Hebilunba 10 - U TIENU MAAMA TILI 2013

¹ U Tienu bali maama den pia yaa bonŋanla n baa ti cua yaa jinjingu. Ama laa tie laa bonŋanla n tie maama cain. Li tie lani yaa po ke li bali maama yeni, kan den fidi ki ŋanbi yaaba n nagidi U Tienu cain. Li den tie tiladi ban yaa lindi ki padi binli kuli padibuoyendu.

² Lani yaa ka, bi den baa cedi a pada, kelima yaaba n jaandi yeni den baa ŋanbi cain yenma yogunu kuli po, ki kaa go faami bi tuonbiadi po.

³ Ama laa pada den tiadi ba bi tuonbiadi binli kuli,

⁴ kelima li kan tuo a naatona leni a ŋuabuana soama n fidi ki ñani ti tuonbiadi.

⁵ Li tie lani yaa po ke Kilisiti n den kua ŋanduna nni yaa yogunu, o den yedi: «Ŋaa bua li padili leni bu paabu kuli, Ama a tagi n gbanandi.

⁶ Ŋaa den tuo ki gaa a padijuukaana, Ba ti tuonbiadi sugili miabu yaa pada.

⁷ Lane ke n den yedi: ‹U Tienu, n cua ki baa tieni a yanbuama. Li maadi n yaa maame li tigbabikaali nni.› »

⁸ O kpa yedi: «Ŋaa den bua pada, ŋaa den tuo bu paabu leni a padijuukaana leni ti tuonbiadi sugili miabu yaa pada.» O den yedi yeni, ba ke laa pada den ŋua li bali maama n bili maama.

⁹ Lanwani, o den yuandi ki yedi: «N cua ki baa tieni a yanbuama.» Wan yedi yeni, o bolini a padikpiala buolu, ki bili li padiyuanli buolu.

¹⁰ U Tienu yanbuama yeni po Kilisiti den puni o gbanandi, ki tua li padili ki kpe ti po yenma, ke li dagidi yogunu kuli po, ki gagidi ki ŋanbi ti.

¹¹ Kopadiciamo kuli yen se o tuonli kaanu daali kuli, ki tuuni o tuonli, ki go padi i yogini boncianla padibuoyendu, ya n kan fidi ki ñani ti tuonbiadi abada.

¹² Ama, wani Kilisiti n den padi padiyenli bebe ti tuonbiadi po yaala n dagidi yogunu kuli po, o den kali U Tienu jienu.

¹³ O guu moala ke o yibalinba n tua o taaŋmaakaanu.

¹⁴ O padiyenli yeni yaa po, o teni ke wan gagidi ki ŋanbi yaaba dagidi cain, hali yaa yogunu kuli po.

¹⁵ U Tienu Fuoma Yua moko tieni ti po siedi, ke li tie yeni. O kpa yedi:

¹⁶ «Yaa dana n tie ne yaa pendi, N baa kuani leni ba yaa ŋantaado n tie ne: N baa bili n bali maama bi pala nni, Ki go diani ma bi yantiana nni.» O Diedo n yedi yeni.

¹⁷ Lane ke o pugini ki yedi: «N kan go tiadi bi tuonbiadi Leni bi biadima kuli po.»

¹⁸ Ti tuonbiadi sugili n ye naankani, padili ki go ye ti tuonbiadi po.

Tin yaa nagidi mani U Tienu kani

¹⁹ Lanwani n kpiiba, ti pia li papaali ki baa kua u kaangagidiŋanmoanu nni, kelima Jesu soama po.

²⁰ O koadi ti po u sanpaanu yuu n ye ki fo, ki pigidi tipo bu kpalidoaginkaabu. Lani n tie o gbanandi.

²¹ Wani n tie ban dini ti po yaa kopadicianba bado U Tienu diegu po.

²² Lani kuli yaa po, tin yaa nagidi U Tienu kani leni li payenli leni li dandanmoanli, ki yaa pia yaa pala n ŋuudi ki ñani yaa pali siedi n bia leni yaa gbanandi n ŋuudi leni mi ñinŋanma.

²³ Tin yaa se ke li pa, ki tiendi siedi tin pia yaa suginma po ki da cedi, kelima yua n niani ti u ñoanianu yeni, tie dugika.

²⁴ Tin yaa tiani mani tiyaba po, ki tigini tiyaba ke tin yaa pia mi buama ki tiendi a tuonŋama.

²⁵ Tin da ŋaa mani ti taanma, nani bi tianba n maani ki tiendi maama. Ama tin yaa paagidi mani tiyaba pala ki pugidi, kelima yi nua ke o Diedo daali nagidi.

²⁶ Ti yaa baa ki bandi i moamoani, ki yuandi ki tiendi ti tuonbiadi ti yama po, padili naa go ye ti tuonbiadi po.

²⁷ Ama se tin yaa guu leni i jeje U Tienu bujiali daali leni yaa mu n co ki baa bolini bi niyiekaaba.

²⁸ Yua n den miidi Musa bali maama kuli, bi baa kpa o siedinbilie bi siedinbitaa yaa ñoana nni, ki naa den gbadi o po ninñima.

²⁹ Lanwani, yua n fali U Tienu Bijua, ki nua ke o ŋantaado yaa soama yaama den n ŋuudi ki ŋanbi o yeni tie fanma, ki go sugi li ŋanbili paabu Fuoma, naani o yaa cuonu ka baa yaa bia ki cie?

³⁰ Ti bani yua n den yedi: «Mini n tie o pantuulo, mini n baa tuu i biadipanpaani,» wani n go yedi: «Li Miali Diedo U Tienu baa jia o niba buudi.»

³¹ Li tie yaa bonla n pia i jeje hali boncianla, ki baa U Tienu yua n fo nuu nni.

³² Yin yaa tiani mani lan den tie yi po maama yaa dana n pendi, U Tienu n den kpa yendi yi yama yaa yogunu. Ba ke bi den waani yi fala boncianla, yi den juuni ki moa li muacianli, ki se ke li pa lienni.

³³ Yogunuba bi yen fiagidi yi, ki go wangi yi fala bi niba kuli nintuali, yogunuba yi yen taani yenma leni ban den faligi yaaba.

³⁴ Yi den gba a kpaada po mi ninñima, ki go tuo ki mangi yi pala bi niba n den fie yi bonpiakaala yaa yogunu, kelima yi bani ke yi pia yaa ŋalimano n cie, yua n baa yaa ye hali yaa yogunu kuli.

³⁵ Lanwani, yin da ŋaa mani yin pia yaa dugidi, yaadi n pia yaa panpaani n yabi.

³⁶ Li pundi ke yin yaa pia li juunli ki se ke li pa, ke yin tieni U Tienu yanbuama ki dudi, ki baa wan den niani ke o baa pa yi yaala.

³⁷ Li diani: «Li go sieni u yogunu waamu bebe, Yoginjenjenga, Ke yua n baa ti cua Baa cua ke li kan waagi.

³⁸ N niteginka baa ye ki fo, Kelima o dandanli po. O yaa guani puoli, N pali kan yaa mani leni o.»

³⁹ Tinba wani, tii tie yaaba n guani puoli, ki baa yuandi ki bodi siiga nni yaaba ka. Ama ti tie yaaba n daani ti naani tindima po.