunu waamu, Ke malekinba cie o, Ki yilini o ti pagidi Leni ti kpiagidi bonyilikaala.

⁸ A teni ke o diedi likuli, Nani u bonŋmaakaanu yeni.» U Tienu n den dini o nisaalo li bali ke o die li bonla kuli yeni, waa ŋaa liba kuli ke waa die la. Ama ti daa laa ke o die likuli.

⁹ Die ti laa Jesu, U Tienu n den jiini yua u yogunu waamu ke malekinba cie o, ki puni o ti pagidi leni ti kpiagidi, ki go dini o li bali kelima wan den laa fala ki kpe yaa kuuma po. O den kpe bi niba kuli po, kelima U Tienu ŋanbili po.

¹⁰ Li den dagidi ke yua n tagi li bonla kuli leni li bonla kuli n ye yua yaa po, n lingi ki taani bila boncianla o kpiagidi nni. Lanwani, o den sua ke li pundi wan dagidi ki yaa ŋani cain, ki faabi ba kelima o fala po.

¹¹ Jesu yua n gagidi ki ŋanbidi bi niba U Tienu po leni wan gagidi yaaba yeni kuli, taa Baayendo. Li tie lani yaa po ke waa jie i fe ki yini ba o waamu,

¹² wan den maadi ki yedi: «N baa waani n waamu a yeli, Ki yiini ki pagi a li nitaanli siiga.»

¹³ O go yedi: «N baa yaa dugi o po.» Ki go yedi: «Mini nne! Mini leni U Tienu N puni nni yaa bila.»

¹⁴ A bila n tie nisaaliba ki pia ti gbanandi leni mi soama yeni, Jesu moko den tua nisaalo, ki pia ti gbanandi leni mi soama. O den tua yeni ki kpe, ke o kuuma n bolini Sutaani paalu, wani yua n pia mi kuuma paalu.

¹⁵ O den tieni yeni ki baa faabi mi kuuma jawaandi n den kubi yaaba ti yonbidi nni, bi yema kuli nni.

¹⁶ Li doagidi cain ke waa den cua ki baa todi malekinba ka. Ama o den cua ki baa todi Abalahama buolu yo.

¹⁷ Lani yaa po, li den tie tiladi wan tua nani o waamu yeni li bonla kuli nni. Yeni, o baa yaa tie yaa kopadicianba bado n gba bi po mi ninñima, ki go tie o nidugika wan tuuni bi po yaa tuonli U Tienu kani leni wan go den padi i candanbaani padili ki baa sugili bi niba tuonbiadi po maama.

¹⁸ O baa fidi ki todi ban tulini yaaba, kelima wani o ba den laa fala ban tulini o yaa yogunu.