Hebilunba 11 - U TIENU MAAMA TILI 2013

Jesu Kilisiti n faabi ti leni mi kuuma 11.1—13.19 Li dandanli

¹ Li dandanli tie o nilo n bani cain ke o sugini ki baa yaala, ki go tie wan kaa nua yaala yaa doagidima.

² Li tie li dandanli yaa po ke U Tienu den tieni bi nikpiaba po o siediŋamo.

³ Li tie li dandanli yaa po ke ti bani ke U Tienu den tagi ŋanduna leni o maama. Lanwani, tin nua yaala ñani tin ki nua yaala nne.

⁴ Li tie li dandanli yaa po ke Abeli den padi U Tienu po yaa padili n ŋani ki cie Kayini yaali. Li tie li dandanli yaa po ke U Tienu den yedi ke o tiegi, ki den gaa wan padi o po yaa padili. Laa dandanli yaa po yo ke o baa ki maadi, ba ke o kpe.

⁵ Li tie li dandanli yaa po ke U Tienu den taa Enoki ŋanduna nni, ke waa bandi mi kuuma. Baa go den laa o, kelima U Tienu den taa o. Hali ke o daa den taa o, i Diani den tieni o po siedi ke o mangidi U Tienu pali.

⁶ Oba kuli kan fidi ki mangi U Tienu pali, kali li dandanli yaa po. Li tie tiladi ke yua n pundi U Tienu kani kuli n daani ke o ye, ki baa pa yaaba n lingi o kuli i panpaani.

⁷ Li tie li dandanli yaa po ke Nowe den cengi U Tienu n den tuodi ki waani o ke yaala n baa tieni, ba ke bi daa den nua la. Li fangili yaa jeje den cuo o U Tienu po, ke o kpie ku ñinbiaciangu, ki baa gaa o deni yaaba miana. Wan den tieni yeni, o den buni ki cuo ŋanduna, ki den baa li moamoansaali, yaali n baadi kelima li dandanli yaa po.

⁸ Li tie li dandanli yaa po ke Abalahama den tuo ki tieni U Tienu n yedi o yaala, wan den yini o yaa yogunu, ki fii ki gedi wan baa baa ki diedi yaa diema nni. O den fii ki caa kaa bani wan caa naankani.

⁹ Li tie li dandanli yaa po ke o den kua ki kali nani o nilamo yeni, U Tienu n den niani o yaa diema nni. O den ye a gbandiena nni leni Isaaka leni Jakob, bani yaaba n den taani leni o ki baa U Tienu ñoanianu yeni.

¹⁰ Abalahama den tieni yeni, kelima o den guu ke o baa le yaa dogu n pia a tanpuupaala, U Tienu n tie yuu yaa dianka leni u maalo.

¹¹ Li tie li dandanli yaa po ke U Tienu den puni Sala u fidu ke o baa u buolu. Ba ke o den podi, wani yua n den tie ŋoaliga, kelima o den nua ke yua n niani u ñoanianu yeni tie dugika.

¹² Li tie lani yaa po ke jayendo kani, wani yua n den podi hali ki nagini mi kuuma, i puoliŋuani den ñani boncianla, yaaba yaa coali n tie nani a ŋmabila kaa pia coadima, nani mi ñincianma jaali tanbiima yeni.

¹³ Laa niba kuli den kpe ki kubi li dandanli. Bi daa den baa U Tienu n den niani ba yaala. Ama bi den tuodi ki laa la hali foagima, ki mangi bi pala li po. Bi den tuo yeni ke bi tie canba, ki ye ŋanduna nni u yogunu waamu po.

¹⁴ Yaaba n maadi yeni doagidi cain ke bi lingi bi doceli.

¹⁵ Bi yama yaa den baali ban den ñani yaa dogu nni, bi den baa fidi ki guani lipo.

¹⁶ Die moamoani bi den kuani bi yama ki bua ki pundi yaa dogu n ŋani ki cie, wuni tanpoli yuu yeni. Lani yaa po, laa pia U Tienu po fe ban yini o bi Tienu, kelima o ŋanbi bi po u dogu.

¹⁷ Li tie li dandanli yaa po ke Abalahama den padi Isaaka, U Tienu n den biigi o yaa yogunu. Wani yua n den baa u ñoanianu, den tuo ki baa padi o bonjayenyenga,

¹⁸ ba ke U Tienu den yedi o: «A baa baa i puoliŋuani Isaaka yaa kane.»

¹⁹ O den kpaagi ki nua ke U Tienu pia u paalu, ki baa fiini ba bi tinkpiba. Li tie lani yaa po ke U Tienu go den guani o o bijua. Laa bonla tie nannanli buolu yo.

²⁰ Li tie li dandanli yaa po ke Isaaka den gaali Jakob leni Esayu, yaa yema n ye liiga po.

²¹ Li tie li dandanli yaa po ke Jakob n den baa kpe yaa yogunu, o den gaali Josefi bila, biga kuli, ki ñii o gbiamu yuli po, ki kpiagi U Tienu.

²² Li tie li dandanli yaa po ke Josefi n den bua ki pundi o miali bianu, o den maadi Isidayeli buolu ñama Ejipiti nni maama, ki go bili li ñoamabonli, ban baa ti tieni o tinkpikpaba maama.

²³ Li tie li dandanli yaa po ke ban den mali Musa yogunu, o danba den wuoni o hali ŋmaalitaa, kelima bi den laa ke o tie yaa biga n ŋani. Baa den jie o bado ñoamabonli.

²⁴ Li tie li dandanli yaa po ke Musa n den fandi, o den yie ke ban da yini o Faraon bisalo bijua.

²⁵ O den sua ke bi yaa taani ki faligi o leni U Tienu niba, li cie wan mangi o pali leni ti tuonbiadi yemanma, yaala n tie bonpendikaala.

²⁶ O den kpaagi ki nua ke U Tienu n Gandi Yua fe tie o po bonmoanla ki cie Ejipiti ŋalimano kuli, kelima o den nua liiga po, wan baa baa yaa panpaani.

²⁷ Li tie li dandanli yaa po ke o den fii ki ñani Ejipiti nni, kaa jie o bado pabienli. O den juuni ki se ke li pa, kelima o nua oba kuli n ki nua yua.

²⁸ Li tie li dandanli yaa po ke o den teni ke Isidayeli yaaba cili mi Pendima jaanma, ki go mii mi soama a buliñoana po, ke mi kuuma maleki n da sii Isidayeli yaaba bonjakpiala.

²⁹ Li tie li dandanli yaa po ke Isidayeli yaaba den duodi mi Ñincianmoanma, nani ki tinkuonga yeni. Ama Ejipiti yaaba n den moandi ki baa tieni yeni, mi den milini ba.

³⁰ Li tie li dandanli yaa po ke Isidayeli yaaba den cuoni ki lindi Jeriko dogu bilinciami, hali danalele, ke i bilinciami yeni baa.

³¹ Li tie li dandanli yaa po ke li puoconconli Rahabi ki den taani ki bodi leni U Tienu yiekaaba, kelima o den gaa Isidayeli yaaba dodiidiba cangu, ki todi ba.

³² N go baa yedi be ki pugini? Mii pia yaa yogunu n baa dagidi min togidi Gedeon, Baraki, Samison, Jefite, Davidi, Samueli leni bi saawalipuaba kuli yaa maama.

³³ Bi dandanli po den teni ke bi paadi mi diema boncianla, ki tiendi yaala n tiegi, ki go baadi U Tienu n den niani ba yaala. Bi den luoni i yangbanli ñoana,

³⁴ ki go gbindi yaa mu n co jama, ki sani ki faabi bi yula mu jugisiemu ñoana nni, ki paadi i yiani, ki tua jakoanda bu toabu nni, ki deli bi nilanba toagola.

³⁵ Li dandanli po den teni ke bi puotianba, baa ke bi kpiiba yaaba n kpe guani ki fii bi tinkpiba siiga. Bi den waani bi nitianba mo fala ke baa tuo ki gaa mi faabima, kelima bi den bua ki baa yaa tinkpifiima n ŋani ki cie.

³⁶ Bi den ñuadi bine, ki pua ba i baliji, ki go kpaa bi tianba ti kpaadi, ki kuani ba li kpaadidieli nni.

³⁷ Bi den lugidi bine a tana, ki waani bi tianba falaciamo, ki go jia bi tianba leni ti sasaadi ki jendi ba. Bi go den kpa bi nitianba leni mu jugisiemu. Bi nitianba mo den tie luoda, ki goadi ki yie ti pegbandi leni ti ŋuagbandi, ke bi niba bia bi po, ki wangi ba fala.

³⁸ Ŋanduna ki den pundi ki yaa pia laa nimoanba o niinni. Bi den goadi mi fanpienma nni leni a juana nni, ki ye ti tanlondi nni leni i fali nni kuli.

³⁹ Ba ke bani kuli den baa ke U Tienu tieni bi po o siediŋamo kelima bi dandanli yaa po, baa den baa wan den niani ba yaala,

⁴⁰ kelima U Tienu den jagi ti po yaala n ŋani ki cie, kaa bua ban ŋanbi ki dagidi cain, ke tii ye lienni.