Hebilunba 1 - U TIENU MAAMA TILI 2013

Jesu Kilisiti n tie U Tienu doagidima cain 1.1—4.13 U Tienu maadi o Bijua ñoabu nni

¹ Hali yogu, U Tienu den lindi ki maadi ti yaajanba bi saawalipuaba ñoana nni leni mabuoli boncianla.

² Ama moala, mi juodima dana nni, o maadi leni ti o Bijua yaa ñoabu nne. O tagi li ŋandunli kuli o yaa niinne, ki bili ke wan diedi li bonla kuli.

³ Wani Bijua yeni n yadi U Tienu kpiagidi yenma. U Tienu n tie maama, o Bijua moko tie yene cain. O go kubi mi tagima kuli ke mi ye kelima o maama paalu po. Wan den soani ti tuonbiadi ŋuudiñanma tuonli ki dudi, o den kali hali tanpolijoma, U Tienu yua n pia ti kpiagidi jienu po.

U Tienu Bijua n cie malekinba maama

⁴ Bijua den tua yua n pia ti kpiagidi ki cie malekinba, nani wan baa yaa yeli, n pia ti kpiagidi ki cie bi yaa yela maama.

⁵ U laa yogunu yo ke U Tienu maadi leni o malekinba siiga ba yendo ki yedi o: «A tie n Bijua, Mini n mali a dinla?» U laa yogunu yo ke o maadi malekoba maama ki yedi: «N baa yaa tie a Baa, Amo baa yaa tie n bijua?»

⁶ Ama U Tienu n soani o Bijakpiaga ŋanduna nni yaa yogunu, o go yedi: «U Tienu malekinba kuli n kpiagi o.»

⁷ Wan maadi malekinba po, o yedi: «O teni ke o malekinba Tua nani u faalu yeni, Ki go teni ke o naacenba tua mupienu.»

⁸ Ama wan maadi o Bijua yaa maama, o yedi: «Fini U Tienu, a bali kalikaanu Baa yaa ye hali yaa yogunu kuli, A badigbiamu mo tie mi teginma gbiamu.

⁹ A bua mi teginma, Ki nani mi biadima. Li tie lani yaa po, fini U Tienu, ke a Tienu gandi a Ki wuli a yuli po li pamanli kpama, Ki teni ke a pia ti jigidi ki cie a lieba.»

¹⁰ O go yedi: «Fini o Diedo, hali mi cilima, A den puu ki tinga tanpuuli. Tanpoli mo tie a yaa tagime.

¹¹ Lani kuli baa bodi, Ama fini wani, a baa yaa ye. Likuli baa kpeligi, Ki cadi nani li liadili yeni.

¹² A baa koli koli la nani bu kpalibu yeni, Likuli n lebidi nani o nilo N lebidi o liadili maama. Ama fini, a tie yenma yogunu kuli, A bina mo ki pia gbenma abada.»

¹³ U laa yogunu yo ke U Tienu go maadi leni o malekinba kuli siiga, ba yendo ki yedi: «Kali n jienu po, Hali min guli a yibalinba ŋan ŋmaa ba?»

¹⁴ Malekinba yeni kuli ki tie fuoma, yaaba n tuuni wani U Tienu po ka? O tuuni bane ke bi todi mi tindima faajieba.