Hebilunba 12 - U TIENU MAAMA TILI 2013

Ti Baa U Tienu

¹ Lanwani, yaa siedinba n yabi boncianla n lindi ti nani ku tawaligu yeni, tin tugidi yaa tugili n yie ti po leni yaa tuonbiadi n yabi ki lindi ki cebini ti. Lani, tin yaa tiini leni li juunli, yaa nuama n bili ti po.

² Tin yaa tiini ki nua Jesu yua n tie li dandanli cilika leni li ŋanbika. O den tuo li dapoanpoanli yaa kuuma, ki fali yaa fe n ye lienni, kelima yaa pamanli n den bili o po, ki kali U Tienu bali kalikaanu jienu po.

³ Kpaagi mani ti tuonbiadi danba n den yie wani yua yaa po, n den juuni maama, ke lan todi yi yin da coagi ki luo li papaali, ki cedi.

⁴ Yin koani yaa koanli leni ti tuonbiadi yeni, yi daa koani hali ke bi wuli yi soama.

⁵ Yi sundi U Tienu n tundi yi yaa tundi, nani bibaa n baa tundi o bila maama, ki yedi: «N bijua, ŋan da fali o Diedo N tundi a yaa tundifala, Ki da luo li papaali Wan jaligi a yaa yogunu.

⁶ O Diedo tundi wan bua yua leni fala, Ki pua wan nua yua Ke o tie o biga kuli.»

⁷ Yin juuni mani leni laa fala. U Tienu tiendi yi yeni, kelima o nua yi ke yi tie o bijaba. Ki laa bonjaga n ye ke o baa kan tundi o tundifala?

⁸ Ama yi yàá baa a bila kuli n baadi yaa tundifala, yi tie kpiaba, yii tie bimoana.

⁹ Ti baanba yaaba n tie nisaaliba den tundi ti tundifala, ke ti fangi ba. Lanwani, li pundi tin miini ti yula ti Baa yua n ye tanpoli kani, ke tin yaa pia li miali.

¹⁰ Ti baanba yen tundi ti tundifala u yogunu waamu bebe, nani ban sua ke li dagidi maama, ama U Tienu tundi ti tundifala ti ŋamu po, ke tin taani leni o o gagidiŋanma nni.

¹¹ Li tie moamoani ke tundifala kuli yen cili ki yaa tie pabiidili bonla, kaa tie pamanli. Ama li yen yuandi ki cuani lan bangi yaaba yaa po mi teginma leni mi yanduanma.

¹² Lanwani, yin paagi yi nii yii n yoaligi leni yi duna ya n tadigi.

¹³ Yi taana n yaa ŋua yaa sani n cuubi, ke yua n diani taali n da kpigidi, ama lin paagi.

Mi yegagidikaama

¹⁴ Yin lingi mani mi yanduanma leni bi niba kuli, ki go lingi mi gagidiŋanma, kelima yua n naa pia mani, kan le o Diedo.

¹⁵ Yin fangi yi yula, ke oba n da muni o yuli U Tienu ŋanbili. Yin go fangi yi yula ke yaa jiinu n bia ki to kuli, n da toa a benkpela, ki cuani ti yanyagidi, ki yaa joagindi bi niba boncianla.

¹⁶ Yin go fangi yi yula ke oba n da tie conconma daano leni yua n fali yaala n gagidi, nani Esayu yeni, yua n den kuadi o nikpedi kelima jeyenma po.

¹⁷ Yi bani ke lan pendi, wan den bua o baa n gaali o, waa den baa. Ba ke o den lingi leni ti nunsiidi, waa den fidi ke o baa lebidi jagili.

¹⁸ Yii nagini ban den baa fidi ki sii yaa juali, yaali n co u mu kani. Yii nagini ku gbangbadibiadigu, li biigicianli, ku faaciangu,

¹⁹ kakaci piebima leni u nialu fuugu n den ye naankani. Yaaba n den gbadi laa nialu den mia ke wun da go maadi ba, ba mayenma ki pugini,

²⁰ kelima baa den fidi yaa ñoamabonli n tie ne: «Ba yanga yaa sii li juali, ban lugidi ga a tana.»

²¹ Ban den laa yaala yeni kuli den pia i jeje hali ke Musa yedi: «N jie ti jawaandi hali ki digibi.»

²² Ama yi cua Siyon juali, lani n tie U Tienu yua n ye ki fo yaa dogu, yaa Jerusalemi n ye tanpoli kani, malekinba yaaba n yabi ki pundi a tuda tuda bam yaa kani.

²³ Yi cua yaaba n tie U Tienu bikpiala, ban diani yaaba yaa yela tanpoli po nitaanli kani, yi cua U Tienu kani, bi niba kuli bujialo kani. Yi cua bi niteginkaaba naani n ye naankani, bani U Tienu n ŋanbi yaaba ke bi dagidi cain kani.

²⁴ Yi cua Jesu kani, wani yua n tie o ŋantaadipaano yaa candanbaalo leni o soama kani, yaama n mii ki maadi yaa maama n ŋani ki cie Abeli yaa soama n den maadi yaala.

²⁵ Fangi mani yi yula, ki da yie ke yi kan cengi yua n maadi leni yi moala. Yaaba n den yie kaa cengi yua n soagindi ba U Tienu maama ŋanduna nni, naa den fidi ki sani ki cia. Lanwani, ti yaa yie kaa cengi yua n ye tanpoli po, laa pia tama ke ti kan fidi ki sani ki cia.

²⁶ Lanyogunu o nialu den teni ke ki tinga digibi, ama moala o niani ti yaa ñoanianu n tie ne: «Yenma goga, n baa teni ki tinga n digibi. Li kan yaa tie ki tinga bebe ka. N baa teni tanpoli moko n digibi.»

²⁷ Lan yedi: «Yenma goga» yeni, waani ti ke yaala n tagi ki baa fidi ki digibi kuli, baa pendi, ke yaala n kan digibi mo n suagi ki yaa ye.

²⁸ Lanwani, kelima ti baa baa yaa diema n kan digibi, tin yaa ye leni i tuondi, ki kpiagidi U Tienu, ki ŋua o leni li fangili leni i jeje, ke li mani o po,

²⁹ kelima ti Tienu tie yaa mu n bolindi.